অধ্যায় 9

9.1

ব্যাস উবাচ
ধৃতরাষ্ট্র মহাপ্রাজ্ঞ নিবোধ বচনং মম
বক্ষ্যামি ত্বা কৌরবাণাং সর্বেষাং হিতমুত্তমম্

ন মে প্রিয়ং মহাবাহো যদ্গতাঃ পাণ্ডবা বনম্
নিকৃত্যা নির্জিতাশ্চৈব দুর্যোধনবশানুগৈঃ

তে স্মরন্তঃ পরিক্লেশান্বর্ষে পূর্ণে ত্রয়োদশে
বিমোক্ষ্যন্তি বিষং ক্রুদ্ধাঃ কৌরবেয়েষু ভারত

তদয়ং কিং নু পাপাত্মা তব পুত্রঃ সুমন্দধীঃ
পাণ্ডবান্নিত্যসংক্রুদ্ধো রাজ্যহেতোর্জিঘাংসতি

বার্যতাং সাধ্বয়ং মূঢঃ শমং গচ্ছতু তে সুতঃ
বনস্থাংস্তানয়ং হন্তুমিচ্ছন্প্রাণৈর্বিমোক্ষ্যতে

যথাহ বিদুরঃ প্রাজ্ঞো যথা ভীষ্মো যথা বয়ম্
যথা কৃপশ্চ দ্রোণশ্চ তথা সাধু বিধীয়তাম্

বিগ্রহো হি মহাপ্রাজ্ঞ স্বজনেন বিগর্হিতঃ
অধর্ম্যময়শস্যং চ মা রাজন্প্রতিপদ্যথাঃ

সমীক্ষা যাদৃশী হ্যস্য পাণ্ডবান্প্রতি ভারত
উপেক্ষ্যমাণা সা রাজন্মহান্তমনয়ং স্পৃশেৎ

অথ বায়ং সুমন্দাত্মা বনং গচ্ছতু তে সুতঃ
পাণ্ডবৈঃ সহিতো রাজন্নেক এবাসহায়বান্

ততঃ সংসর্গজঃ স্নেহঃ পুত্রস্য তব পাণ্ডবৈঃ
যদি স্যাত্কৃতকার্যোঽদ্য ভবেস্ত্বং মনুজেশ্বর

অথ বা জায়মানস্য যচ্ছীলমনুজায়তে
শ্রূয়তে তন্মহারাজ নামৃতস্যাপসর্পতি

কথং বা মন্যতে ভীষ্মো দ্রোণো বা বিদুরোঽপি বা
ভবান্বাত্র ক্ষমং কার্যং পুরা চার্থোঽতিবর্ততে