Utshovঅধ্যায় 5
5.1
বৈশংপায়ন উবাচ
বনং প্রবিষ্টেষ্বথ পাণ্ডবেষু; প্রজ্ঞাচক্ষুস্তপ্যমানোঽম্বিকেয়ঃ
ধর্মাত্মানং বিদুরমগাধবুদ্ধিং; সুখাসীনো বাক্যমুবাচ রাজা
5.2
প্রজ্ঞা চ তে ভার্গবস্যেব শুদ্ধা; ধর্মং চ ত্বং পরমং বেত্থ সূক্ষ্মম্
সমশ্চ ত্বং সংমতঃ কৌরবাণাং; পথ্যং চৈষাং মম চৈব ব্রবীহি
5.3
এবং গতে বিদুর যদদ্য কার্যং; পৌরাশ্চেমে কথমস্মান্ভজেরন্
তে চাপ্যস্মান্নোদ্ধরেয়ুঃ সমূলা;ন্ন কাময়ে তাংশ্চ বিনশ্যমানান্
5.4
বিদুর উবাচ
ত্রিবর্গোঽয়ং ধর্মমূলো নরেন্দ্র; রাজ্যং চেদং ধর্মমূলং বদন্তি
ধর্মে রাজন্বর্তমানঃ স্বশক্ত্যা; পুত্রান্সর্বান্পাহি কুন্তীসুতাংশ্চ
5.5
স বৈ ধর্মো বিপ্রলুপ্তঃ সভায়াং; পাপাত্মভিঃ সৌবলেয়প্রধানৈঃ
আহূয় কুন্তীসুতমক্ষবত্যাং; পরাজৈষীত্সত্যসংধং সুতস্তে
5.6
এতস্য তে দুষ্প্রণীতস্য রাজ;ঞ্শেষস্যাহং পরিপশ্যাম্যুপায়ম্
যথা পুত্রস্তব কৌরব্য পাপা;ন্মুক্তো লোকে প্রতিতিষ্ঠেত সাধু
5.7
তদ্বৈ সর্বং পাণ্ডুপুত্রা লভন্তাং; যত্তদ্রাজন্নতিসৃষ্টং ত্বয়াসীৎ
এষ ধর্মঃ পরমো যত্স্বকেন; রাজা তুষ্যেন্ন পরস্বেষু গৃধ্যেৎ
5.8
এতত্কার্যং তব সর্বপ্রধানং; তেষাং তুষ্টিঃ শকুনেশ্চাবমানঃ
এবং শেষং যদি পুত্রেষু তে স্যা;দেতদ্রাজংস্ত্বরমাণঃ কুরুষ্ব
5.9
অথৈতদেবং ন করোষি রাজ;ন্ধ্রুবং কুরূণাং ভবিতা বিনাশঃ
ন হি ক্রুদ্ধো ভীমসেনোঽর্জুনো বা; শেষং কুর্যাচ্ছাত্রবাণামনীকে
5.10
যেষাং যোদ্ধা সব্যসাচী কৃতাস্ত্রো; ধনুর্যেষাং গাণ্ডিবং লোকসারম্
যেষাং ভীমো বাহুশালী চ যোদ্ধা; তেষাং লোকে কিং নু ন প্রাপ্যমস্তি
5.11
উক্তং পূর্বং জাতমাত্রে সুতে তে; ময়া যত্তে হিতমাসীত্তদানীম্
পুত্রং ত্যজেমমহিতং কুলস্যে;ত্যেতদ্রাজন্ন চ তত্ত্বং চকর্থ
ইদানীং তে হিতমুক্তং ন চেত্ত্বং; কর্তাসি রাজন্পরিতপ্তাসি পশ্চাৎ
5.12
যদ্যেতদেবমনুমন্তা সুতস্তে; সংপ্রীয়মাণঃ পাণ্ডবৈরেকরাজ্যম্
তাপো ন তে বৈ ভবিতা প্রীতিয়োগা;ত্ত্বং চেন্ন গৃহ্ণাসি সুতং সহায়ৈঃ
অথাপরো ভবতি হি তং নিগৃহ্য; পাণ্ডোঃ পুত্রং প্রকুরুষ্বাধিপত্যে
5.13
অজাতশত্রুর্হি বিমুক্তরাগো; ধর্মেণেমাং পৃথিবীং শাস্তু রাজন্
ততো রাজন্পার্থিবাঃ সর্ব এব; বৈশ্যা ইবাস্মানুপতিষ্ঠন্তু সদ্যঃ
5.14
দুর্যোধনঃ শকুনিঃ সূতপুত্রঃ; প্রীত্যা রাজন্পাণ্ডুপুত্রান্ভজন্তাম্
দুঃশাসনো যাচতু ভীমসেনং; সভামধ্যে দ্রুপদস্যাত্মজাং চ
5.15
যুধিষ্ঠিরং ত্বং পরিসান্ত্বয়স্ব; রাজ্যে চৈনং স্থাপয়স্বাভিপূজ্য
ত্বয়া পৃষ্টঃ কিমহমন্যদ্বদেয়;মেতত্কৃত্বা কৃতকৃত্যোঽসি রাজন্
5.16
ধৃতরাষ্ট্র উবাচ
এতদ্বাক্যং বিদুর যত্তে সভায়া;মিহ প্রোক্তং পাণ্ডবান্প্রাপ্য মাং চ
হিতং তেষামহিতং মামকানা;মেতত্সর্বং মম নোপৈতি চেতঃ
5.17
ইদং ত্বিদানীং কুত এব নিশ্চিতং; তেষামর্থে পাণ্ডবানাং যদাত্থ
তেনাদ্য মন্যে নাসি হিতো মমেতি; কথং হি পুত্রং পাণ্ডবার্থে ত্যজেয়ম্
5.18
অসংশয়ং তেঽপি মমৈব পুত্রা; দুর্যোধনস্তু মম দেহাত্প্রসূতঃ
স্বং বৈ দেহং পরহেতোস্ত্যজেতি; কো নু ব্রূয়াত্সমতামন্ববেক্ষন্
5.19
স মা জিহ্মং বিদুর সর্বং ব্রবীষি; মানং চ তেঽহমধিকং ধারয়ামি
যথেচ্ছকং গচ্ছ বা তিষ্ঠ বা ত্বং; সুসান্ত্ব্যমানাপ্যসতী স্ত্রী জহাতি
5.20
বৈশংপায়ন উবাচ
এতাবদুক্ত্বা ধৃতরাষ্ট্রোঽন্বপদ্য;দন্তর্বেশ্ম সহসোত্থায় রাজন্
নেদমস্তীত্যথ বিদুরো ভাষমাণঃ; সংপ্রাদ্রবদ্যত্র পার্থা বভূবুঃ