UtshovChapter 94
94.1
वैशंपायन उवाच
ततः संप्रस्थितो राजा कौन्तेयो भूरिदक्षिणः
अगस्त्याश्रममासाद्य दुर्जयायामुवास ह
Vaishampayana uvacha
Tatah samprasthito raja kaunteyo bhuridakshinah
Agastyashramamasadya durjayayamuvasa ha
94.2
तत्र वै लोमशं राजा पप्रच्छ वदतां वरः
अगस्त्येनेह वातापिः किमर्थमुपशामितः
Tatra vai lomasham raja paprachchha vadatam varah
Agastyeneha vatapih kimarthamupashamitah
94.3
आसीद्वा किंप्रभावश्च स दैत्यो मानवान्तकः
किमर्थं चोद्गतो मन्युरगस्त्यस्य महात्मनः
Asidva kimprabhavashcha sa daityo manavantakah
Kimartham chodgato manyuragastyasya mahatmanah
94.4
लोमश उवाच
इल्वलो नाम दैतेय आसीत्कौरवनन्दन
मणिमत्यां पुरि पुरा वातापिस्तस्य चानुजः
Lomasha uvacha
Ilvalo nama daiteya asitkauravanandana
Manimatyam puri pura vatapistasya chanujah
94.5
स ब्राह्मणं तपोयुक्तमुवाच दितिनन्दनः
पुत्रं मे भगवानेकमिन्द्रतुल्यं प्रयच्छतु
Sa brahmanam tapoyuktamuvacha ditinandanah
Putram me bhagavanekamindratulyam prayachchhatu
94.6
तस्मै स ब्राह्मणो नादात्पुत्रं वासवसंमितम्
चुक्रोध सोऽसुरस्तस्य ब्राह्मणस्य ततो भृशम्
Tasmai sa brahmano nadatputram vasavasammitam
Chukrodha sosurastasya brahmanasya tato bhrisham
94.7
समाह्वयति यं वाचा गतं वैवस्वतक्षयम्
स पुनर्देहमास्थाय जीवन्स्म प्रतिदृश्यते
Samahvayati yam vacha gatam vaivasvatakshayam
Sa punardehamasthaya jivansma pratidrishyate
94.8
ततो वातापिमसुरं छागं कृत्वा सुसंस्कृतम्
तं ब्राह्मणं भोजयित्वा पुनरेव समाह्वयत्
Tato vatapimasuram chhagam kritva susanskritam
Tam brahmanam bhojayitva punareva samahvayat
94.9
तस्य पार्श्वं विनिर्भिद्य ब्राह्मणस्य महासुरः
वातापिः प्रहसन्राजन्निश्चक्राम विशां पते
Tasya parshvam vinirbhidya brahmanasya mahasurah
Vatapih prahasanrajannishchakrama visham pate
94.10
एवं स ब्राह्मणान्राजन्भोजयित्वा पुनः पुनः
हिंसयामास दैतेय इल्वलो दुष्टचेतनः
Evam sa brahmananrajanbhojayitva punah punah
Hinsayamasa daiteya ilvalo dushtachetanah
94.11
अगस्त्यश्चापि भगवानेतस्मिन्काल एव तु
पितॄन्ददर्श गर्ते वै लम्बमानानधोमुखान्
Agastyashchapi bhagavanetasminkala eva tu
Pitrindadarsha garte vai lambamananadhomukhan
94.12
सोऽपृच्छल्लम्बमानांस्तान्भवन्त इह किंपराः
संतानहेतोरिति ते तमूचुर्ब्रह्मवादिनः
Soprichchhallambamananstanbhavanta iha kimparah
Santanahetoriti te tamuchurbrahmavadinah
94.13
ते तस्मै कथयामासुर्वयं ते पितरः स्वकाः
गर्तमेतमनुप्राप्ता लम्बामः प्रसवार्थिनः
Te tasmai kathayamasurvayam te pitarah svakah
Gartametamanuprapta lambamah prasavarthinah
94.14
यदि नो जनयेथास्त्वमगस्त्यापत्यमुत्तमम्
स्यान्नोऽस्मान्निरयान्मोक्षस्त्वं च पुत्राप्नुया गतिम्
Yadi no janayethastvamagastyapatyamuttamam
Syannosmannirayanmokshastvam cha putrapnuya gatim
94.15
स तानुवाच तेजस्वी सत्यधर्मपरायणः
करिष्ये पितरः कामं व्येतु वो मानसो ज्वरः
Sa tanuvacha tejasvi satyadharmaparayanah
Karishye pitarah kamam vyetu vo manaso jvarah
94.16
ततः प्रसवसंतानं चिन्तयन्भगवानृषिः
आत्मनः प्रसवस्यार्थे नापश्यत्सदृशीं स्त्रियम्
Tatah prasavasantanam chintayanbhagavanrishih
Atmanah prasavasyarthe napashyatsadrishim striyam
94.17
स तस्य तस्य सत्त्वस्य तत्तदङ्गमनुत्तमम्
संभृत्य तत्समैरङ्गैर्निर्ममे स्त्रियमुत्तमाम्
Sa tasya tasya sattvasya tattadangamanuttamam
Sambhritya tatsamairangairnirmame striyamuttamam
94.18
स तां विदर्भराजाय पुत्रकामाय ताम्यते
निर्मितामात्मनोऽर्थाय मुनिः प्रादान्महातपाः
Sa tam vidarbharajaya putrakamaya tamyate
Nirmitamatmanorthaya munih pradanmahatapah
94.19
सा तत्र जज्ञे सुभगा विद्युत्सौदामिनी यथा
विभ्राजमाना वपुसा व्यवर्धत शुभानना
Sa tatra jagye subhaga vidyutsaudamini yatha
Vibhrajamana vapusa vyavardhata shubhanana
94.20
जातमात्रां च तां दृष्ट्वा वैदर्भः पृथिवीपतिः
प्रहर्षेण द्विजातिभ्यो न्यवेदयत भारत
Jatamatram cha tam drishtva vaidarbhah prithivipatih
Praharshena dvijatibhyo nyavedayata bharata
94.21
अभ्यनन्दन्त तां सर्वे ब्राह्मणा वसुधाधिप
लोपामुद्रेति तस्याश्च चक्रिरे नाम ते द्विजाः
Abhyanandanta tam sarve brahmana vasudhadhipa
Lopamudreti tasyashcha chakrire nama te dvijah
94.22
ववृधे सा महाराज बिभ्रती रूपमुत्तमम्
अप्स्विवोत्पलिनी शीघ्रमग्नेरिव शिखा शुभा
Vavridhe sa maharaja bibhrati rupamuttamam
Apsvivotpalini shighramagneriva shikha shubha
94.23
तां यौवनस्थां राजेन्द्र शतं कन्याः स्वलंकृताः
दाशीशतं च कल्याणीमुपतस्थुर्वशानुगाः
Tam yauvanastham rajendra shatam kanyah svalankritah
Dashishatam cha kalyanimupatasthurvashanugah
94.24
सा स्म दासीशतवृता मध्ये कन्याशतस्य च
आस्ते तेजस्विनी कन्या रोहिणीव दिवि प्रभो
Sa sma dasishatavrita madhye kanyashatasya cha
Aste tejasvini kanya rohiniva divi prabho
94.25
यौवनस्थामपि च तां शीलाचारसमन्विताम्
न वव्रे पुरुषः कश्चिद्भयात्तस्य महात्मनः
Yauvanasthamapi cha tam shilacharasamanvitam
Na vavre purushah kashchidbhayattasya mahatmanah
94.26
सा तु सत्यवती कन्या रूपेणाप्सरसोऽप्यति
तोषयामास पितरं शीलेन स्वजनं तथा
Sa tu satyavati kanya rupenapsarasopyati
Toshayamasa pitaram shilena svajanam tatha
94.27
वैदर्भीं तु तथायुक्तां युवतीं प्रेक्ष्य वै पिता
मनसा चिन्तयामास कस्मै दद्यां सुतामिति
Vaidarbhim tu tathayuktam yuvatim prekshya vai pita
Manasa chintayamasa kasmai dadyam sutamiti