অধ্যায় 10

10.1

ধৃতরাষ্ট্র উবাচ
ভগবন্নাহমপ্যেতদ্রোচয়ে দ্যূতসংস্তবম্
মন্যে তদ্বিধিনাক্রম্য কারিতোঽস্মীতি বৈ মুনে

নৈতদ্রোচয়তে ভীষ্মো ন দ্রোণো বিদুরো ন চ
গান্ধারী নেচ্ছতি দ্যূতং তচ্চ মোহাত্প্রবর্তিতম্

পরিত্যক্তুং ন শক্নোমি দুর্যোধনমচেতনম্
পুত্রস্নেহেন ভগবঞ্জানন্নপি যতব্রত

ব্যাস উবাচ
বৈচিত্রবীর্য নৃপতে সত্যমাহ যথা ভবান্
দৃঢং বেদ্মি পরং পুত্রং পরং পুত্রান্ন বিদ্যতে

ইন্দ্রোঽপ্যশ্রুনিপাতেন সুরভ্যা প্রতিবোধিতঃ
অন্যৈঃ সমৃদ্ধৈরপ্যর্থৈর্ন সুতাদ্বিদ্যতে পরম্

অত্র তে বর্তয়িষ্যামি মহদাখ্যানমুত্তমম্
সুরভ্যাশ্চৈব সংবাদমিন্দ্রস্য চ বিশাং পতে

ত্রিবিষ্টপগতা রাজন্সুরভিঃ প্রারুদত্কিল
গবাং মাত পুরা তাত তামিন্দ্রোঽন্বকৃপায়ত

ইন্দ্র উবাচ
কিমিদং রোদিষি শুভে কচ্চিত্ক্ষেমং দিবৌকসাম্
মানুষেষ্বথ বা গোষু নৈতদল্পং ভবিষ্যতি

সুরভিরুবাচ
বিনিপাতো ন বঃ কশ্চিদ্দৃশ্যতে ত্রিদশাধিপ
অহং তু পুত্রং শোচামি তেন রোদিমি কৌশিক

পশ্যৈনং কর্ষকং রৌদ্রং দুর্বলং মম পুত্রকম্
প্রতোদেনাভিনিঘ্নন্তং লাঙ্গলেন নিপীডিতম্

এতং দৃষ্ট্বা ভৃশং শ্রান্তং বধ্যমানং সুরাধিপ
কৃপাবিষ্টাস্মি দেবেন্দ্র মনশ্চোদ্বিজতে মম

একস্তত্র বলোপেতো ধুরমুদ্বহতেঽধিকাম্
অপরোঽল্পবলপ্রাণঃ কৃশো ধমনিসংততঃ
কৃচ্ছ্রাদুদ্বহতে ভারং তং বৈ শোচামি বাসব

বধ্যমানঃ প্রতোদেন তুদ্যমানঃ পুনঃ পুনঃ
নৈব শক্নোতি তং ভারমুদ্বোঢুং পশ্য বাসব

ততোঽহং তস্য দুঃখার্তা বিরৌমি ভৃশদুঃখিতা
অশ্রূণ্যাবর্তয়ন্তী চ নেত্রাভ্যাং করুণায়তী

ইন্দ্র উবাচ
তব পুত্রসহস্রেষু পীড্যমানেষু শোভনে
কিং কৃপায়িতমস্ত্যত্র পুত্র একোঽত্র পীড্যতে

সুরভিরুবাচ
যদি পুত্রসহস্রং মে সর্বত্র সমমেব মে
দীনস্য তু সতঃ শক্র পুত্রস্যাভ্যধিকা কৃপা

ব্যাস উবাচ
তদিন্দ্রঃ সুরভীবাক্যং নিশম্য ভৃশবিস্মিতঃ
জীবিতেনাপি কৌরব্য মেনেঽভ্যধিকমাত্মজম্

প্রববর্ষ চ তত্রৈব সহসা তোয়মুল্বণম্
কর্ষকস্যাচরন্বিঘ্নং ভগবান্পাকশাসনঃ

তদ্যথা সুরভিঃ প্রাহ সমমেবাস্তু তে তথা
সুতেষু রাজন্সর্বেষু দীনেষ্বভ্যধিকা কৃপা

যাদৃশো মে সুতঃ পণ্ডুস্তাদৃশো মেঽসি পুত্রক
বিদুরশ্চ মহাপ্রাজ্ঞঃ স্নেহাদেতদ্ব্রবীম্যহম্

চিরায় তব পুত্রাণাং শতমেকশ্চ পার্থিব
পাণ্ডোঃ পঞ্চৈব লক্ষ্যন্তে তেঽপি মন্দাঃ সুদুঃখিতাঃ

কথং জীবেয়ুরত্যন্তং কথং বর্ধেয়ুরিত্যপি
ইতি দীনেষু পার্থেষু মনো মে পরিতপ্যতে

যদি পার্থিব কৌরব্যাঞ্জীবমানানিহেচ্ছসি
দুর্যোধনস্তব সুতঃ শমং গচ্ছতু পাণ্ডবৈঃ