অধ্যায় 4

4.1

বৈশংপায়ন উবাচ
ততো দিবাকরঃ প্রীতো দর্শয়ামাস পাণ্ডবম্
দীপ্যমানঃ স্ববপুষা জ্বলন্নিব হুতাশনঃ

যত্তেঽভিলষিতং রাজন্সর্বমেতদবাপ্স্যসি
অহমন্নং প্রদাস্যামি সপ্ত পঞ্চ চ তে সমাঃ

ফলমূলামিষং শাকং সংস্কৃতং যন্মহানসে
চতুর্বিধং তদন্নাদ্যমক্ষয্যং তে ভবিষ্যতি
ধনং চ বিবিধং তুভ্যমিত্যুক্ত্বান্তরধীয়ত

লব্ধ্বা বরং তু কৌন্তেয়ো জলাদুত্তীর্য ধর্মবিৎ
জগ্রাহ পাদৌ ধৌম্যস্য ভ্রাতৄংশ্চাস্বজতাচ্যুতঃ

দ্রৌপদ্যা সহ সংগম্য পশ্যমানোঽভ্যয়াত্প্রভুঃ
মহানসে তদান্নং তু সাধয়ামাস পাণ্ডবঃ

সংস্কৃতং প্রসবং যাতি বন্যমন্নং চতুর্বিধম্
অক্ষয্যং বর্ধতে চান্নং তেন ভোজয়তে দ্বিজান্

ভুক্তবত্সু চ বিপ্রেষু ভোজয়িত্বানুজানপি
শেষং বিঘসসংজ্ঞং তু পশ্চাদ্ভুঙ্ক্তে যুধিষ্ঠিরঃ
যুধিষ্ঠিরং ভোজয়িত্বা শেষমশ্নাতি পার্ষতী

এবং দিবাকরাত্প্রাপ্য দিবাকরসমদ্যুতিঃ
কামান্মনোঽভিলষিতান্ব্রাহ্মণেভ্যো দদৌ প্রভুঃ

পুরোহিতপুরোগাশ্চ তিথিনক্ষত্রপর্বসু
যজ্ঞিয়ার্থাঃ প্রবর্তন্তে বিধিমন্ত্রপ্রমাণতঃ

ততঃ কৃতস্বস্ত্যয়না ধৌম্যেন সহ পাণ্ডবাঃ
দ্বিজসংঘৈঃ পরিবৃতাঃ প্রয়য়ুঃ কাম্যকং বনম্