UtshovChapter 114
114.1
वैशंपायन उवाच
ततः प्रयातः कौशिक्याः पाण्डवो जनमेजय
आनुपूर्व्येण सर्वाणि जगामायतनान्युत
Vaishampayana uvacha
Tatah prayatah kaushikyah pandavo janamejaya
Anupurvyena sarvani jagamayatananyuta
114.2
स सागरं समासाद्य गङ्गायाः संगमे नृप
नदीशतानां पञ्चानां मध्ये चक्रे समाप्लवम्
Sa sagaram samasadya gangayah sangame nripa
Nadishatanam panchanam madhye chakre samaplavam
114.3
ततः समुद्रतीरेण जगाम वसुधाधिपः
भ्रातृभिः सहितो वीरः कलिङ्गान्प्रति भारत
Tatah samudratirena jagama vasudhadhipah
Bhratribhih sahito virah kalinganprati bharata
114.4
लोमश उवाच
एते कलिङ्गाः कौन्तेय यत्र वैतरणी नदी
यत्रायजत धर्मोऽपि देवाञ्शरणमेत्य वै
Lomasha uvacha
Ete kalingah kaunteya yatra vaitarani nadi
Yatrayajata dharmopi devansharanametya vai
114.5
ऋषिभिः समुपायुक्तं यज्ञियं गिरिशोभितम्
उत्तरं तीरमेतद्धि सततं द्विजसेवितम्
Rishibhih samupayuktam yagyiyam girishobhitam
Uttaram tirametaddhi satatam dvijasevitam
114.6
समेन देवयानेन पथा स्वर्गमुपेयुषः
अत्र वै ऋषयोऽन्येऽपि पुरा क्रतुभिरीजिरे
Samena devayanena patha svargamupeyushah
Atra vai rishayonyepi pura kratubhirijire
114.7
अत्रैव रुद्रो राजेन्द्र पशुमादत्तवान्मखे
रुद्रः पशुं मानवेन्द्र भागोऽयमिति चाब्रवीत्
Atraiva rudro rajendra pashumadattavanmakhe
Rudrah pashum manavendra bhagoyamiti chabravit
114.8
हृते पशौ तदा देवास्तमूचुर्भरतर्षभ
मा परस्वमभिद्रोग्धा मा धर्मान्सकलान्नशीः
Hrite pashau tada devastamuchurbharatarshabha
Ma parasvamabhidrogdha ma dharmansakalannashih
114.9
ततः कल्याणरूपाभिर्वाग्भिस्ते रुद्रमस्तुवन्
इष्ट्या चैनं तर्पयित्वा मानयां चक्रिरे तदा
Tatah kalyanarupabhirvagbhiste rudramastuvan
Ishtya chainam tarpayitva manayam chakrire tada
114.10
ततः स पशुमुत्सृज्य देवयानेन जग्मिवान्
अत्रानुवंशो रुद्रस्य तं निबोध युधिष्ठिर
Tatah sa pashumutsrijya devayanena jagmivan
Atranuvansho rudrasya tam nibodha yudhishthira
114.11
अयातयामं सर्वेभ्यो भागेभ्यो भागमुत्तमम्
देवाः संकल्पयामासुर्भयाद्रुद्रस्य शाश्वतम्
Ayatayamam sarvebhyo bhagebhyo bhagamuttamam
Devah sankalpayamasurbhayadrudrasya shashvatam
114.12
इमां गाथामत्र गायन्नपः स्पृशति यो नरः
देवयानस्तस्य पन्थाश्चक्षुश्चैव प्रकाशते
Imam gathamatra gayannapah sprishati yo narah
Devayanastasya panthashchakshushchaiva prakashate
114.13
वैशंपायन उवाच
ततो वैतरणीं सर्वे पाण्डवा द्रौपदी तथा
अवतीर्य महाभागा तर्पयां चक्रिरे पितॄन्
Vaishampayana uvacha
Tato vaitaranim sarve pandava draupadi tatha
Avatirya mahabhaga tarpayam chakrire pitrin
114.14
युधिष्ठिर उवाच
उपस्पृश्यैव भगवन्नस्यां नद्यां तपोधन
मानुषादस्मि विषयादपेतः पश्य लोमश
Yudhishthira uvacha
Upasprishyaiva bhagavannasyam nadyam tapodhana
Manushadasmi vishayadapetah pashya lomasha
114.15
सर्वाँल्लोकान्प्रपश्यामि प्रसादात्तव सुव्रत
वैखानसानां जपतामेष शब्दो महात्मनाम्
Sarvanllokanprapashyami prasadattava suvrata
Vaikhanasanam japatamesha shabdo mahatmanam
114.16
लोमश उवाच
त्रिशतं वै सहस्राणि योजनानां युधिष्ठिर
यत्र ध्वनिं शृणोष्येनं तूष्णीमास्स्व विशां पते
Lomasha uvacha
Trishatam vai sahasrani yojananam yudhishthira
Yatra dhvanim shrinoshyenam tushnimassva visham pate
114.17
एतत्स्वयंभुवो राजन्वनं रम्यं प्रकाशते
यत्रायजत कौन्तेय विश्वकर्मा प्रतापवान्
Etatsvayambhuvo rajanvanam ramyam prakashate
Yatrayajata kaunteya vishvakarma pratapavan
114.18
यस्मिन्यज्ञे हि भूर्दत्ता कश्यपाय महात्मने
सपर्वतवनोद्देशा दक्षिणा वै स्वयंभुवा
Yasminyagye hi bhurdatta kashyapaya mahatmane
Saparvatavanoddesha dakshina vai svayambhuva
114.19
अवासीदच्च कौन्तेय दत्तमात्रा मही तदा
उवाच चापि कुपिता लोकेश्वरमिदं प्रभुम्
Avasidachcha kaunteya dattamatra mahi tada
Uvacha chapi kupita lokeshvaramidam prabhum
114.20
न मां मर्त्याय भगवन्कस्मैचिद्दातुमर्हसि
प्रदानं मोघमेतत्ते यास्याम्येषा रसातलम्
Na mam martyaya bhagavankasmaichiddatumarhasi
Pradanam moghametatte yasyamyesha rasatalam
114.21
विषीदन्तीं तु तां दृष्ट्वा कश्यपो भगवानृषिः
प्रसादयां बभूवाथ ततो भूमिं विशां पते
Vishidantim tu tam drishtva kashyapo bhagavanrishih
Prasadayam babhuvatha tato bhumim visham pate
114.22
ततः प्रसन्ना पृथिवी तपसा तस्य पाण्डव
पुनरुन्मज्ज्य सलिलाद्वेदीरूपा स्थिता बभौ
Tatah prasanna prithivi tapasa tasya pandava
Punarunmajjya saliladvedirupa sthita babhau
114.23
सैषा प्रकाशते राजन्वेदी संस्थानलक्षणा
आरुह्यात्र महाराज वीर्यवान्वै भविष्यसि
Saisha prakashate rajanvedi sansthanalakshana
Aruhyatra maharaja viryavanvai bhavishyasi
114.24
अहं च ते स्वस्त्ययनं प्रयोक्ष्ये; यथा त्वमेनामधिरोक्ष्यसेऽद्य
स्पृष्टा हि मर्त्येन ततः समुद्र;मेषा वेदी प्रविशत्याजमीढ
Aham cha te svastyayanam prayokshye; yatha tvamenamadhirokshyasedya
Sprishta hi martyena tatah samudra;mesha vedi pravishatyajamidha
114.25
अग्निर्मित्रो योनिरापोऽथ देव्यो; विष्णो रेतस्त्वममृतस्य नाभिः
एवं ब्रुवन्पाण्डव सत्यवाक्यं; वेदीमिमां त्वं तरसाधिरोह
Agnirmitro yonirapotha devyo; vishno retastvamamritasya nabhih
Evam bruvanpandava satyavakyam; vedimimam tvam tarasadhiroha
114.26
वैशंपायन उवाच
ततः कृतस्वस्त्ययनो महात्मा; युधिष्ठिरः सागरगामगच्छत्
कृत्वा च तच्छासनमस्य सर्वं; महेन्द्रमासाद्य निशामुवास
Vaishampayana uvacha
Tatah kritasvastyayano mahatma; yudhishthirah sagaragamagachchhat
Kritva cha tachchhasanamasya sarvam; mahendramasadya nishamuvasa