UtshovChapter 26
26.1
वैशंपायन उवाच
तत्काननं प्राप्य नरेन्द्रपुत्राः; सुखोचिता वासमुपेत्य कृच्छ्रम्
विजह्रुरिन्द्रप्रतिमाः शिवेषु; सरस्वतीशालवनेषु तेषु
Vaishampayana uvacha
Tatkananam prapya narendraputrah; sukhochita vasamupetya krichchhram
Vijahrurindrapratimah shiveshu; sarasvatishalavaneshu teshu
26.2
यतींश्च सर्वान्स मुनींश्च राजा; तस्मिन्वने मूलफलैरुदग्रैः
द्विजातिमुख्यानृषभः कुरूणां; संतर्पयामास महानुभावः
Yatinshcha sarvansa muninshcha raja; tasminvane mulaphalairudagraih
Dvijatimukhyanrishabhah kurunam; santarpayamasa mahanubhavah
26.3
इष्टीश्च पित्र्याणि तथाग्रियाणि; महावने वसतां पाण्डवानाम्
पुरोहितः सर्वसमृद्धतेजा;श्चकार धौम्यः पितृवत्कुरूणाम्
Ishtishcha pitryani tathagriyani; mahavane vasatam pandavanam
Purohitah sarvasamriddhateja;shchakara dhaumyah pitrivatkurunam
26.4
अपेत्य राष्ट्राद्वसतां तु तेषा;मृषिः पुराणोऽतिथिराजगाम
तमाश्रमं तीव्रसमृद्धतेजा; मार्कण्डेयः श्रीमतां पाण्डवानाम्
Apetya rashtradvasatam tu tesha;mrishih puranotithirajagama
Tamashramam tivrasamriddhateja; markandeyah shrimatam pandavanam
26.5
स सर्वविद्द्रौपदीं प्रेक्ष्य कृष्णां; युधिष्ठिरं भीमसेनार्जुनौ च
संस्मृत्य रामं मनसा महात्मा; तपस्विमध्येऽस्मयतामितौजाः
Sa sarvaviddraupadim prekshya krishnam; yudhishthiram bhimasenarjunau cha
Sansmritya ramam manasa mahatma; tapasvimadhyesmayatamitaujah
26.6
तं धर्मराजो विमना इवाब्रवी;त्सर्वे ह्रिया सन्ति तपस्विनोऽमी
भवानिदं किं स्मयतीव हृष्ट;स्तपस्विनां पश्यतां मामुदीक्ष्य
Tam dharmarajo vimana ivabravi;tsarve hriya santi tapasvinomi
Bhavanidam kim smayativa hrishta;stapasvinam pashyatam mamudikshya
26.7
मार्कण्डेय उवाच
न तात हृष्यामि न च स्मयामि; प्रहर्षजो मां भजते न दर्पः
तवापदं त्वद्य समीक्ष्य रामं; सत्यव्रतं दाशरथिं स्मरामि
Markandeya uvacha
Na tata hrishyami na cha smayami; praharshajo mam bhajate na darpah
Tavapadam tvadya samikshya ramam; satyavratam dasharathim smarami
26.8
स चापि राजा सह लक्ष्मणेन; वने निवासं पितुरेव शासनात्
धन्वी चरन्पार्थ पुरा मयैव; दृष्टो गिरेरृष्यमूकस्य सानौ
Sa chapi raja saha lakshmanena; vane nivasam pitureva shasanat
Dhanvi charanpartha pura mayaiva; drishto girerrishyamukasya sanau
26.9
सहस्रनेत्रप्रतिमो महात्मा; मयस्य जेत नमुचेश्च हन्ता
पितुर्निदेशादनघः स्वधर्मं; वने वासं दाशरथिश्चकार
Sahasranetrapratimo mahatma; mayasya jeta namucheshcha hanta
Piturnideshadanaghah svadharmam; vane vasam dasharathishchakara
26.10
स चापि शक्रस्य समप्रभावो; महानुभावः समरेष्वजेयः
विहाय भोगानचरद्वनेषु; नेशे बलस्येति चरेदधर्मम्
Sa chapi shakrasya samaprabhavo; mahanubhavah samareshvajeyah
Vihaya bhoganacharadvaneshu; neshe balasyeti charedadharmam
26.11
नृपाश्च नाभागभगीरथादयो; महीमिमां सागरान्तां विजित्य
सत्येन तेऽप्यजयंस्तात लोका;न्नेशे बलस्येति चरेदधर्मम्
Nripashcha nabhagabhagirathadayo; mahimimam sagarantam vijitya
Satyena tepyajayanstata loka;nneshe balasyeti charedadharmam
26.12
अलर्कमाहुर्नरवर्य सन्तं; सत्यव्रतं काशिकरूषराजम्
विहाय राष्ट्राणि वसूनि चैव; नेशे बलस्येति चरेदधर्मम्
Alarkamahurnaravarya santam; satyavratam kashikarusharajam
Vihaya rashtrani vasuni chaiva; neshe balasyeti charedadharmam
26.13
धात्रा विधिर्यो विहितः पुराण;स्तं पूजयन्तो नरवर्य सन्तः
सप्तर्षयः पार्थ दिवि प्रभान्ति; नेशे बलस्येति चरेदधर्मम्
Dhatra vidhiryo vihitah purana;stam pujayanto naravarya santah
Saptarshayah partha divi prabhanti; neshe balasyeti charedadharmam
26.14
महाबलान्पर्वतकूटमात्रा;न्विषाणिनः पश्य गजान्नरेन्द्र
स्थितान्निदेशे नरवर्य धातु;र्नेशे बलस्येति चरेदधर्मम्
Mahabalanparvatakutamatra;nvishaninah pashya gajannarendra
Sthitannideshe naravarya dhatu;rneshe balasyeti charedadharmam
26.15
सर्वाणि भूतानि नरेन्द्र पश्य; यथा यथावद्विहितं विधात्रा
स्वयोनितस्तत्कुरुते प्रभावा;न्नेशे बलस्येति चरेदधर्मम्
Sarvani bhutani narendra pashya; yatha yathavadvihitam vidhatra
Svayonitastatkurute prabhava;nneshe balasyeti charedadharmam
26.16
सत्येन धर्मेण यथार्हवृत्त्या; ह्रिया तथा सर्वभूतान्यतीत्य
यशश्च तेजश्च तवापि दीप्तं; विभावसोर्भास्करस्येव पार्थ
Satyena dharmena yatharhavrittya; hriya tatha sarvabhutanyatitya
Yashashcha tejashcha tavapi diptam; vibhavasorbhaskarasyeva partha
26.17
यथाप्रतिज्ञं च महानुभाव; कृच्छ्रं वने वासमिमं निरुष्य
ततः श्रियं तेजसा स्वेन दीप्ता;मादास्यसे पार्थिव कौरवेभ्यः
Yathapratigyam cha mahanubhava; krichchhram vane vasamimam nirushya
Tatah shriyam tejasa svena dipta;madasyase parthiva kauravebhyah
26.18
वैशंपायन उवाच
तमेवमुक्त्वा वचनं महर्षि;स्तपस्विमध्ये सहितं सुहृद्भिः
आमन्त्र्य धौम्यं सहितांश्च पार्थां;स्ततः प्रतस्थे दिशमुत्तरां सः
Vaishampayana uvacha
Tamevamuktva vachanam maharshi;stapasvimadhye sahitam suhridbhih
Amantrya dhaumyam sahitanshcha partham;statah pratasthe dishamuttaram sah