অধ্যায় 6

6.1

বৈশংপায়ন উবাচ
পাণ্ডবাস্তু বনে বাসমুদ্দিশ্য ভরতর্ষভাঃ
প্রয়য়ুর্জাহ্নবীকূলাত্কুরুক্ষেত্রং সহানুগাঃ

সরস্বতীদৃষদ্বত্যৌ যমুনাং চ নিষেব্য তে
যয়ুর্বনেনৈব বনং সততং পশ্চিমাং দিশম্

ততঃ সরস্বতীকূলে সমেষু মরুধন্বসু
কাম্যকং নাম দদৃশুর্বনং মুনিজনপ্রিয়ম্

তত্র তে ন্যবসন্বীরা বনে বহুমৃগদ্বিজে
অন্বাস্যমানা মুনিভিঃ সান্ত্ব্যমানাশ্চ ভারত

বিদুরস্ত্বপি পাণ্ডূনাং তদা দর্শনলালসঃ
জগামৈকরথেনৈব কাম্যকং বনমৃদ্ধিমৎ

ততো যাত্বা বিদুরঃ কাননং ত;চ্ছীঘ্রৈরশ্বৈর্বাহিনা স্যন্দনেন
দদর্শাসীনং ধর্মরাজং বিবিক্তে; সার্ধং দ্রৌপদ্যা ভ্রাতৃভির্ব্রাহ্মণৈশ্চ

ততোঽপশ্যদ্বিদুরং তূর্ণমারা;দভ্যায়ান্তং সত্যসংধঃ স রাজা
অথাব্রবীদ্ভ্রাতরং ভীমসেনং; কিং নু ক্ষত্তা বক্ষ্যতি নঃ সমেত্য

কচ্চিন্নায়ং বচনাত্সৌবলস্য; সমাহ্বাতা দেবনায়োপয়াতি
কচ্চিত্ক্ষুদ্রঃ শকুনির্নায়ুধানি; জেষ্যত্যস্মান্পুনরেবাক্ষবত্যাম্

সমাহূতঃ কেনচিদাদ্রবেতি; নাহং শক্তো ভীমসেনাপয়াতুম্
গাণ্ডীবে বা সংশয়িতে কথংচি;দ্রাজ্যপ্রাপ্তিঃ সংশয়িতা ভবেন্নঃ

তত উত্থায় বিদুরং পাণ্ডবেয়াঃ; প্রত্যগৃহ্ণন্নৃপতে সর্ব এব
তৈঃ সত্কৃতঃ স চ তানাজমীঢো; যথোচিতং পাণ্ডুপুত্রান্সমেয়াৎ

সমাশ্বস্তং বিদুরং তে নরর্ষভা;স্ততোঽপৃচ্ছন্নাগমনায় হেতুম্
স চাপি তেভ্যো বিস্তরতঃ শশংস; যথাবৃত্তো ধৃতরাষ্ট্রোঽঽম্বিকেয়ঃ

বিদুর উবাচ
অবোচন্মাং ধৃতরাষ্ট্রোঽনুগুপ্ত;মজাতশত্রো পরিগৃহ্যাভিপূজ্য
এবং গতে সমতামভ্যুপেত্য; পথ্যং তেষাং মম চৈব ব্রবীহি

ময়াপ্যুক্তং যত্ক্ষমং কৌরবাণাং; হিতং পথ্যং ধৃতরাষ্ট্রস্য চৈব
তদ্বৈ পথ্যং তন্মনো নাভ্যুপৈতি; ততশ্চাহং ক্ষমমন্যন্ন মন্যে

পরং শ্রেয়ঃ পাণ্ডবেয়া ময়োক্তং; ন মে তচ্চ শ্রুতবানাম্বিকেয়ঃ
যথাতুরস্যেব হি পথ্যমন্নং; ন রোচতে স্মাস্য তদুচ্যমানম্

ন শ্রেয়সে নীয়তেঽজাতশত্রো; স্ত্রী শ্রোত্রিয়স্যেব গৃহে প্রদুষ্টা
ব্রুবন্ন রুচ্যৈ ভরতর্ষভস্য; পতিঃ কুমার্যা ইব ষষ্টিবর্ষঃ

ধ্রুবং বিনাশো নৃপ কৌরবাণাং; ন বৈ শ্রেয়ো ধৃতরাষ্ট্রঃ পরৈতি
যথা পর্ণে পুষ্করস্যেব সিক্তং; জলং ন তিষ্ঠেত্পথ্যমুক্তং তথাস্মিন্

ততঃ ক্রুদ্ধো ধৃতরাষ্ট্রোঽব্রবীন্মাং; যত্র শ্রদ্ধা ভারত তত্র যাহি
নাহং ভূয়ঃ কাময়ে ত্বাং সহায়ং; মহীমিমাং পালয়িতুং পুরং বা

সোঽহং ত্যক্তো ধৃতরাষ্ট্রেণ রাজং;স্ত্বাং শাসিতুমুপয়াতস্ত্বরাবান্
তদ্বৈ সর্বং যন্ময়োক্তং সভায়াং; তদ্ধার্যতাং যত্প্রবক্ষ্যামি ভূয়ঃ

ক্লেশৈস্তীব্রৈর্যুজ্যমানঃ সপত্নৈঃ; ক্ষমাং কুর্বন্কালমুপাসতে যঃ
সং বর্ধয়ন্স্তোকমিবাগ্নিমাত্মবা;ন্স বৈ ভুঙ্ক্তে পৃথিবীমেক এব

যস্যাবিভক্তং বসু রাজন্সহায়ৈ;স্তস্য দুঃখেঽপ্যংশভাজঃ সহায়াঃ
সহায়ানামেষ সংগ্রহণেঽভ্যুপায়ঃ; সহায়াপ্তৌ পৃথিবীপ্রাপ্তিমাহুঃ

সত্যং শ্রেষ্ঠং পাণ্ডব নিষ্প্রলাপং; তুল্যং চান্নং সহ ভোজ্যং সহায়ৈঃ
আত্মা চৈষামগ্রতো নাতিবর্তে;দেবংবৃত্তির্বর্ধতে ভূমিপালঃ

যুধিষ্ঠির উবাচ
এবং করিষ্যামি যথা ব্রবীষি; পরাং বুদ্ধিমুপগম্যাপ্রমত্তঃ
যচ্চাপ্যন্যদ্দেশকালোপপন্নং; তদ্বৈ বাচ্যং তত্করিষ্যামি কৃত্স্নম্