UtshovChapter 61
61.1
बृहदश्व उवाच
सा निहत्य मृगव्याधं प्रतस्थे कमलेक्षणा
वनं प्रतिभयं शून्यं झिल्लिकागणनादितम्
Brihadashva uvacha
Sa nihatya mrigavyadham pratasthe kamalekshana
Vanam pratibhayam shunyam jhillikagananaditam
61.2
सिंहव्याघ्रवराहर्क्षरुरुद्वीपिनिषेवितम्
नानापक्षिगणाकीर्णं म्लेच्छतस्करसेवितम्
Sinhavyaghravaraharksharurudvipinishevitam
Nanapakshiganakirnam mlechchhataskarasevitam
61.3
शालवेणुधवाश्वत्थतिन्दुकेङ्गुदकिंशुकैः
अर्जुनारिष्टसंछन्नं चन्दनैश्च सशाल्मलैः
Shalavenudhavashvatthatindukengudakinshukaih
Arjunarishtasanchhannam chandanaishcha sashalmalaih
61.4
जम्ब्वाम्रलोध्रखदिरशाकवेत्रसमाकुलम्
काश्मर्यामलकप्लक्षकदम्बोदुम्बरावृतम्
Jambvamralodhrakhadirashakavetrasamakulam
Kashmaryamalakaplakshakadambodumbaravritam
61.5
बदरीबिल्वसंछन्नं न्यग्रोधैश्च समाकुलम्
प्रियालतालखर्जूरहरीतकबिभीतकैः
Badaribilvasanchhannam nyagrodhaishcha samakulam
Priyalatalakharjuraharitakabibhitakaih
61.6
नानाधातुशतैर्नद्धान्विविधानपि चाचलान्
निकुञ्जान्पक्षिसंघुष्टान्दरीश्चाद्भुतदर्शनाः
नदीः सरांसि वापीश्च विविधांश्च मृगद्विजान्
Nanadhatushatairnaddhanvividhanapi chachalan
Nikunjanpakshisanghushtandarishchadbhutadarshanah
Nadih saransi vapishcha vividhanshcha mrigadvijan
61.7
सा बहून्भीमरूपांश्च पिशाचोरगराक्षसान्
पल्वलानि तडागानि गिरिकूटानि सर्वशः
सरितः सागरांश्चैव ददर्शाद्भुतदर्शनान्
Sa bahunbhimarupanshcha pishachoragarakshasan
Palvalani tadagani girikutani sarvashah
Saritah sagaranshchaiva dadarshadbhutadarshanan
61.8
यूथशो ददृशे चात्र विदर्भाधिपनन्दिनी
महिषान्वराहान्गोमायूनृक्षवानरपन्नगान्
Yuthasho dadrishe chatra vidarbhadhipanandini
Mahishanvarahangomayunrikshavanarapannagan
61.9
तेजसा यशसा स्थित्या श्रिया च परया युता
वैदर्भी विचरत्येका नलमन्वेषती तदा
Tejasa yashasa sthitya shriya cha paraya yuta
Vaidarbhi vicharatyeka nalamanveshati tada
61.10
नाबिभ्यत्सा नृपसुता भैमी तत्राथ कस्यचित्
दारुणामटवीं प्राप्य भर्तृव्यसनकर्शिता
Nabibhyatsa nripasuta bhaimi tatratha kasyachit
Darunamatavim prapya bhartrivyasanakarshita
61.11
विदर्भतनया राजन्विललाप सुदुःखिता
भर्तृशोकपरीताङ्गी शिलातलसमाश्रिता
Vidarbhatanaya rajanvilalapa suduhkhita
Bhartrishokaparitangi shilatalasamashrita
61.12
दमयन्त्युवाच
सिंहोरस्क महाबाहो निषधानां जनाधिप
क्व नु राजन्गतोऽसीह त्यक्त्वा मां निर्जने वने
Damayantyuvacha
Sinhoraska mahabaho nishadhanam janadhipa
Kva nu rajangatosiha tyaktva mam nirjane vane
61.13
अश्वमेधादिभिर्वीर क्रतुभिः स्वाप्तदक्षिणैः
कथमिष्ट्वा नरव्याघ्र मयि मिथ्या प्रवर्तसे
Ashvamedhadibhirvira kratubhih svaptadakshinaih
Kathamishtva naravyaghra mayi mithya pravartase
61.14
यत्त्वयोक्तं नरव्याघ्र मत्समक्षं महाद्युते
कर्तुमर्हसि कल्याण तदृतं पार्थिवर्षभ
Yattvayoktam naravyaghra matsamaksham mahadyute
Kartumarhasi kalyana tadritam parthivarshabha
61.15
यथोक्तं विहगैर्हंसैः समीपे तव भूमिप
मत्सकाशे च तैरुक्तं तदवेक्षितुमर्हसि
Yathoktam vihagairhansaih samipe tava bhumipa
Matsakashe cha tairuktam tadavekshitumarhasi
61.16
चत्वार एकतो वेदाः साङ्गोपाङ्गाः सविस्तराः
स्वधीता मानवश्रेष्ठ सत्यमेकं किलैकतः
Chatvara ekato vedah sangopangah savistarah
Svadhita manavashreshtha satyamekam kilaikatah
61.17
तस्मादर्हसि शत्रुघ्न सत्यं कर्तुं नरेश्वर
उक्तवानसि यद्वीर मत्सकाशे पुरा वचः
Tasmadarhasi shatrughna satyam kartum nareshvara
Uktavanasi yadvira matsakashe pura vachah
61.18
हा वीर ननु नामाहमिष्टा किल तवानघ
अस्यामटव्यां घोरायां किं मां न प्रतिभाषसे
Ha vira nanu namahamishta kila tavanagha
Asyamatavyam ghorayam kim mam na pratibhashase
61.19
भर्त्सयत्येष मां रौद्रो व्यात्तास्यो दारुणाकृतिः
अरण्यराट्क्षुधाविष्टः किं मां न त्रातुमर्हसि
Bhartsayatyesha mam raudro vyattasyo darunakritih
Aranyaratkshudhavishtah kim mam na tratumarhasi
61.20
न मे त्वदन्या सुभगे प्रिया इत्यब्रवीस्तदा
तामृतां कुरु कल्याण पुरोक्तां भारतीं नृप
Na me tvadanya subhage priya ityabravistada
Tamritam kuru kalyana puroktam bharatim nripa
61.21
उन्मत्तां विलपन्तीं मां भार्यामिष्टां नराधिप
ईप्सितामीप्सितो नाथ किं मां न प्रतिभाषसे
Unmattam vilapantim mam bharyamishtam naradhipa
Ipsitamipsito natha kim mam na pratibhashase
61.22
कृशां दीनां विवर्णां च मलिनां वसुधाधिप
वस्त्रार्धप्रावृतामेकां विलपन्तीमनाथवत्
Krisham dinam vivarnam cha malinam vasudhadhipa
Vastrardhapravritamekam vilapantimanathavat
61.23
यूथभ्रष्टामिवैकां मां हरिणीं पृथुलोचन
न मानयसि मानार्ह रुदतीमरिकर्शन
Yuthabhrashtamivaikam mam harinim prithulochana
Na manayasi manarha rudatimarikarshana
61.24
महाराज महारण्ये मामिहैकाकिनीं सतीम्
आभाषमाणां स्वां पत्नीं किं मां न प्रतिभाषसे
Maharaja maharanye mamihaikakinim satim
Abhashamanam svam patnim kim mam na pratibhashase
61.25
कुलशीलोपसंपन्नं चारुसर्वाङ्गशोभनम्
नाद्य त्वामनुपश्यामि गिरावस्मिन्नरोत्तम
वने चास्मिन्महाघोरे सिंहव्याघ्रनिषेविते
Kulashilopasampannam charusarvangashobhanam
Nadya tvamanupashyami giravasminnarottama
Vane chasminmahaghore sinhavyaghranishevite
61.26
शयानमुपविष्टं वा स्थितं वा निषधाधिप
प्रस्थितं वा नरश्रेष्ठ मम शोकविवर्धन
Shayanamupavishtam va sthitam va nishadhadhipa
Prasthitam va narashreshtha mama shokavivardhana
61.27
कं नु पृच्छामि दुःखार्ता त्वदर्थे शोककर्शिता
कच्चिद्दृष्टस्त्वयारण्ये संगत्येह नलो नृपः
Kam nu prichchhami duhkharta tvadarthe shokakarshita
Kachchiddrishtastvayaranye sangatyeha nalo nripah
61.28
को नु मे कथयेदद्य वनेऽस्मिन्विष्ठितं नलम्
अभिरूपं महात्मानं परव्यूहविनाशनम्
Ko nu me kathayedadya vanesminvishthitam nalam
Abhirupam mahatmanam paravyuhavinashanam
61.29
यमन्वेषसि राजानं नलं पद्मनिभेक्षणम्
अयं स इति कस्याद्य श्रोष्यामि मधुरां गिरम्
Yamanveshasi rajanam nalam padmanibhekshanam
Ayam sa iti kasyadya shroshyami madhuram giram
61.30
अरण्यराडयं श्रीमांश्चतुर्दंष्ट्रो महाहनुः
शार्दूलोऽभिमुखः प्रैति पृच्छाम्येनमशङ्किता
Aranyaradayam shrimanshchaturdanshtro mahahanuh
Shardulobhimukhah praiti prichchhamyenamashankita
61.31
भवान्मृगाणामधिपस्त्वमस्मिन्कानने प्रभुः
विदर्भराजतनयां दमयन्तीति विद्धि माम्
Bhavanmriganamadhipastvamasminkanane prabhuh
Vidarbharajatanayam damayantiti viddhi mam
61.32
निषधाधिपतेर्भार्यां नलस्यामित्रघातिनः
पतिमन्वेषतीमेकां कृपणां शोककर्शिताम्
आश्वासय मृगेन्द्रेह यदि दृष्टस्त्वया नलः
Nishadhadhipaterbharyam nalasyamitraghatinah
Patimanveshatimekam kripanam shokakarshitam
Ashvasaya mrigendreha yadi drishtastvaya nalah
61.33
अथ वारण्यनृपते नलं यदि न शंससि
मामदस्व मृगश्रेष्ठ विशोकां कुरु दुःखिताम्
Atha varanyanripate nalam yadi na shansasi
Mamadasva mrigashreshtha vishokam kuru duhkhitam
61.34
श्रुत्वारण्ये विलपितं ममैष मृगराट्स्वयम्
यात्येतां मृष्टसलिलामापगां सागरंगमाम्
Shrutvaranye vilapitam mamaisha mrigaratsvayam
Yatyetam mrishtasalilamapagam sagarangamam
61.35
इमं शिलोच्चयं पुण्यं शृङ्गैर्बहुभिरुच्छ्रितैः
विराजद्भिर्दिवस्पृग्भिर्नैकवर्णैर्मनोरमैः
Imam shilochchayam punyam shringairbahubhiruchchhritaih
Virajadbhirdivasprigbhirnaikavarnairmanoramaih
61.36
नानाधातुसमाकीर्णं विविधोपलभूषितम्
अस्यारण्यस्य महतः केतुभूतमिवोच्छ्रितम्
Nanadhatusamakirnam vividhopalabhushitam
Asyaranyasya mahatah ketubhutamivochchhritam
61.37
सिंहशार्दूलमातङ्गवराहर्क्षमृगायुतम्
पतत्रिभिर्बहुविधैः समन्तादनुनादितम्
Sinhashardulamatangavaraharkshamrigayutam
Patatribhirbahuvidhaih samantadanunaditam
61.38
किंशुकाशोकबकुलपुंनागैरुपशोभितम्
सरिद्भिः सविहंगाभिः शिखरैश्चोपशोभितम्
गिरिराजमिमं तावत्पृच्छामि नृपतिं प्रति
Kinshukashokabakulapunnagairupashobhitam
Saridbhih savihangabhih shikharaishchopashobhitam
Girirajamimam tavatprichchhami nripatim prati
61.39
भगवन्नचलश्रेष्ठ दिव्यदर्शन विश्रुत
शरण्य बहुकल्याण नमस्तेऽस्तु महीधर
Bhagavannachalashreshtha divyadarshana vishruta
Sharanya bahukalyana namastestu mahidhara
61.40
प्रणमे त्वाभिगम्याहं राजपुत्रीं निबोध माम्
राज्ञः स्नुषां राजभार्यां दमयन्तीति विश्रुताम्
Praname tvabhigamyaham rajaputrim nibodha mam
Ragyah snusham rajabharyam damayantiti vishrutam
61.41
राजा विदर्भाधिपतिः पिता मम महारथः
भीमो नाम क्षितिपतिश्चातुर्वर्ण्यस्य रक्षिता
Raja vidarbhadhipatih pita mama maharathah
Bhimo nama kshitipatishchaturvarnyasya rakshita
61.42
राजसूयाश्वमेधानां क्रतूनां दक्षिणावताम्
आहर्ता पार्थिवश्रेष्ठः पृथुचार्वञ्चितेक्षणः
Rajasuyashvamedhanam kratunam dakshinavatam
Aharta parthivashreshthah prithucharvanchitekshanah
61.43
ब्रह्मण्यः साधुवृत्तश्च सत्यवागनसूयकः
शीलवान्सुसमाचारः पृथुश्रीर्धर्मविच्छुचिः
Brahmanyah sadhuvrittashcha satyavaganasuyakah
Shilavansusamacharah prithushrirdharmavichchhuchih
61.44
सम्यग्गोप्ता विदर्भाणां निर्जितारिगणः प्रभुः
तस्य मां विद्धि तनयां भगवंस्त्वामुपस्थिताम्
Samyaggopta vidarbhanam nirjitariganah prabhuh
Tasya mam viddhi tanayam bhagavanstvamupasthitam
61.45
निषधेषु महाशैल श्वशुरो मे नृपोत्तमः
सुगृहीतनामा विख्यातो वीरसेन इति स्म ह
Nishadheshu mahashaila shvashuro me nripottamah
Sugrihitanama vikhyato virasena iti sma ha
61.46
तस्य राज्ञः सुतो वीरः श्रीमान्सत्यपराक्रमः
क्रमप्राप्तं पितुः स्वं यो राज्यं समनुशास्ति ह
Tasya ragyah suto virah shrimansatyaparakramah
Kramapraptam pituh svam yo rajyam samanushasti ha
61.47
नलो नामारिदमनः पुण्यश्लोक इति श्रुतः
ब्रह्मण्यो वेदविद्वाग्मी पुण्यकृत्सोमपोऽग्निचित्
Nalo namaridamanah punyashloka iti shrutah
Brahmanyo vedavidvagmi punyakritsomapognichit
61.48
यष्टा दाता च योद्धा च सम्यक्चैव प्रशासिता
तस्य मामचलश्रेष्ठ विद्धि भार्यामिहागताम्
Yashta data cha yoddha cha samyakchaiva prashasita
Tasya mamachalashreshtha viddhi bharyamihagatam
61.49
त्यक्तश्रियं भर्तृहीनामनाथां व्यसनान्विताम्
अन्वेषमाणां भर्तारं तं वै नरवरोत्तमम्
Tyaktashriyam bhartrihinamanatham vyasananvitam
Anveshamanam bhartaram tam vai naravarottamam
61.50
खमुल्लिखद्भिरेतैर्हि त्वया शृङ्गशतैर्नृपः
कच्चिद्दृष्टोऽचलश्रेष्ठ वनेऽस्मिन्दारुणे नलः
Khamullikhadbhiretairhi tvaya shringashatairnripah
Kachchiddrishtochalashreshtha vanesmindarune nalah
61.51
गजेन्द्रविक्रमो धीमान्दीर्घबाहुरमर्षणः
विक्रान्तः सत्यवाग्धीरो भर्ता मम महायशाः
निषधानामधिपतिः कच्चिद्दृष्टस्त्वया नलः
Gajendravikramo dhimandirghabahuramarshanah
Vikrantah satyavagdhiro bharta mama mahayashah
Nishadhanamadhipatih kachchiddrishtastvaya nalah
61.52
किं मां विलपतीमेकां पर्वतश्रेष्ठ दुःखिताम्
गिरा नाश्वासयस्यद्य स्वां सुतामिव दुःखिताम्
Kim mam vilapatimekam parvatashreshtha duhkhitam
Gira nashvasayasyadya svam sutamiva duhkhitam
61.53
वीर विक्रान्त धर्मज्ञ सत्यसंध महीपते
यद्यस्यस्मिन्वने राजन्दर्शयात्मानमात्मना
Vira vikranta dharmagya satyasandha mahipate
Yadyasyasminvane rajandarshayatmanamatmana
61.54
कदा नु स्निग्धगम्भीरां जीमूतस्वनसंनिभाम्
श्रोष्यामि नैषधस्याहं वाचं ताममृतोपमाम्
Kada nu snigdhagambhiram jimutasvanasannibham
Shroshyami naishadhasyaham vacham tamamritopamam
61.55
वैदर्भीत्येव कथितां शुभां राज्ञो महात्मनः
आम्नायसारिणीमृद्धां मम शोकनिबर्हिणीम्
Vaidarbhityeva kathitam shubham ragyo mahatmanah
Amnayasarinimriddham mama shokanibarhinim
61.56
इति सा तं गिरिश्रेष्ठमुक्त्वा पार्थिवनन्दिनी
दमयन्ती ततो भूयो जगाम दिशमुत्तराम्
Iti sa tam girishreshthamuktva parthivanandini
Damayanti tato bhuyo jagama dishamuttaram
61.57
सा गत्वा त्रीनहोरात्रान्ददर्श परमाङ्गना
तापसारण्यमतुलं दिव्यकाननदर्शनम्
Sa gatva trinahoratrandadarsha paramangana
Tapasaranyamatulam divyakananadarshanam
61.58
वसिष्ठभृग्वत्रिसमैस्तापसैरुपशोभितम्
नियतैः संयताहारैर्दमशौचसमन्वितैः
Vasishthabhrigvatrisamaistapasairupashobhitam
Niyataih sanyataharairdamashauchasamanvitaih
61.59
अब्भक्षैर्वायुभक्षैश्च पत्राहारैस्तथैव च
जितेन्द्रियैर्महाभागैः स्वर्गमार्गदिदृक्षुभिः
Abbhakshairvayubhakshaishcha patraharaistathaiva cha
Jitendriyairmahabhagaih svargamargadidrikshubhih
61.60
वल्कलाजिनसंवीतैर्मुनिभिः संयतेन्द्रियैः
तापसाध्युषितं रम्यं ददर्शाश्रममण्डलम्
Valkalajinasanvitairmunibhih sanyatendriyaih
Tapasadhyushitam ramyam dadarshashramamandalam
61.61
सा दृष्ट्वैवाश्रमपदं नानामृगनिषेवितम्
शाखामृगगणैश्चैव तापसैश्च समन्वितम्
Sa drishtvaivashramapadam nanamriganishevitam
Shakhamrigaganaishchaiva tapasaishcha samanvitam
61.62
सुभ्रूः सुकेशी सुश्रोणी सुकुचा सुद्विजानना
वर्चस्विनी सुप्रतिष्ठा स्वञ्चितोद्यतगामिनी
Subhruh sukeshi sushroni sukucha sudvijanana
Varchasvini supratishtha svanchitodyatagamini
61.63
सा विवेशाश्रमपदं वीरसेनसुतप्रिया
योषिद्रत्नं महाभागा दमयन्ती मनस्विनी
Sa viveshashramapadam virasenasutapriya
Yoshidratnam mahabhaga damayanti manasvini
61.64
साभिवाद्य तपोवृद्धान्विनयावनता स्थिता
स्वागतं त इति प्रोक्ता तैः सर्वैस्तापसैश्च सा
Sabhivadya tapovriddhanvinayavanata sthita
Svagatam ta iti prokta taih sarvaistapasaishcha sa
61.65
पूजां चास्या यथान्यायं कृत्वा तत्र तपोधनाः
आस्यतामित्यथोचुस्ते ब्रूहि किं करवामहे
Pujam chasya yathanyayam kritva tatra tapodhanah
Asyatamityathochuste bruhi kim karavamahe
61.66
तानुवाच वरारोहा कच्चिद्भगवतामिह
तपस्यग्निषु धर्मेषु मृगपक्षिषु चानघाः
कुशलं वो महाभागाः स्वधर्मचरणेषु च
Tanuvacha vararoha kachchidbhagavatamiha
Tapasyagnishu dharmeshu mrigapakshishu chanaghah
Kushalam vo mahabhagah svadharmacharaneshu cha
61.67
तैरुक्ता कुशलं भद्रे सर्वत्रेति यशस्विनी
ब्रूहि सर्वानवद्याङ्गि का त्वं किं च चिकीर्षसि
Tairukta kushalam bhadre sarvatreti yashasvini
Bruhi sarvanavadyangi ka tvam kim cha chikirshasi
61.68
दृष्ट्वैव ते परं रूपं द्युतिं च परमामिह
विस्मयो नः समुत्पन्नः समाश्वसिहि मा शुचः
Drishtvaiva te param rupam dyutim cha paramamiha
Vismayo nah samutpannah samashvasihi ma shuchah
61.69
अस्यारण्यस्य महती देवता वा महीभृतः
अस्या नु नद्याः कल्याणि वद सत्यमनिन्दिते
Asyaranyasya mahati devata va mahibhritah
Asya nu nadyah kalyani vada satyamanindite
61.70
साब्रवीत्तानृषीन्नाहमरण्यस्यास्य देवता
न चाप्यस्य गिरेर्विप्रा न नद्या देवताप्यहम्
Sabravittanrishinnahamaranyasyasya devata
Na chapyasya girervipra na nadya devatapyaham
61.71
मानुषीं मां विजानीत यूयं सर्वे तपोधनाः
विस्तरेणाभिधास्यामि तन्मे शृणुत सर्वशः
Manushim mam vijanita yuyam sarve tapodhanah
Vistarenabhidhasyami tanme shrinuta sarvashah
61.72
विदर्भेषु महीपालो भीमो नाम महाद्युतिः
तस्य मां तनयां सर्वे जानीत द्विजसत्तमाः
Vidarbheshu mahipalo bhimo nama mahadyutih
Tasya mam tanayam sarve janita dvijasattamah
61.73
निषधाधिपतिर्धीमान्नलो नाम महायशाः
वीरः संग्रामजिद्विद्वान्मम भर्ता विशां पतिः
Nishadhadhipatirdhimannalo nama mahayashah
Virah sangramajidvidvanmama bharta visham patih
61.74
देवताभ्यर्चनपरो द्विजातिजनवत्सलः
गोप्ता निषधवंशस्य महाभागो महाद्युतिः
Devatabhyarchanaparo dvijatijanavatsalah
Gopta nishadhavanshasya mahabhago mahadyutih
61.75
सत्यवाग्धर्मवित्प्राज्ञः सत्यसंधोऽरिमर्दनः
ब्रह्मण्यो दैवतपरः श्रीमान्परपुरंजयः
Satyavagdharmavitpragyah satyasandhorimardanah
Brahmanyo daivataparah shrimanparapuranjayah
61.76
नलो नाम नृपश्रेष्ठो देवराजसमद्युतिः
मम भर्ता विशालाक्षः पूर्णेन्दुवदनोऽरिहा
Nalo nama nripashreshtho devarajasamadyutih
Mama bharta vishalakshah purnenduvadanoriha
61.77
आहर्ता क्रतुमुख्यानां वेदवेदाङ्गपारगः
सपत्नानां मृधे हन्ता रविसोमसमप्रभः
Aharta kratumukhyanam vedavedangaparagah
Sapatnanam mridhe hanta ravisomasamaprabhah
61.78
स कैश्चिन्निकृतिप्रज्ञैरकल्याणैर्नराधमैः
आहूय पृथिवीपालः सत्यधर्मपरायणः
देवने कुशलैर्जिह्मैर्जितो राज्यं वसूनि च
Sa kaishchinnikritipragyairakalyanairnaradhamaih
Ahuya prithivipalah satyadharmaparayanah
Devane kushalairjihmairjito rajyam vasuni cha
61.79
तस्य मामवगच्छध्वं भार्यां राजर्षभस्य वै
दमयन्तीति विख्यातां भर्तृदर्शनलालसाम्
Tasya mamavagachchhadhvam bharyam rajarshabhasya vai
Damayantiti vikhyatam bhartridarshanalalasam
61.80
सा वनानि गिरींश्चैव सरांसि सरितस्तथा
पल्वलानि च रम्याणि तथारण्यानि सर्वशः
Sa vanani girinshchaiva saransi saritastatha
Palvalani cha ramyani tatharanyani sarvashah
61.81
अन्वेषमाणा भर्तारं नलं रणविशारदम्
महात्मानं कृतास्त्रं च विचरामीह दुःखिता
Anveshamana bhartaram nalam ranavisharadam
Mahatmanam kritastram cha vicharamiha duhkhita
61.82
कच्चिद्भगवतां पुण्यं तपोवनमिदं नृपः
भवेत्प्राप्तो नलो नाम निषधानां जनाधिपः
Kachchidbhagavatam punyam tapovanamidam nripah
Bhavetprapto nalo nama nishadhanam janadhipah
61.83
यत्कृतेऽहमिदं विप्राः प्रपन्ना भृशदारुणम्
वनं प्रतिभयं घोरं शार्दूलमृगसेवितम्
Yatkritehamidam viprah prapanna bhrishadarunam
Vanam pratibhayam ghoram shardulamrigasevitam
61.84
यदि कैश्चिदहोरात्रैर्न द्रक्ष्यामि नलं नृपम्
आत्मानं श्रेयसा योक्ष्ये देहस्यास्य विमोचनात्
Yadi kaishchidahoratrairna drakshyami nalam nripam
Atmanam shreyasa yokshye dehasyasya vimochanat
61.85
को नु मे जीवितेनार्थस्तमृते पुरुषर्षभम्
कथं भविष्याम्यद्याहं भर्तृशोकाभिपीडिता
Ko nu me jivitenarthastamrite purusharshabham
Katham bhavishyamyadyaham bhartrishokabhipidita
61.86
एवं विलपतीमेकामरण्ये भीमनन्दिनीम्
दमयन्तीमथोचुस्ते तापसाः सत्यवादिनः
Evam vilapatimekamaranye bhimanandinim
Damayantimathochuste tapasah satyavadinah
61.87
उदर्कस्तव कल्याणि कल्याणो भविता शुभे
वयं पश्याम तपसा क्षिप्रं द्रक्ष्यसि नैषधम्
Udarkastava kalyani kalyano bhavita shubhe
Vayam pashyama tapasa kshipram drakshyasi naishadham
61.88
निषधानामधिपतिं नलं रिपुनिघातिनम्
भैमि धर्मभृतां श्रेष्ठं द्रक्ष्यसे विगतज्वरम्
Nishadhanamadhipatim nalam ripunighatinam
Bhaimi dharmabhritam shreshtham drakshyase vigatajvaram
61.89
विमुक्तं सर्वपापेभ्यः सर्वरत्नसमन्वितम्
तदेव नगरश्रेष्ठं प्रशासन्तमरिंदमम्
Vimuktam sarvapapebhyah sarvaratnasamanvitam
Tadeva nagarashreshtham prashasantamarindamam
61.90
द्विषतां भयकर्तारं सुहृदां शोकनाशनम्
पतिं द्रक्ष्यसि कल्याणि कल्याणाभिजनं नृपम्
Dvishatam bhayakartaram suhridam shokanashanam
Patim drakshyasi kalyani kalyanabhijanam nripam
61.91
एवमुक्त्वा नलस्येष्टां महिषीं पार्थिवात्मजाम्
अन्तर्हितास्तापसास्ते साग्निहोत्राश्रमास्तदा
Evamuktva nalasyeshtam mahishim parthivatmajam
Antarhitastapasaste sagnihotrashramastada
61.92
सा दृष्ट्वा महदाश्चर्यं विस्मिता अभवत्तदा
दमयन्त्यनवद्याङ्गी वीरसेननृपस्नुषा
Sa drishtva mahadashcharyam vismita abhavattada
Damayantyanavadyangi virasenanripasnusha
61.93
किं नु स्वप्नो मया दृष्टः कोऽयं विधिरिहाभवत्
क्व नु ते तापसाः सर्वे क्व तदाश्रममण्डलम्
Kim nu svapno maya drishtah koyam vidhirihabhavat
Kva nu te tapasah sarve kva tadashramamandalam
61.94
क्व सा पुण्यजला रम्या नानाद्विजनिषेविता
नदी ते च नगा हृद्याः फलपुष्पोपशोभिताः
Kva sa punyajala ramya nanadvijanishevita
Nadi te cha naga hridyah phalapushpopashobhitah
61.95
ध्यात्वा चिरं भीमसुता दमयन्ती शुचिस्मिता
भर्तृशोकपरा दीना विवर्णवदनाभवत्
Dhyatva chiram bhimasuta damayanti shuchismita
Bhartrishokapara dina vivarnavadanabhavat
61.96
सा गत्वाथापरां भूमिं बाष्पसंदिग्धया गिरा
विललापाश्रुपूर्णाक्षी दृष्ट्वाशोकतरुं ततः
Sa gatvathaparam bhumim bashpasandigdhaya gira
Vilalapashrupurnakshi drishtvashokatarum tatah
61.97
उपगम्य तरुश्रेष्ठमशोकं पुष्पितं तदा
पल्लवापीडितं हृद्यं विहंगैरनुनादितम्
Upagamya tarushreshthamashokam pushpitam tada
Pallavapiditam hridyam vihangairanunaditam
61.98
अहो बतायमगमः श्रीमानस्मिन्वनान्तरे
आपीडैर्बहुभिर्भाति श्रीमान्द्रमिडराडिव
Aho batayamagamah shrimanasminvanantare
Apidairbahubhirbhati shrimandramidaradiva
61.99
विशोकां कुरु मां क्षिप्रमशोक प्रियदर्शन
वीतशोकभयाबाधं कच्चित्त्वं दृष्टवान्नृपम्
Vishokam kuru mam kshipramashoka priyadarshana
Vitashokabhayabadham kachchittvam drishtavannripam
61.100
नलं नामारिदमनं दमयन्त्याः प्रियं पतिम्
निषधानामधिपतिं दृष्टवानसि मे प्रियम्
Nalam namaridamanam damayantyah priyam patim
Nishadhanamadhipatim drishtavanasi me priyam
61.101
एकवस्त्रार्धसंवीतं सुकुमारतनुत्वचम्
व्यसनेनार्दितं वीरमरण्यमिदमागतम्
Ekavastrardhasanvitam sukumaratanutvacham
Vyasanenarditam viramaranyamidamagatam
61.102
यथा विशोका गच्छेयमशोकनग तत्कुरु
सत्यनामा भवाशोक मम शोकविनाशनात्
Yatha vishoka gachchheyamashokanaga tatkuru
Satyanama bhavashoka mama shokavinashanat
61.103
एवं साशोकवृक्षं तमार्ता त्रिः परिगम्य ह
जगाम दारुणतरं देशं भैमी वराङ्गना
Evam sashokavriksham tamarta trih parigamya ha
Jagama darunataram desham bhaimi varangana
61.104
सा ददर्श नगान्नैकान्नैकाश्च सरितस्तथा
नैकांश्च पर्वतान्रम्यान्नैकांश्च मृगपक्षिणः
Sa dadarsha nagannaikannaikashcha saritastatha
Naikanshcha parvatanramyannaikanshcha mrigapakshinah
61.105
कन्दरांश्च नितम्बांश्च नदांश्चाद्भुतदर्शनान्
ददर्श सा भीमसुता पतिमन्वेषती तदा
Kandaranshcha nitambanshcha nadanshchadbhutadarshanan
Dadarsha sa bhimasuta patimanveshati tada
61.106
गत्वा प्रकृष्टमध्वानं दमयन्ती शुचिस्मिता
ददर्शाथ महासार्थं हस्त्यश्वरथसंकुलम्
Gatva prakrishtamadhvanam damayanti shuchismita
Dadarshatha mahasartham hastyashvarathasankulam
61.107
उत्तरन्तं नदीं रम्यां प्रसन्नसलिलां शुभाम्
सुशीततोयां विस्तीर्णां ह्रदिनीं वेतसैर्वृताम्
Uttarantam nadim ramyam prasannasalilam shubham
Sushitatoyam vistirnam hradinim vetasairvritam
61.108
प्रोद्घुष्टां क्रौञ्चकुररैश्चक्रवाकोपकूजिताम्
कूर्मग्राहझषाकीर्णां पुलिनद्वीपशोभिताम्
Prodghushtam kraunchakuraraishchakravakopakujitam
Kurmagrahajhashakirnam pulinadvipashobhitam
61.109
सा दृष्ट्वैव महासार्थं नलपत्नी यशस्विनी
उपसर्प्य वरारोहा जनमध्यं विवेश ह
Sa drishtvaiva mahasartham nalapatni yashasvini
Upasarpya vararoha janamadhyam vivesha ha
61.110
उन्मत्तरूपा शोकार्ता तथा वस्त्रार्धसंवृता
कृशा विवर्णा मलिना पांसुध्वस्तशिरोरुहा
Unmattarupa shokarta tatha vastrardhasanvrita
Krisha vivarna malina pansudhvastashiroruha
61.111
तां दृष्ट्वा तत्र मनुजाः केचिद्भीताः प्रदुद्रुवुः
केचिच्चिन्तापरास्तस्थुः केचित्तत्र विचुक्रुशुः
Tam drishtva tatra manujah kechidbhitah pradudruvuh
Kechichchintaparastasthuh kechittatra vichukrushuh
61.112
प्रहसन्ति स्म तां केचिदभ्यसूयन्त चापरे
चक्रुस्तस्यां दयां केचित्पप्रच्छुश्चापि भारत
Prahasanti sma tam kechidabhyasuyanta chapare
Chakrustasyam dayam kechitpaprachchhushchapi bharata
61.113
कासि कस्यासि कल्याणि किं वा मृगयसे वने
त्वां दृष्ट्वा व्यथिताः स्मेह कच्चित्त्वमसि मानुषी
Kasi kasyasi kalyani kim va mrigayase vane
Tvam drishtva vyathitah smeha kachchittvamasi manushi
61.114
वद सत्यं वनस्यास्य पर्वतस्याथ वा दिशः
देवता त्वं हि कल्याणि त्वां वयं शरणं गताः
Vada satyam vanasyasya parvatasyatha va dishah
Devata tvam hi kalyani tvam vayam sharanam gatah
61.115
यक्षी वा राक्षसी वा त्वमुताहोऽसि वराङ्गना
सर्वथा कुरु नः स्वस्ति रक्षस्वास्माननिन्दिते
Yakshi va rakshasi va tvamutahosi varangana
Sarvatha kuru nah svasti rakshasvasmananindite
61.116
यथायं सर्वथा सार्थः क्षेमी शीघ्रमितो व्रजेत्
तथा विधत्स्व कल्याणि त्वां वयं शरणं गताः
Yathayam sarvatha sarthah kshemi shighramito vrajet
Tatha vidhatsva kalyani tvam vayam sharanam gatah
61.117
तथोक्ता तेन सार्थेन दमयन्ती नृपात्मजा
प्रत्युवाच ततः साध्वी भर्तृव्यसनदुःखिता
सार्थवाहं च सार्थं च जना ये चात्र केचन
Tathokta tena sarthena damayanti nripatmaja
Pratyuvacha tatah sadhvi bhartrivyasanaduhkhita
Sarthavaham cha sartham cha jana ye chatra kechana
61.118
यूनः स्थविरबालाश्च सार्थस्य च पुरोगमाः
मानुषीं मां विजानीत मनुजाधिपतेः सुताम्
नृपस्नुषां राजभार्यां भर्तृदर्शनलालसाम्
Yunah sthavirabalashcha sarthasya cha purogamah
Manushim mam vijanita manujadhipateh sutam
Nripasnusham rajabharyam bhartridarshanalalasam
61.119
विदर्भराण्मम पिता भर्ता राजा च नैषधः
नलो नाम महाभागस्तं मार्गाम्यपराजितम्
Vidarbharanmama pita bharta raja cha naishadhah
Nalo nama mahabhagastam margamyaparajitam
61.120
यदि जानीत नृपतिं क्षिप्रं शंसत मे प्रियम्
नलं पार्थिवशार्दूलममित्रगणसूदनम्
Yadi janita nripatim kshipram shansata me priyam
Nalam parthivashardulamamitraganasudanam
61.121
तामुवाचानवद्याङ्गीं सार्थस्य महतः प्रभुः
सार्थवाहः शुचिर्नाम शृणु कल्याणि मद्वचः
Tamuvachanavadyangim sarthasya mahatah prabhuh
Sarthavahah shuchirnama shrinu kalyani madvachah
61.122
अहं सार्थस्य नेता वै सार्थवाहः शुचिस्मिते
मनुष्यं नलनामानं न पश्यामि यशस्विनि
Aham sarthasya neta vai sarthavahah shuchismite
Manushyam nalanamanam na pashyami yashasvini
61.123
कुञ्जरद्वीपिमहिषशार्दूलर्क्षमृगानपि
पश्याम्यस्मिन्वने कष्टे अमनुष्यनिषेविते
तथा नो यक्षराडद्य मणिभद्रः प्रसीदतु
Kunjaradvipimahishashardularkshamriganapi
Pashyamyasminvane kashte amanushyanishevite
Tatha no yaksharadadya manibhadrah prasidatu
61.124
साब्रवीद्वणिजः सर्वान्सार्थवाहं च तं ततः
क्व नु यास्यसि सार्थोऽयमेतदाख्यातुमर्हथ
Sabravidvanijah sarvansarthavaham cha tam tatah
Kva nu yasyasi sarthoyametadakhyatumarhatha
61.125
सार्थवाह उवाच
सार्थोऽयं चेदिराजस्य सुबाहोः सत्यवादिनः
क्षिप्रं जनपदं गन्ता लाभाय मनुजात्मजे
Sarthavaha uvacha
Sarthoyam chedirajasya subahoh satyavadinah
Kshipram janapadam ganta labhaya manujatmaje