UtshovChapter 129
129.1
लोमश उवाच
अस्मिन्किल स्वयं राजन्निष्टवान्वै प्रजापतिः
सत्रमिष्टीकृतं नाम पुरा वर्षसहस्रिकम्
Lomasha uvacha
Asminkila svayam rajannishtavanvai prajapatih
Satramishtikritam nama pura varshasahasrikam
129.2
अम्बरीषश्च नाभाग इष्टवान्यमुनामनु
यज्ञैश्च तपसा चैव परां सिद्धिमवाप सः
Ambarishashcha nabhaga ishtavanyamunamanu
Yagyaishcha tapasa chaiva param siddhimavapa sah
129.3
देशो नाहुषयज्ञानामयं पुण्यतमो नृप
यत्रेष्ट्वा दश पद्मानि सदस्येभ्यो निसृष्टवान्
Desho nahushayagyanamayam punyatamo nripa
Yatreshtva dasha padmani sadasyebhyo nisrishtavan
129.4
सार्वभौमस्य कौन्तेय ययातेरमितौजसः
स्पर्धमानस्य शक्रेण पश्येदं यज्ञवास्त्विह
Sarvabhaumasya kaunteya yayateramitaujasah
Spardhamanasya shakrena pashyedam yagyavastviha
129.5
पश्य नानाविधाकारैरग्निभिर्निचितां महीम्
मज्जन्तीमिव चाक्रान्तां ययातेर्यज्ञकर्मभिः
Pashya nanavidhakarairagnibhirnichitam mahim
Majjantimiva chakrantam yayateryagyakarmabhih
129.6
एषा शम्येकपत्रा सा शरकं चैतदुत्तमम्
पश्य रामह्रदानेतान्पश्य नारायणाश्रमम्
Esha shamyekapatra sa sharakam chaitaduttamam
Pashya ramahradanetanpashya narayanashramam
129.7
एतदार्चीकपुत्रस्य योगैर्विचरतो महीम्
अपसर्पणं महीपाल रौप्यायाममितौजसः
Etadarchikaputrasya yogairvicharato mahim
Apasarpanam mahipala raupyayamamitaujasah
129.8
अत्रानुवंशं पठतः शृणु मे कुरुनन्दन
उलूखलैराभरणैः पिशाची यदभाषत
Atranuvansham pathatah shrinu me kurunandana
Ulukhalairabharanaih pishachi yadabhashata
129.9
युगंधरे दधि प्राश्य उषित्वा चाच्युतस्थले
तद्वद्भूतिलये स्नात्वा सपुत्रा वस्तुमिच्छसि
Yugandhare dadhi prashya ushitva chachyutasthale
Tadvadbhutilaye snatva saputra vastumichchhasi
129.10
एकरात्रमुषित्वेह द्वितीयं यदि वत्स्यसि
एतद्वै ते दिवा वृत्तं रात्रौ वृत्तमतोऽन्यथा
Ekaratramushitveha dvitiyam yadi vatsyasi
Etadvai te diva vrittam ratrau vrittamatonyatha
129.11
अत्राद्याहो निवत्स्यामः क्षपां भरतसत्तम
द्वारमेतद्धि कौन्तेय कुरुक्षेत्रस्य भारत
Atradyaho nivatsyamah kshapam bharatasattama
Dvarametaddhi kaunteya kurukshetrasya bharata
129.12
अत्रैव नाहुषो राजा राजन्क्रतुभिरिष्टवान्
ययातिर्बहुरत्नाढ्यैर्यत्रेन्द्रो मुदमभ्यगात्
Atraiva nahusho raja rajankratubhirishtavan
Yayatirbahuratnadhyairyatrendro mudamabhyagat
129.13
एतत्प्लक्षावतरणं यमुनातीर्थमुच्यते
एतद्वै नाकपृष्ठस्य द्वारमाहुर्मनीषिणः
Etatplakshavataranam yamunatirthamuchyate
Etadvai nakaprishthasya dvaramahurmanishinah
129.14
अत्र सारस्वतैर्यज्ञैरीजानाः परमर्षयः
यूपोलूखलिनस्तात गच्छन्त्यवभृथाप्लवम्
Atra sarasvatairyagyairijanah paramarshayah
Yupolukhalinastata gachchhantyavabhrithaplavam
129.15
अत्रैव भरतो राजा मेध्यमश्वमवासृजत्
असकृत्कृष्णसारङ्गं धर्मेणावाप्य मेदिनीम्
Atraiva bharato raja medhyamashvamavasrijat
Asakritkrishnasarangam dharmenavapya medinim
129.16
अत्रैव पुरुषव्याघ्र मरुत्तः सत्रमुत्तमम्
आस्ते देवर्षिमुख्येन संवर्तेनाभिपालितः
Atraiva purushavyaghra maruttah satramuttamam
Aste devarshimukhyena sanvartenabhipalitah
129.17
अत्रोपस्पृश्य राजेन्द्र सर्वाँल्लोकान्प्रपश्यति
पूयते दुष्कृताच्चैव समुपस्पृश्य भारत
Atropasprishya rajendra sarvanllokanprapashyati
Puyate dushkritachchaiva samupasprishya bharata
129.18
वैशंपायन उवाच
तत्र सभ्रातृकः स्नात्वा स्तूयमानो महर्षिभिः
लोमशं पाण्डवश्रेष्ठ इदं वचनमब्रवीत्
Vaishampayana uvacha
Tatra sabhratrikah snatva stuyamano maharshibhih
Lomasham pandavashreshtha idam vachanamabravit
129.19
सर्वाँल्लोकान्प्रपश्यामि तपसा सत्यविक्रम
इहस्थः पाण्डवश्रेष्ठं पश्यामि श्वेतवाहनम्
Sarvanllokanprapashyami tapasa satyavikrama
Ihasthah pandavashreshtham pashyami shvetavahanam
129.20
लोमश उवाच
एवमेतन्महाबाहो पश्यन्ति परमर्षयः
सरस्वतीमिमां पुण्यां पश्यैकशरणावृताम्
Lomasha uvacha
Evametanmahabaho pashyanti paramarshayah
Sarasvatimimam punyam pashyaikasharanavritam
129.21
यत्र स्नात्वा नरश्रेष्ठ धूतपाप्मा भविष्यति
इह सारस्वतैर्यज्ञैरिष्टवन्तः सुरर्षयः
ऋषयश्चैव कौन्तेय तथा राजर्षयोऽपि च
Yatra snatva narashreshtha dhutapapma bhavishyati
Iha sarasvatairyagyairishtavantah surarshayah
Rishayashchaiva kaunteya tatha rajarshayopi cha
129.22
वेदी प्रजापतेरेषा समन्तात्पञ्चयोजना
कुरोर्वै यज्ञशीलस्य क्षेत्रमेतन्महात्मनः
Vedi prajapateresha samantatpanchayojana
Kurorvai yagyashilasya kshetrametanmahatmanah