UtshovChapter 128
128.1
सोमक उवाच
ब्रह्मन्यद्यद्यथा कार्यं तत्तत्कुरु तथा तथा
पुत्रकामतया सर्वं करिष्यामि वचस्तव
Somaka uvacha
Brahmanyadyadyatha karyam tattatkuru tatha tatha
Putrakamataya sarvam karishyami vachastava
128.2
लोमश उवाच
ततः स याजयामास सोमकं तेन जन्तुना
मातरस्तु बलात्पुत्रमपाकर्षुः कृपान्विताः
Lomasha uvacha
Tatah sa yajayamasa somakam tena jantuna
Matarastu balatputramapakarshuh kripanvitah
128.3
हा हताः स्मेति वाशन्त्यस्तीव्रशोकसमन्विताः
तं मातरः प्रत्यकर्षन्गृहीत्वा दक्षिणे करे
सव्ये पाणौ गृहीत्वा तु याजकोऽपि स्म कर्षति
Ha hatah smeti vashantyastivrashokasamanvitah
Tam matarah pratyakarshangrihitva dakshine kare
Savye panau grihitva tu yajakopi sma karshati
128.4
कुररीणामिवार्तानामपाकृष्य तु तं सुतम्
विशस्य चैनं विधिना वपामस्य जुहाव सः
Kurarinamivartanamapakrishya tu tam sutam
Vishasya chainam vidhina vapamasya juhava sah
128.5
वपायां हूयमानायां गन्धमाघ्राय मातरः
आर्ता निपेतुः सहसा पृथिव्यां कुरुनन्दन
सर्वाश्च गर्भानलभंस्ततस्ताः पार्थिवाङ्गनाः
Vapayam huyamanayam gandhamaghraya matarah
Arta nipetuh sahasa prithivyam kurunandana
Sarvashcha garbhanalabhanstatastah parthivanganah
128.6
ततो दशसु मासेषु सोमकस्य विशां पते
जज्ञे पुत्रशतं पूर्णं तासु सर्वासु भारत
Tato dashasu maseshu somakasya visham pate
Jagye putrashatam purnam tasu sarvasu bharata
128.7
जन्तुर्ज्येष्ठः समभवज्जनित्र्यामेव भारत
स तासामिष्ट एवासीन्न तथान्ये निजाः सुताः
Janturjyeshthah samabhavajjanitryameva bharata
Sa tasamishta evasinna tathanye nijah sutah
128.8
तच्च लक्षणमस्यासीत्सौवर्णं पार्श्व उत्तरे
तस्मिन्पुत्रशते चाग्र्यः स बभूव गुणैर्युतः
Tachcha lakshanamasyasitsauvarnam parshva uttare
Tasminputrashate chagryah sa babhuva gunairyutah
128.9
ततः स लोकमगमत्सोमकस्य गुरुः परम्
अथ काले व्यतीते तु सोमकोऽप्यगमत्परम्
Tatah sa lokamagamatsomakasya guruh param
Atha kale vyatite tu somakopyagamatparam
128.10
अथ तं नरके घोरे पच्यमानं ददर्श सः
तमपृच्छत्किमर्थं त्वं नरके पच्यसे द्विज
Atha tam narake ghore pachyamanam dadarsha sah
Tamaprichchhatkimartham tvam narake pachyase dvija
128.11
तमब्रवीद्गुरुः सोऽथ पच्यमानोऽग्निना भृशम्
त्वं मया याजितो राजंस्तस्येदं कर्मणः फलम्
Tamabravidguruh sotha pachyamanognina bhrisham
Tvam maya yajito rajanstasyedam karmanah phalam
128.12
एतच्छ्रुत्वा स राजर्षिर्धर्मराजानमब्रवीत्
अहमत्र प्रवेक्ष्यामि मुच्यतां मम याजकः
मत्कृते हि महाभागः पच्यते नरकाग्निना
Etachchhrutva sa rajarshirdharmarajanamabravit
Ahamatra pravekshyami muchyatam mama yajakah
Matkrite hi mahabhagah pachyate narakagnina
128.13
धर्म उवाच
नान्यः कर्तुः फलं राजन्नुपभुङ्क्ते कदाचन
इमानि तव दृश्यन्ते फलानि ददतां वर
Dharma uvacha
Nanyah kartuh phalam rajannupabhunkte kadachana
Imani tava drishyante phalani dadatam vara
128.14
सोमक उवाच
पुण्यान्न कामये लोकानृतेऽहं ब्रह्मवादिनम्
इच्छाम्यहमनेनैव सह वस्तुं सुरालये
Somaka uvacha
Punyanna kamaye lokanriteham brahmavadinam
Ichchhamyahamanenaiva saha vastum suralaye
128.15
नरके वा धर्मराज कर्मणास्य समो ह्यहम्
पुण्यापुण्यफलं देव सममस्त्वावयोरिदम्
Narake va dharmaraja karmanasya samo hyaham
Punyapunyaphalam deva samamastvavayoridam
128.16
धर्म उवाच
यद्येवमीप्सितं राजन्भुङ्क्ष्वास्य सहितः फलम्
तुल्यकालं सहानेन पश्चात्प्राप्स्यसि सद्गतिम्
Dharma uvacha
Yadyevamipsitam rajanbhunkshvasya sahitah phalam
Tulyakalam sahanena pashchatprapsyasi sadgatim
128.17
लोमश उवाच
स चकार तथा सर्वं राजा राजीवलोचनः
पुनश्च लेभे लोकान्स्वान्कर्मणा निर्जिताञ्शुभान्
सह तेनैव विप्रेण गुरुणा स गुरुप्रियः
Lomasha uvacha
Sa chakara tatha sarvam raja rajivalochanah
Punashcha lebhe lokansvankarmana nirjitanshubhan
Saha tenaiva viprena guruna sa gurupriyah
128.18
एष तस्याश्रमः पुण्यो य एषोऽग्रे विराजते
क्षान्त उष्यात्र षड्रात्रं प्राप्नोति सुगतिं नरः
Esha tasyashramah punyo ya eshogre virajate
Kshanta ushyatra shadratram prapnoti sugatim narah
128.19
एतस्मिन्नपि राजेन्द्र वत्स्यामो विगतज्वराः
षड्रात्रं नियतात्मानः सज्जीभव कुरूद्वह
Etasminnapi rajendra vatsyamo vigatajvarah
Shadratram niyatatmanah sajjibhava kurudvaha