UtshovChapter 78
78.1
बृहदश्व उवाच
प्रशान्ते तु पुरे हृष्टे संप्रवृत्ते महोत्सवे
महत्या सेनया राजा दमयन्तीमुपानयत्
Brihadashva uvacha
Prashante tu pure hrishte sampravritte mahotsave
Mahatya senaya raja damayantimupanayat
78.2
दमयन्तीमपि पिता सत्कृत्य परवीरहा
प्रस्थापयदमेयात्मा भीमो भीमपराक्रमः
Damayantimapi pita satkritya paraviraha
Prasthapayadameyatma bhimo bhimaparakramah
78.3
आगतायां तु वैदर्भ्यां सपुत्रायां नलो नृपः
वर्तयामास मुदितो देवराडिव नन्दने
Agatayam tu vaidarbhyam saputrayam nalo nripah
Vartayamasa mudito devaradiva nandane
78.4
तथा प्रकाशतां यातो जम्बूद्वीपेऽथ राजसु
पुनः स्वे चावसद्राज्ये प्रत्याहृत्य महायशाः
Tatha prakashatam yato jambudvipetha rajasu
Punah sve chavasadrajye pratyahritya mahayashah
78.5
ईजे च विविधैर्यज्ञैर्विधिवत्स्वाप्तदक्षिणैः
तथा त्वमपि राजेन्द्र ससुहृद्वक्ष्यसेऽचिरात्
Ije cha vividhairyagyairvidhivatsvaptadakshinaih
Tatha tvamapi rajendra sasuhridvakshyasechirat
78.6
दुःखमेतादृशं प्राप्तो नलः परपुरंजयः
देवनेन नरश्रेष्ठ सभार्यो भरतर्षभ
Duhkhametadrisham prapto nalah parapuranjayah
Devanena narashreshtha sabharyo bharatarshabha
78.7
एकाकिनैव सुमहन्नलेन पृथिवीपते
दुःखमासादितं घोरं प्राप्तश्चाभ्युदयः पुनः
Ekakinaiva sumahannalena prithivipate
Duhkhamasaditam ghoram praptashchabhyudayah punah
78.8
त्वं पुनर्भ्रातृसहितः कृष्णया चैव पाण्डव
रमसेऽस्मिन्महारण्ये धर्ममेवानुचिन्तयन्
Tvam punarbhratrisahitah krishnaya chaiva pandava
Ramasesminmaharanye dharmamevanuchintayan
78.9
ब्राह्मणैश्च महाभागैर्वेदवेदाङ्गपारगैः
नित्यमन्वास्यसे राजंस्तत्र का परिदेवना
Brahmanaishcha mahabhagairvedavedangaparagaih
Nityamanvasyase rajanstatra ka paridevana
78.10
इतिहासमिमं चापि कलिनाशनमुच्यते
शक्यमाश्वासितुं श्रुत्वा त्वद्विधेन विशां पते
Itihasamimam chapi kalinashanamuchyate
Shakyamashvasitum shrutva tvadvidhena visham pate
78.11
अस्थिरत्वं च संचिन्त्य पुरुषार्थस्य नित्यदा
तस्याये च व्यये चैव समाश्वसिहि मा शुचः
Asthiratvam cha sanchintya purusharthasya nityada
Tasyaye cha vyaye chaiva samashvasihi ma shuchah
78.12
ये चेदं कथयिष्यन्ति नलस्य चरितं महत्
श्रोष्यन्ति चाप्यभीक्ष्णं वै नालक्ष्मीस्तान्भजिष्यति
अर्थास्तस्योपपत्स्यन्ते धन्यतां च गमिष्यति
Ye chedam kathayishyanti nalasya charitam mahat
Shroshyanti chapyabhikshnam vai nalakshmistanbhajishyati
Arthastasyopapatsyante dhanyatam cha gamishyati
78.13
इतिहासमिमं श्रुत्वा पुराणं शश्वदुत्तमम्
पुत्रान्पौत्रान्पशूंश्चैव वेत्स्यते नृषु चाग्र्यताम्
अरोगः प्रीतिमांश्चैव भविष्यति न संशयः
Itihasamimam shrutva puranam shashvaduttamam
Putranpautranpashunshchaiva vetsyate nrishu chagryatam
Arogah pritimanshchaiva bhavishyati na sanshayah
78.14
भयं पश्यसि यच्च त्वमाह्वयिष्यति मां पुनः
अक्षज्ञ इति तत्तेऽहं नाशयिष्यामि पार्थिव
Bhayam pashyasi yachcha tvamahvayishyati mam punah
Akshagya iti tatteham nashayishyami parthiva
78.15
वेदाक्षहृदयं कृत्स्नमहं सत्यपराक्रम
उपपद्यस्व कौन्तेय प्रसन्नोऽहं ब्रवीमि ते
Vedakshahridayam kritsnamaham satyaparakrama
Upapadyasva kaunteya prasannoham bravimi te
78.16
वैशंपायन उवाच
ततो हृष्टमना राजा बृहदश्वमुवाच ह
भगवन्नक्षहृदयं ज्ञातुमिच्छामि तत्त्वतः
Vaishampayana uvacha
Tato hrishtamana raja brihadashvamuvacha ha
Bhagavannakshahridayam gyatumichchhami tattvatah
78.17
ततोऽक्षहृदयं प्रादात्पाण्डवाय महात्मने
दत्त्वा चाश्वशिरोऽगच्छदुपस्प्रष्टुं महातपाः
Tatokshahridayam pradatpandavaya mahatmane
Dattva chashvashirogachchhadupasprashtum mahatapah
78.18
बृहदश्वे गते पार्थमश्रौषीत्सव्यसाचिनम्
वर्तमानं तपस्युग्रे वायुभक्षं मनीषिणम्
Brihadashve gate parthamashraushitsavyasachinam
Vartamanam tapasyugre vayubhaksham manishinam
78.19
ब्राह्मणेभ्यस्तपस्विभ्यः संपतद्भ्यस्ततस्ततः
तीर्थशैलवरेभ्यश्च समेतेभ्यो दृढव्रतः
Brahmanebhyastapasvibhyah sampatadbhyastatastatah
Tirthashailavarebhyashcha sametebhyo dridhavratah
78.20
इति पार्थो महाबाहुर्दुरापं तप आस्थितः
न तथा दृष्टपूर्वोऽन्यः कश्चिदुग्रतपा इति
Iti partho mahabahurdurapam tapa asthitah
Na tatha drishtapurvonyah kashchidugratapa iti
78.21
यथा धनंजयः पार्थस्तपस्वी नियतव्रतः
मुनिरेकचरः श्रीमान्धर्मो विग्रहवानिव
Yatha dhananjayah parthastapasvi niyatavratah
Munirekacharah shrimandharmo vigrahavaniva
78.22
तं श्रुत्वा पाण्डवो राजंस्तप्यमानं महावने
अन्वशोचत कौन्तेयः प्रियं वै भ्रातरं जयम्
Tam shrutva pandavo rajanstapyamanam mahavane
Anvashochata kaunteyah priyam vai bhrataram jayam
78.23
दह्यमानेन तु हृदा शरणार्थी महावने
ब्राह्मणान्विविधज्ञानान्पर्यपृच्छद्युधिष्ठिरः
Dahyamanena tu hrida sharanarthi mahavane
Brahmananvividhagyananparyaprichchhadyudhishthirah