অধ্যায় 8

8.1

বৈশংপায়ন উবাচ
শ্রুত্বা চ বিদুরং প্রাপ্তং রাজ্ঞা চ পরিসান্ত্বিতম্
ধৃতরাষ্ট্রাত্মজো রাজা পর্যতপ্যত দুর্মতিঃ

স সৌবলং সমানায্য কর্ণদুঃশাসনাবপি
অব্রবীদ্বচনং রাজা প্রবিশ্যাবুদ্ধিজং তমঃ

এষ প্রত্যাগতো মন্ত্রী ধৃতরাষ্ট্রস্য সংমতঃ
বিদুরঃ পাণ্ডুপুত্রাণাং সুহৃদ্বিদ্বান্হিতে রতঃ

যাবদস্য পুনর্বুদ্ধিং বিদুরো নাপকর্ষতি
পাণ্ডবানয়নে তাবন্মন্ত্রয়ধ্বং হিতং মম

অথ পশ্যাম্যহং পার্থান্প্রাপ্তানিহ কথংচন
পুনঃ শোষং গমিষ্যামি নিরাসুর্নিরবগ্রহঃ

বিষমুদ্বন্ধনং বাপি শস্ত্রমগ্নিপ্রবেশনম্
করিষ্যে ন হি তানৃদ্ধান্পুনর্দ্রষ্টুমিহোত্সহে

শকুনিরুবাচ
কিং বালিষাং মতিং রাজন্নাস্থিতোঽসি বিশাং পতে
গতাস্তে সময়ং কৃত্বা নৈতদেবং ভবিষ্যতি

সত্যবাক্যে স্থিতাঃ সর্বে পাণ্ডবা ভরতর্ষভ
পিতুস্তে বচনং তাত ন গ্রহীষ্যন্তি কর্হিচিৎ

অথ বা তে গ্রহীষ্যন্তি পুনরেষ্যন্তি বা পুরম্
নিরস্য সময়ং ভূয়ঃ পণোঽস্মাকং ভবিষ্যতি

সর্বে ভবামো মধ্যস্থা রাজ্ঞশ্ছন্দানুবর্তিনঃ
ছিদ্রং বহু প্রপশ্যন্তঃ পাণ্ডবানাং সুসংবৃতাঃ

দুঃশাসন উবাচ
এবমেতন্মহাপ্রাজ্ঞ যথা বদসি মাতুল
নিত্যং হি মে কথয়তস্তব বুদ্ধির্হি রোচতে

কর্ণ উবাচ
কামমীক্ষামহে সর্বে দুর্যোধন তবেপ্সিতম্
ঐকমত্যং হি নো রাজন্সর্বেষামেব লক্ষ্যতে

বৈশংপায়ন উবাচ
এবমুক্তস্তু কর্ণেন রাজা দুর্যোধনস্তদা
নাতিহৃষ্টমনাঃ ক্ষিপ্রমভবত্স পরাঙ্মুখঃ

উপলভ্য ততঃ কর্ণো বিবৃত্য নয়নে শুভে
রোষাদ্দুঃশাসনং চৈব সৌবলেয়ং চ তাবুভৌ

উবাচ পরমক্রুদ্ধ উদ্যম্যাত্মানমাত্মনা
অহো মম মতং যত্তন্নিবোধত নরাধিপাঃ

প্রিয়ং সর্বে চিকীর্ষামো রাজ্ঞঃ কিংকরপাণয়ঃ
ন চাস্য শক্নুমঃ সর্বে প্রিয়ে স্থাতুমতন্দ্রিতাঃ

বয়ং তু শস্ত্রাণ্যাদায় রথানাস্থায় দংশিতাঃ
গচ্ছামঃ সহিতা হন্তুং পাণ্ডবান্বনগোচরান্

তেষু সর্বেষু শান্তেষু গতেষ্ববিদিতাং গতিম্
নির্বিবাদা ভবিষ্যন্তি ধার্তরাষ্ট্রাস্তথা বয়ম্

যাবদেব পরিদ্যূনা যাবচ্ছোকপরায়ণাঃ
যাবন্মিত্রবিহীনাশ্চ তাবচ্ছক্যা মতং মম

তস্য তদ্বচনং শ্রুত্বা পূজয়ন্তঃ পুনঃ পুনঃ
বাঢমিত্যেব তে সর্বে প্রত্যূচুঃ সূতজং তদা

এবমুক্ত্বা তু সংক্রুদ্ধা রথৈঃ সর্বে পৃথক্পৃথক্
নির্যয়ুঃ পাণ্ডবান্হন্তুং সংঘশঃ কৃতনিশ্চয়াঃ

তান্প্রস্থিতান্পরিজ্ঞায় কৃষ্ণদ্বৈপায়নস্তদা
আজগাম বিশুদ্ধাত্মা দৃষ্ট্বা দিব্যেন চক্ষুষা

প্রতিষিধ্যাথ তান্সর্বান্ভগবাঁল্লোকপূজিতঃ
প্রজ্ঞাচক্ষুষমাসীনমুবাচাভ্যেত্য সত্বরঃ