Utshovঅধ্যায় 7
7.1
বৈশংপায়ন উবাচ
গতে তু বিদুরে রাজন্নাশ্রমং পাণ্ডবান্প্রতি
ধৃতরাষ্ট্রো মহাপ্রাজ্ঞঃ পর্যতপ্যত ভারত
7.2
স সভাদ্বারমাগম্য বিদুরস্মারমোহিতঃ
সমক্ষং পার্থিবেন্দ্রাণাং পপাতাবিষ্টচেতনঃ
7.3
স তু লব্ধ্বা পুনঃ সংজ্ঞাং সমুত্থায় মহীতলাৎ
সমীপোপস্থিতং রাজা সংজয়ং বাক্যমব্রবীৎ
7.4
ভ্রাতা মম সুহৃচ্চৈব সাক্ষাদ্ধর্ম ইবাপরঃ
তস্য স্মৃত্বাদ্য সুভৃশং হৃদয়ং দীর্যতীব মে
7.5
তমানয়স্ব ধর্মজ্ঞং মম ভ্রাতরমাশু বৈ
ইতি ব্রুবন্স নৃপতিঃ করুণং পর্যদেবয়ৎ
7.6
পশ্চাত্তাপাভিসংতপ্তো বিদুরস্মারকর্শিতঃ
ভ্রাতৃস্নেহাদিদং রাজন্সংজয়ং বাক্যমব্রবীৎ
7.7
গচ্ছ সংজয় জানীহি ভ্রাতরং বিদুরং মম
যদি জীবতি রোষেণ ময়া পাপেন নির্ধুতঃ
7.8
ন হি তেন মম ভ্রাত্রা সুসূক্ষ্মমপি কিংচন
ব্যলীকং কৃতপূর্বং মে প্রাজ্ঞেনামিতবুদ্ধিনা
7.9
স ব্যলীকং কথং প্রাপ্তো মত্তঃ পরমবুদ্ধিমান্
ন জহ্যাজ্জীবিতং প্রাজ্ঞস্তং গচ্ছানয় সংজয়
7.10
তস্য তদ্বচনং শ্রুত্বা রাজ্ঞস্তমনুমান্য চ
সংজয়ো বাঢমিত্যুক্ত্বা প্রাদ্রবত্কাম্যকং বনম্
7.11
সোঽচিরেণ সমাসাদ্য তদ্বনং যত্র পাণ্ডবাঃ
রৌরবাজিনসংবীতং দদর্শাথ যুধিষ্ঠিরম্
7.12
বিদুরেণ সহাসীনং ব্রাহ্মণৈশ্চ সহস্রশঃ
ভ্রাতৃভিশ্চাভিসংগুপ্তং দেবৈরিব শতক্রতুম্
7.13
যুধিষ্ঠিরমথাভ্যেত্য পূজয়ামাস সংজয়ঃ
ভীমার্জুনয়মাংশ্চাপি তদর্হং প্রত্যপদ্যত
7.14
রাজ্ঞা পৃষ্টঃ স কুশলং সুখাসীনশ্চ সংজয়ঃ
শশংসাগমনে হেতুমিদং চৈবাব্রবীদ্বচঃ
7.15
রাজা স্মরতি তে ক্ষত্তর্ধৃতরাষ্ট্রোঽম্বিকাসুতঃ
তং পশ্য গত্বা ত্বং ক্ষিপ্রং সংজীবয় চ পার্থিবম্
7.16
সোঽনুমান্য নরশ্রেষ্ঠান্পাণ্ডবান্কুরুনন্দনান্
নিয়োগাদ্রাজসিংহস্য গন্তুমর্হসি মানদ
7.17
এবমুক্তস্তু বিদুরো ধীমান্স্বজনবত্সলঃ
যুধিষ্ঠিরস্যানুমতে পুনরায়াদ্গজাহ্বয়ম্
7.18
তমব্রবীন্মহাপ্রাজ্ঞং ধৃতরাষ্ট্রঃ প্রতাপবান্
দিষ্ট্যা প্রাপ্তোঽসি ধর্মজ্ঞ দিষ্ট্যা স্মরসি মেঽনঘ
7.19
অদ্য রাত্রৌ দিবা চাহং ত্বত্কৃতে ভরতর্ষভ
প্রজাগরে প্রপশ্যামি বিচিত্রং দেহমাত্মনঃ
7.20
সোঽঙ্কমাদায় বিদুরং মূর্ধ্ন্যুপাঘ্রায় চৈব হ
ক্ষম্যতামিতি চোবাচ যদুক্তোঽসি ময়া রুষা
7.21
বিদুর উবাচ
ক্ষান্তমেব ময়া রাজন্গুরুর্নঃ পরমো ভবান্
তথা হ্যস্ম্যাগতঃ ক্ষিপ্রং ত্বদ্দর্শনপরায়ণঃ
7.22
ভবন্তি হি নরব্যাঘ্র পুরুষা ধর্মচেতসঃ
দীনাভিপাতিনো রাজন্নাত্র কার্যা বিচারণা
7.23
পাণ্ডোঃ সুতা যাদৃশা মে তাদৃশা মে সুতাস্তব
দীনা ইতি হি মে বুদ্ধিরভিপন্নাদ্য তান্প্রতি
7.24
বৈশংপায়ন উবাচ
অন্যোন্যমনুনীয়ৈবং ভ্রাতরৌ তৌ মহাদ্যুতী
বিদুরো ধৃতরাষ্ট্রশ্চ লেভাতে পরমাং মুদম্