UtshovChapter 130
130.1
लोमश उवाच
इह मर्त्यास्तपस्तप्त्वा स्वर्गं गच्छन्ति भारत
मर्तुकामा नरा राजन्निहायान्ति सहस्रशः
Lomasha uvacha
Iha martyastapastaptva svargam gachchhanti bharata
Martukama nara rajannihayanti sahasrashah
130.2
एवमाशीः प्रयुक्ता हि दक्षेण यजता पुरा
इह ये वै मरिष्यन्ति ते वै स्वर्गजितो नराः
Evamashih prayukta hi dakshena yajata pura
Iha ye vai marishyanti te vai svargajito narah
130.3
एषा सरस्वती पुण्या दिव्या चोघवती नदी
एतद्विनशनं नाम सरस्वत्या विशां पते
Esha sarasvati punya divya choghavati nadi
Etadvinashanam nama sarasvatya visham pate
130.4
द्वारं निषादराष्ट्रस्य येषां द्वेषात्सरस्वती
प्रविष्टा पृथिवीं वीर मा निषादा हि मां विदुः
Dvaram nishadarashtrasya yesham dveshatsarasvati
Pravishta prithivim vira ma nishada hi mam viduh
130.5
एष वै चमसोद्भेदो यत्र दृश्या सरस्वती
यत्रैनामभ्यवर्तन्त दिव्याः पुण्याः समुद्रगाः
Esha vai chamasodbhedo yatra drishya sarasvati
Yatrainamabhyavartanta divyah punyah samudragah
130.6
एतत्सिन्धोर्महत्तीर्थं यत्रागस्त्यमरिंदम
लोपामुद्रा समागम्य भर्तारमवृणीत वै
Etatsindhormahattirtham yatragastyamarindama
Lopamudra samagamya bhartaramavrinita vai
130.7
एतत्प्रभासते तीर्थं प्रभासं भास्करद्युते
इन्द्रस्य दयितं पुण्यं पवित्रं पापनाशनम्
Etatprabhasate tirtham prabhasam bhaskaradyute
Indrasya dayitam punyam pavitram papanashanam
130.8
एतद्विष्णुपदं नाम दृश्यते तीर्थमुत्तमम्
एषा रम्या विपाशा च नदी परमपावनी
Etadvishnupadam nama drishyate tirthamuttamam
Esha ramya vipasha cha nadi paramapavani
130.9
अत्रैव पुत्रशोकेन वसिष्ठो भगवानृषिः
बद्ध्वात्मानं निपतितो विपाशः पुनरुत्थितः
Atraiva putrashokena vasishtho bhagavanrishih
Baddhvatmanam nipatito vipashah punarutthitah
130.10
काश्मीरमण्डलं चैतत्सर्वपुण्यमरिंदम
महर्षिभिश्चाध्युषितं पश्येदं भ्रातृभिः सह
Kashmiramandalam chaitatsarvapunyamarindama
Maharshibhishchadhyushitam pashyedam bhratribhih saha
130.11
अत्रोत्तराणां सर्वेषामृषीणां नाहुषस्य च
अग्नेश्चात्रैव संवादः काश्यपस्य च भारत
Atrottaranam sarveshamrishinam nahushasya cha
Agneshchatraiva sanvadah kashyapasya cha bharata
130.12
एतद्द्वारं महाराज मानसस्य प्रकाशते
वर्षमस्य गिरेर्मध्ये रामेण श्रीमता कृतम्
Etaddvaram maharaja manasasya prakashate
Varshamasya girermadhye ramena shrimata kritam
130.13
एष वातिकषण्डो वै प्रख्यातः सत्यविक्रमः
नाभ्यवर्तत यद्द्वारं विदेहानुत्तरं च यः
Esha vatikashando vai prakhyatah satyavikramah
Nabhyavartata yaddvaram videhanuttaram cha yah
130.14
एष उज्जानको नाम यवक्रीर्यत्र शान्तवान्
अरुन्धतीसहायश्च वसिष्ठो भगवानृषिः
Esha ujjanako nama yavakriryatra shantavan
Arundhatisahayashcha vasishtho bhagavanrishih
130.15
ह्रदश्च कुशवानेष यत्र पद्मं कुशेशयम्
आश्रमश्चैव रुक्मिण्या यत्राशाम्यदकोपना
Hradashcha kushavanesha yatra padmam kusheshayam
Ashramashchaiva rukminya yatrashamyadakopana
130.16
समाधीनां समासस्तु पाण्डवेय श्रुतस्त्वया
तं द्रक्ष्यसि महाराज भृगुतुङ्गं महागिरिम्
Samadhinam samasastu pandaveya shrutastvaya
Tam drakshyasi maharaja bhrigutungam mahagirim
130.17
जलां चोपजलां चैव यमुनामभितो नदीम्
उशीनरो वै यत्रेष्ट्वा वासवादत्यरिच्यत
Jalam chopajalam chaiva yamunamabhito nadim
Ushinaro vai yatreshtva vasavadatyarichyata
130.18
तां देवसमितिं तस्य वासवश्च विशां पते
अभ्यगच्छत राजानं ज्ञातुमग्निश्च भारत
Tam devasamitim tasya vasavashcha visham pate
Abhyagachchhata rajanam gyatumagnishcha bharata
130.19
जिज्ञासमानौ वरदौ महात्मानमुशीनरम्
इन्द्रः श्येनः कपोतोऽग्निर्भूत्वा यज्ञेऽभिजग्मतुः
Jigyasamanau varadau mahatmanamushinaram
Indrah shyenah kapotognirbhutva yagyebhijagmatuh
130.20
ऊरुं राज्ञः समासाद्य कपोतः श्येनजाद्भयात्
शरणार्थी तदा राजन्निलिल्ये भयपीडितः
Urum ragyah samasadya kapotah shyenajadbhayat
Sharanarthi tada rajannililye bhayapiditah