UtshovChapter 75
75.1
दमयन्त्युवाच
न मामर्हसि कल्याण पापेन परिशङ्कितुम्
मया हि देवानुत्सृज्य वृतस्त्वं निषधाधिप
Damayantyuvacha
Na mamarhasi kalyana papena parishankitum
Maya hi devanutsrijya vritastvam nishadhadhipa
75.2
तवाभिगमनार्थं तु सर्वतो ब्राह्मणा गताः
वाक्यानि मम गाथाभिर्गायमाना दिशो दश
Tavabhigamanartham tu sarvato brahmana gatah
Vakyani mama gathabhirgayamana disho dasha
75.3
ततस्त्वां ब्राह्मणो विद्वान्पर्णादो नाम पार्थिव
अभ्यगच्छत्कोसलायामृतुपर्णनिवेशने
Tatastvam brahmano vidvanparnado nama parthiva
Abhyagachchhatkosalayamrituparnaniveshane
75.4
तेन वाक्ये हृते सम्यक्प्रतिवाक्ये तथाहृते
उपायोऽयं मया दृष्टो नैषधानयने तव
Tena vakye hrite samyakprativakye tathahrite
Upayoyam maya drishto naishadhanayane tava
75.5
त्वामृते न हि लोकेऽन्य एकाह्ना पृथिवीपते
समर्थो योजनशतं गन्तुमश्वैर्नराधिप
Tvamrite na hi lokenya ekahna prithivipate
Samartho yojanashatam gantumashvairnaradhipa
75.6
तथा चेमौ महीपाल भजेऽहं चरणौ तव
यथा नासत्कृतं किंचिन्मनसापि चराम्यहम्
Tatha chemau mahipala bhajeham charanau tava
Yatha nasatkritam kinchinmanasapi charamyaham
75.7
अयं चरति लोकेऽस्मिन्भूतसाक्षी सदागतिः
एष मुञ्चतु मे प्राणान्यदि पापं चराम्यहम्
Ayam charati lokesminbhutasakshi sadagatih
Esha munchatu me prananyadi papam charamyaham
75.8
तथा चरति तिग्मांशुः परेण भुवनं सदा
स विमुञ्चतु मे प्राणान्यदि पापं चराम्यहम्
Tatha charati tigmanshuh parena bhuvanam sada
Sa vimunchatu me prananyadi papam charamyaham
75.9
चन्द्रमाः सर्वभूतानामन्तश्चरति साक्षिवत्
स विमुञ्चतु मे प्राणान्यदि पापं चराम्यहम्
Chandramah sarvabhutanamantashcharati sakshivat
Sa vimunchatu me prananyadi papam charamyaham
75.10
एते देवास्त्रयः कृत्स्नं त्रैलोक्यं धारयन्ति वै
विब्रुवन्तु यथासत्यमेते वाद्य त्यजन्तु माम्
Ete devastrayah kritsnam trailokyam dharayanti vai
Vibruvantu yathasatyamete vadya tyajantu mam
75.11
एवमुक्ते ततो वायुरन्तरिक्षादभाषत
नैषा कृतवती पापं नल सत्यं ब्रवीमि ते
Evamukte tato vayurantarikshadabhashata
Naisha kritavati papam nala satyam bravimi te
75.12
राजञ्शीलनिधिः स्फीतो दमयन्त्या सुरक्षितः
साक्षिणो रक्षिणश्चास्या वयं त्रीन्परिवत्सरान्
Rajanshilanidhih sphito damayantya surakshitah
Sakshino rakshinashchasya vayam trinparivatsaran
75.13
उपायो विहितश्चायं त्वदर्थमतुलोऽनया
न ह्येकाह्ना शतं गन्ता त्वदृतेऽन्यः पुमानिह
Upayo vihitashchayam tvadarthamatulonaya
Na hyekahna shatam ganta tvadritenyah pumaniha
75.14
उपपन्ना त्वया भैमी त्वं च भैम्या महीपते
नात्र शङ्का त्वया कार्या संगच्छ सह भार्यया
Upapanna tvaya bhaimi tvam cha bhaimya mahipate
Natra shanka tvaya karya sangachchha saha bharyaya
75.15
तथा ब्रुवति वायौ तु पुष्पवृष्टिः पपात ह
देवदुन्दुभयो नेदुर्ववौ च पवनः शिवः
Tatha bruvati vayau tu pushpavrishtih papata ha
Devadundubhayo nedurvavau cha pavanah shivah
75.16
तदद्भुततमं दृष्ट्वा नलो राजाथ भारत
दमयन्त्यां विशङ्कां तां व्यपाकर्षदरिंदमः
Tadadbhutatamam drishtva nalo rajatha bharata
Damayantyam vishankam tam vyapakarshadarindamah
75.17
ततस्तद्वस्त्रमरजः प्रावृणोद्वसुधाधिपः
संस्मृत्य नागराजानं ततो लेभे वपुः स्वकम्
Tatastadvastramarajah pravrinodvasudhadhipah
Sansmritya nagarajanam tato lebhe vapuh svakam
75.18
स्वरूपिणं तु भर्तारं दृष्ट्वा भीमसुता तदा
प्राक्रोशदुच्चैरालिङ्ग्य पुण्यश्लोकमनिन्दिता
Svarupinam tu bhartaram drishtva bhimasuta tada
Prakroshaduchchairalingya punyashlokamanindita
75.19
भैमीमपि नलो राजा भ्राजमानो यथा पुरा
सस्वजे स्वसुतौ चापि यथावत्प्रत्यनन्दत
Bhaimimapi nalo raja bhrajamano yatha pura
Sasvaje svasutau chapi yathavatpratyanandata
75.20
ततः स्वोरसि विन्यस्य वक्त्रं तस्य शुभानना
परीता तेन दुःखेन निशश्वासायतेक्षणा
Tatah svorasi vinyasya vaktram tasya shubhanana
Parita tena duhkhena nishashvasayatekshana
75.21
तथैव मलदिग्धाङ्गी परिष्वज्य शुचिस्मिता
सुचिरं पुरुषव्याघ्रं तस्थौ साश्रुपरिप्लुता
Tathaiva maladigdhangi parishvajya shuchismita
Suchiram purushavyaghram tasthau sashruparipluta
75.22
ततः सर्वं यथावृत्तं दमयन्त्या नलस्य च
भीमायाकथयत्प्रीत्या वैदर्भ्या जननी नृप
Tatah sarvam yathavrittam damayantya nalasya cha
Bhimayakathayatpritya vaidarbhya janani nripa
75.23
ततोऽब्रवीन्महाराजः कृतशौचमहं नलम्
दमयन्त्या सहोपेतं काल्यं द्रष्टा सुखोषितम्
Tatobravinmaharajah kritashauchamaham nalam
Damayantya sahopetam kalyam drashta sukhoshitam
75.24
ततस्तौ सहितौ रात्रिं कथयन्तौ पुरातनम्
वने विचरितं सर्वमूषतुर्मुदितौ नृप
Tatastau sahitau ratrim kathayantau puratanam
Vane vicharitam sarvamushaturmuditau nripa
75.25
स चतुर्थे ततो वर्षे संगम्य सह भार्यया
सर्वकामैः सुसिद्धार्थो लब्धवान्परमां मुदम्
Sa chaturthe tato varshe sangamya saha bharyaya
Sarvakamaih susiddhartho labdhavanparamam mudam
75.26
दमयन्त्यपि भर्तारमवाप्याप्यायिता भृशम्
अर्धसंजातसस्येव तोयं प्राप्य वसुंधरा
Damayantyapi bhartaramavapyapyayita bhrisham
Ardhasanjatasasyeva toyam prapya vasundhara
75.27
सैवं समेत्य व्यपनीततन्द्री; शान्तज्वरा हर्षविवृद्धसत्त्वा
रराज भैमी समवाप्तकामा; शीतांशुना रात्रिरिवोदितेन
Saivam sametya vyapanitatandri; shantajvara harshavivriddhasattva
Raraja bhaimi samavaptakama; shitanshuna ratririvoditena