অধ্যায় 130

130.1

লোমশ উবাচ
ইহ মর্ত্যাস্তপস্তপ্ত্বা স্বর্গং গচ্ছন্তি ভারত
মর্তুকামা নরা রাজন্নিহায়ান্তি সহস্রশঃ

এবমাশীঃ প্রয়ুক্তা হি দক্ষেণ যজতা পুরা
ইহ যে বৈ মরিষ্যন্তি তে বৈ স্বর্গজিতো নরাঃ

এষা সরস্বতী পুণ্যা দিব্যা চোঘবতী নদী
এতদ্বিনশনং নাম সরস্বত্যা বিশাং পতে

দ্বারং নিষাদরাষ্ট্রস্য যেষাং দ্বেষাত্সরস্বতী
প্রবিষ্টা পৃথিবীং বীর মা নিষাদা হি মাং বিদুঃ

এষ বৈ চমসোদ্ভেদো যত্র দৃশ্যা সরস্বতী
যত্রৈনামভ্যবর্তন্ত দিব্যাঃ পুণ্যাঃ সমুদ্রগাঃ

এতত্সিন্ধোর্মহত্তীর্থং যত্রাগস্ত্যমরিংদম
লোপামুদ্রা সমাগম্য ভর্তারমবৃণীত বৈ

এতত্প্রভাসতে তীর্থং প্রভাসং ভাস্করদ্যুতে
ইন্দ্রস্য দয়িতং পুণ্যং পবিত্রং পাপনাশনম্

এতদ্বিষ্ণুপদং নাম দৃশ্যতে তীর্থমুত্তমম্
এষা রম্যা বিপাশা চ নদী পরমপাবনী

অত্রৈব পুত্রশোকেন বসিষ্ঠো ভগবানৃষিঃ
বদ্ধ্বাত্মানং নিপতিতো বিপাশঃ পুনরুত্থিতঃ

কাশ্মীরমণ্ডলং চৈতত্সর্বপুণ্যমরিংদম
মহর্ষিভিশ্চাধ্যুষিতং পশ্যেদং ভ্রাতৃভিঃ সহ

অত্রোত্তরাণাং সর্বেষামৃষীণাং নাহুষস্য চ
অগ্নেশ্চাত্রৈব সংবাদঃ কাশ্যপস্য চ ভারত

এতদ্দ্বারং মহারাজ মানসস্য প্রকাশতে
বর্ষমস্য গিরের্মধ্যে রামেণ শ্রীমতা কৃতম্

এষ বাতিকষণ্ডো বৈ প্রখ্যাতঃ সত্যবিক্রমঃ
নাভ্যবর্তত যদ্দ্বারং বিদেহানুত্তরং চ যঃ

এষ উজ্জানকো নাম যবক্রীর্যত্র শান্তবান্
অরুন্ধতীসহায়শ্চ বসিষ্ঠো ভগবানৃষিঃ

হ্রদশ্চ কুশবানেষ যত্র পদ্মং কুশেশয়ম্
আশ্রমশ্চৈব রুক্মিণ্যা যত্রাশাম্যদকোপনা

সমাধীনাং সমাসস্তু পাণ্ডবেয় শ্রুতস্ত্বয়া
তং দ্রক্ষ্যসি মহারাজ ভৃগুতুঙ্গং মহাগিরিম্

জলাং চোপজলাং চৈব যমুনামভিতো নদীম্
উশীনরো বৈ যত্রেষ্ট্বা বাসবাদত্যরিচ্যত

তাং দেবসমিতিং তস্য বাসবশ্চ বিশাং পতে
অভ্যগচ্ছত রাজানং জ্ঞাতুমগ্নিশ্চ ভারত

জিজ্ঞাসমানৌ বরদৌ মহাত্মানমুশীনরম্
ইন্দ্রঃ শ্যেনঃ কপোতোঽগ্নির্ভূত্বা যজ্ঞেঽভিজগ্মতুঃ

ঊরুং রাজ্ঞঃ সমাসাদ্য কপোতঃ শ্যেনজাদ্ভয়াৎ
শরণার্থী তদা রাজন্নিলিল্যে ভয়পীডিতঃ