UtshovChapter 124
124.1
लोमश उवाच
ततः श्रुत्वा तु शर्यातिर्वयःस्थं च्यवनं कृतम्
संहृष्टः सेनया सार्धमुपायाद्भार्गवाश्रमम्
Lomasha uvacha
Tatah shrutva tu sharyatirvayahstham chyavanam kritam
Sanhrishtah senaya sardhamupayadbhargavashramam
124.2
च्यवनं च सुकन्यां च दृष्ट्वा देवसुताविव
रेमे महीपः शर्यातिः कृत्स्नां प्राप्य महीमिव
Chyavanam cha sukanyam cha drishtva devasutaviva
Reme mahipah sharyatih kritsnam prapya mahimiva
124.3
ऋषिणा सत्कृतस्तेन सभार्यः पृथिवीपतिः
उपोपविष्टः कल्याणीः कथाश्चक्रे महामनाः
Rishina satkritastena sabharyah prithivipatih
Upopavishtah kalyanih kathashchakre mahamanah
124.4
अथैनं भार्गवो राजन्नुवाच परिसान्त्वयन्
याजयिष्यामि राजंस्त्वां संभारानुपकल्पय
Athainam bhargavo rajannuvacha parisantvayan
Yajayishyami rajanstvam sambharanupakalpaya
124.5
ततः परमसंहृष्टः शर्यातिः पृथिवीपतिः
च्यवनस्य महाराज तद्वाक्यं प्रत्यपूजयत्
Tatah paramasanhrishtah sharyatih prithivipatih
Chyavanasya maharaja tadvakyam pratyapujayat
124.6
प्रशस्तेऽहनि यज्ञीये सर्वकामसमृद्धिमत्
कारयामास शर्यातिर्यज्ञायतनमुत्तमम्
Prashastehani yagyiye sarvakamasamriddhimat
Karayamasa sharyatiryagyayatanamuttamam
124.7
तत्रैनं च्यवनो राजन्याजयामास भार्गवः
अद्भुतानि च तत्रासन्यानि तानि निबोध मे
Tatrainam chyavano rajanyajayamasa bhargavah
Adbhutani cha tatrasanyani tani nibodha me
124.8
अगृह्णाच्च्यवनः सोममश्विनोर्देवयोस्तदा
तमिन्द्रो वारयामास गृह्यमाणं तयोर्ग्रहम्
Agrihnachchyavanah somamashvinordevayostada
Tamindro varayamasa grihyamanam tayorgraham
124.9
इन्द्र उवाच
उभावेतौ न सोमार्हौ नासत्याविति मे मतिः
भिषजौ देवपुत्राणां कर्मणा नैवमर्हतः
Indra uvacha
Ubhavetau na somarhau nasatyaviti me matih
Bhishajau devaputranam karmana naivamarhatah
124.10
च्यवन उवाच
मावमंस्था महात्मानौ रूपद्रविणवत्तरौ
यौ चक्रतुर्मां मघवन्वृन्दारकमिवाजरम्
Chyavana uvacha
Mavamanstha mahatmanau rupadravinavattarau
Yau chakraturmam maghavanvrindarakamivajaram
124.11
ऋते त्वां विबुधांश्चान्यान्कथं वै नार्हतः सवम्
अश्विनावपि देवेन्द्र देवौ विद्धि पुरंदर
Rite tvam vibudhanshchanyankatham vai narhatah savam
Ashvinavapi devendra devau viddhi purandara
124.12
इन्द्र उवाच
चिकित्सकौ कर्मकरौ कामरूपसमन्वितौ
लोके चरन्तौ मर्त्यानां कथं सोममिहार्हतः
Indra uvacha
Chikitsakau karmakarau kamarupasamanvitau
Loke charantau martyanam katham somamiharhatah
124.13
लोमश उवाच
एतदेव यदा वाक्यमाम्रेडयति वासवः
अनादृत्य ततः शक्रं ग्रहं जग्राह भार्गवः
Lomasha uvacha
Etadeva yada vakyamamredayati vasavah
Anadritya tatah shakram graham jagraha bhargavah
124.14
ग्रहीष्यन्तं तु तं सोममश्विनोरुत्तमं तदा
समीक्ष्य बलभिद्देव इदं वचनमब्रवीत्
Grahishyantam tu tam somamashvinoruttamam tada
Samikshya balabhiddeva idam vachanamabravit
124.15
आभ्यामर्थाय सोमं त्वं ग्रहीष्यसि यदि स्वयम्
वज्रं ते प्रहरिष्यामि घोररूपमनुत्तमम्
Abhyamarthaya somam tvam grahishyasi yadi svayam
Vajram te praharishyami ghorarupamanuttamam
124.16
एवमुक्तः स्मयन्निन्द्रमभिवीक्ष्य स भार्गवः
जग्राह विधिवत्सोममश्विभ्यामुत्तमं ग्रहम्
Evamuktah smayannindramabhivikshya sa bhargavah
Jagraha vidhivatsomamashvibhyamuttamam graham
124.17
ततोऽस्मै प्राहरद्वज्रं घोररूपं शचीपतिः
तस्य प्रहरतो बाहुं स्तम्भयामास भार्गवः
Tatosmai praharadvajram ghorarupam shachipatih
Tasya praharato bahum stambhayamasa bhargavah
124.18
संस्तम्भयित्वा च्यवनो जुहुवे मन्त्रतोऽनलम्
कृत्यार्थी सुमहातेजा देवं हिंसितुमुद्यतः
Sanstambhayitva chyavano juhuve mantratonalam
Krityarthi sumahateja devam hinsitumudyatah
124.19
ततः कृत्या समभवदृषेस्तस्य तपोबलात्
मदो नाम महावीर्यो बृहत्कायो महासुरः
शरीरं यस्य निर्देष्टुमशक्यं तु सुरासुरैः
Tatah kritya samabhavadrishestasya tapobalat
Mado nama mahaviryo brihatkayo mahasurah
Shariram yasya nirdeshtumashakyam tu surasuraih
124.20
तस्यास्यमभवद्घोरं तीक्ष्णाग्रदशनं महत्
हनुरेका स्थिता तस्य भूमावेका दिवं गता
Tasyasyamabhavadghoram tikshnagradashanam mahat
Hanureka sthita tasya bhumaveka divam gata
124.21
चतस्र आयता दंष्ट्रा योजनानां शतं शतम्
इतरे त्वस्य दशना बभूवुर्दशयोजनाः
प्राकारसदृशाकाराः शूलाग्रसमदर्शनाः
Chatasra ayata danshtra yojananam shatam shatam
Itare tvasya dashana babhuvurdashayojanah
Prakarasadrishakarah shulagrasamadarshanah
124.22
बाहू पर्वतसंकाशावायतावयुतं समौ
नेत्रे रविशशिप्रख्ये वक्त्रमन्तकसंनिभम्
Bahu parvatasankashavayatavayutam samau
Netre ravishashiprakhye vaktramantakasannibham
124.23
लेलिहञ्जिह्वया वक्त्रं विद्युच्चपललोलया
व्यात्ताननो घोरदृष्टिर्ग्रसन्निव जगद्बलात्
Lelihanjihvaya vaktram vidyuchchapalalolaya
Vyattanano ghoradrishtirgrasanniva jagadbalat
124.24
स भक्षयिष्यन्संक्रुद्धः शतक्रतुमुपाद्रवत्
महता घोररूपेण लोकाञ्शब्देन नादयन्
Sa bhakshayishyansankruddhah shatakratumupadravat
Mahata ghorarupena lokanshabdena nadayan