UtshovChapter 125
125.1
लोमश उवाच
तं दृष्ट्वा घोरवदनं मदं देवः शतक्रतुः
आयान्तं भक्षयिष्यन्तं व्यात्ताननमिवान्तकम्
Lomasha uvacha
Tam drishtva ghoravadanam madam devah shatakratuh
Ayantam bhakshayishyantam vyattananamivantakam
125.2
भयात्संस्तम्भितभुजः सृक्किणी लेलिहन्मुहुः
ततोऽब्रवीद्देवराजश्च्यवनं भयपीडितः
Bhayatsanstambhitabhujah srikkini lelihanmuhuh
Tatobraviddevarajashchyavanam bhayapiditah
125.3
सोमार्हावश्विनावेतावद्य प्रभृति भार्गव
भविष्यतः सत्यमेतद्वचो ब्रह्मन्ब्रवीमि ते
Somarhavashvinavetavadya prabhriti bhargava
Bhavishyatah satyametadvacho brahmanbravimi te
125.4
न ते मिथ्या समारम्भो भवत्वेष परो विधिः
जानामि चाहं विप्रर्षे न मिथ्या त्वं करिष्यसि
Na te mithya samarambho bhavatvesha paro vidhih
Janami chaham viprarshe na mithya tvam karishyasi
125.5
सोमार्हावश्विनावेतौ यथैवाद्य कृतौ त्वया
भूय एव तु ते वीर्यं प्रकाशेदिति भार्गव
Somarhavashvinavetau yathaivadya kritau tvaya
Bhuya eva tu te viryam prakashediti bhargava
125.6
सुकन्यायाः पितुश्चास्य लोके कीर्तिः प्रथेदिति
अतो मयैतद्विहितं तव वीर्यप्रकाशनम्
तस्मात्प्रसादं कुरु मे भवत्वेतद्यथेच्छसि
Sukanyayah pitushchasya loke kirtih prathediti
Ato mayaitadvihitam tava viryaprakashanam
Tasmatprasadam kuru me bhavatvetadyathechchhasi
125.7
एवमुक्तस्य शक्रेण च्यवनस्य महात्मनः
स मन्युर्व्यगमच्छीघ्रं मुमोच च पुरंदरम्
Evamuktasya shakrena chyavanasya mahatmanah
Sa manyurvyagamachchhighram mumocha cha purandaram
125.8
मदं च व्यभजद्राजन्पाने स्त्रीषु च वीर्यवान्
अक्षेषु मृगयायां च पूर्वसृष्टं पुनः पुनः
Madam cha vyabhajadrajanpane strishu cha viryavan
Aksheshu mrigayayam cha purvasrishtam punah punah
125.9
तथा मदं विनिक्षिप्य शक्रं संतर्प्य चेन्दुना
अश्विभ्यां सहितान्देवान्याजयित्वा च तं नृपम्
Tatha madam vinikshipya shakram santarpya chenduna
Ashvibhyam sahitandevanyajayitva cha tam nripam
125.10
विख्याप्य वीर्यं सर्वेषु लोकेषु वदतां वरः
सुकन्यया सहारण्ये विजहारानुरक्तया
Vikhyapya viryam sarveshu lokeshu vadatam varah
Sukanyaya saharanye vijaharanuraktaya
125.11
तस्यैतद्द्विजसंघुष्टं सरो राजन्प्रकाशते
अत्र त्वं सह सोदर्यैः पितॄन्देवांश्च तर्पय
Tasyaitaddvijasanghushtam saro rajanprakashate
Atra tvam saha sodaryaih pitrindevanshcha tarpaya
125.12
एतद्दृष्ट्वा महीपाल सिकताक्षं च भारत
सैन्धवारण्यमासाद्य कुल्यानां कुरु दर्शनम्
पुष्करेषु महाराज सर्वेषु च जलं स्पृश
Etaddrishtva mahipala sikataksham cha bharata
Saindhavaranyamasadya kulyanam kuru darshanam
Pushkareshu maharaja sarveshu cha jalam sprisha
125.13
आर्चीकपर्वतश्चैव निवासो वै मनीषिणाम्
सदाफलः सदास्रोतो मरुतां स्थानमुत्तमम्
चैत्याश्चैते बहुशतास्त्रिदशानां युधिष्ठिर
Archikaparvatashchaiva nivaso vai manishinam
Sadaphalah sadasroto marutam sthanamuttamam
Chaityashchaite bahushatastridashanam yudhishthira
125.14
एतच्चन्द्रमसस्तीर्थमृषयः पर्युपासते
वैखानसाश्च ऋषयो वालखिल्यास्तथैव च
Etachchandramasastirthamrishayah paryupasate
Vaikhanasashcha rishayo valakhilyastathaiva cha
125.15
शृङ्गाणि त्रीणि पुण्याणि त्रीणि प्रस्रवणानि च
सर्वाण्यनुपरिक्रम्य यथाकाममुपस्पृश
Shringani trini punyani trini prasravanani cha
Sarvanyanuparikramya yathakamamupasprisha
125.16
शंतनुश्चात्र कौन्तेय शुनकश्च नराधिप
नरनारायणौ चोभौ स्थानं प्राप्ताः सनातनम्
Shantanushchatra kaunteya shunakashcha naradhipa
Naranarayanau chobhau sthanam praptah sanatanam
125.17
इह नित्यशया देवाः पितरश्च महर्षिभिः
आर्चीकपर्वते तेपुस्तान्यजस्व युधिष्ठिर
Iha nityashaya devah pitarashcha maharshibhih
Archikaparvate tepustanyajasva yudhishthira
125.18
इह ते वै चरून्प्राश्नन्नृषयश्च विशां पते
यमुना चाक्षयस्रोताः कृष्णश्चेह तपोरतः
Iha te vai charunprashnannrishayashcha visham pate
Yamuna chakshayasrotah krishnashcheha taporatah
125.19
यमौ च भीमसेनश्च कृष्णा चामित्रकर्शन
सर्वे चात्र गमिष्यामः सुकृशाः सुतपस्विनः
Yamau cha bhimasenashcha krishna chamitrakarshana
Sarve chatra gamishyamah sukrishah sutapasvinah
125.20
एतत्प्रस्रवणं पुण्यमिन्द्रस्य मनुजाधिप
यत्र धाता विधाता च वरुणश्चोर्ध्वमागताः
Etatprasravanam punyamindrasya manujadhipa
Yatra dhata vidhata cha varunashchordhvamagatah
125.21
इह ते न्यवसन्राजन्क्षान्ताः परमधर्मिणः
मैत्राणामृजुबुद्धीनामयं गिरिवरः शुभः
Iha te nyavasanrajankshantah paramadharminah
Maitranamrijubuddhinamayam girivarah shubhah
125.22
एषा सा यमुना राजन्राजर्षिगणसेविता
नानायज्ञचिता राजन्पुण्या पापभयापहा
Esha sa yamuna rajanrajarshiganasevita
Nanayagyachita rajanpunya papabhayapaha
125.23
अत्र राजा महेष्वासो मान्धातायजत स्वयम्
सहदेवश्च कौन्तेय सोमको ददतां वरः
Atra raja maheshvaso mandhatayajata svayam
Sahadevashcha kaunteya somako dadatam varah