Utshovঅধ্যায় 131
131.1
শ্যেন উবাচ
ধর্মাত্মানং ত্বাহুরেকং সর্বে রাজন্মহীক্ষিতঃ
স বৈ ধর্মবিরুদ্ধং ত্বং কস্মাত্কর্ম চিকীর্ষসি
131.2
বিহিতং ভক্ষণং রাজন্পীড্যমানস্য মে ক্ষুধা
মা ভাঙ্ক্ষীর্ধর্মলোভেন ধর্মমুত্সৃষ্টবানসি
131.3
রাজোবাচ
সংত্রস্তরূপস্ত্রাণার্থী ত্বত্তো ভীতো মহাদ্বিজ
মত্সকাশমনুপ্রাপ্তঃ প্রাণগৃধ্নুরয়ং দ্বিজঃ
131.4
এবমভ্যাগতস্যেহ কপোতস্যাভয়ার্থিনঃ
অপ্রদানে পরোঽধর্মঃ কিং ত্বং শ্যেন প্রপশ্যসি
131.5
প্রস্পন্দমানঃ সংভ্রান্তঃ কপোতঃ শ্যেন লক্ষ্যতে
মত্সকাশং জীবিতার্থী তস্য ত্যাগো বিগর্হিতঃ
131.6
শ্যেন উবাচ
আহারাত্সর্বভূতানি সংভবন্তি মহীপতে
আহারেণ বিবর্ধন্তে তেন জীবন্তি জন্তবঃ
131.7
শক্যতে দুস্ত্যজেঽপ্যর্থে চিররাত্রায় জীবিতুম্
ন তু ভোজনমুত্সৃজ্য শক্যং বর্তয়িতুং চিরম্
131.8
ভক্ষ্যাদ্বিলোপিতস্যাদ্য মম প্রাণা বিশাং পতে
বিসৃজ্য কায়মেষ্যন্তি পন্থানমপুনর্ভবম্
131.9
প্রমৃতে ময়ি ধর্মাত্মন্পুত্রদারং নশিষ্যতি
রক্ষমাণঃ কপোতং ত্বং বহূন্প্রাণান্নশিষ্যসি
131.10
ধর্মং যো বাধতে ধর্মো ন স ধর্মঃ কুধর্ম তৎ
অবিরোধী তু যো ধর্মঃ স ধর্মঃ সত্যবিক্রম
131.11
বিরোধিষু মহীপাল নিশ্চিত্য গুরুলাঘবম্
ন বাধা বিদ্যতে যত্র তং ধর্মং সমুদাচরেৎ
131.12
গুরুলাঘবমাজ্ঞায় ধর্মাধর্মবিনিশ্চয়ে
যতো ভূয়াংস্ততো রাজন্কুরু ধর্মবিনিশ্চয়ম্
131.13
রাজোবাচ
বহুকল্যাণসংয়ুক্তং ভাষসে বিহগোত্তম
সুপর্ণঃ পক্ষিরাট্কিং ত্বং ধর্মজ্ঞশ্চাস্যসংশয়ম্
তথা হি ধর্মসংয়ুক্তং বহু চিত্রং প্রভাষসে
131.14
ন তেঽস্ত্যবিদিতং কিংচিদিতি ত্বা লক্ষয়াম্যহম্
শরণৈষিণঃ পরিত্যাগং কথং সাধ্বিতি মন্যসে
131.15
আহারার্থং সমারম্ভস্তব চায়ং বিহংগম
শক্যশ্চাপ্যন্যথা কর্তুমাহারোঽপ্যধিকস্ত্বয়া
131.16
গোবৃষো বা বরাহো বা মৃগো বা মহিষোঽপি বা
ত্বদর্থমদ্য ক্রিয়তাং যদ্বান্যদভিকাঙ্ক্ষসে
131.17
শ্যেন উবাচ
ন বরাহং ন চোক্ষাণং ন মৃগান্বিবিধাংস্তথা
ভক্ষয়ামি মহারাজ কিমন্নাদ্যেন তেন মে
131.18
যস্তু মে দৈববিহিতো ভক্ষঃ ক্ষত্রিয়পুংগব
তমুত্সৃজ মহীপাল কপোতমিমমেব মে
131.19
শ্যেনাঃ কপোতান্খাদন্তি স্থিতিরেষা সনাতনী
মা রাজন্মার্গমাজ্ঞায় কদলীস্কন্ধমারুহ
131.20
রাজোবাচ
রাজ্যং শিবীনামৃদ্ধং বৈ শাধি পক্ষিগণার্চিত
যদ্বা কাময়সে কিংচিচ্ছ্যেন সর্বং দদানি তে
বিনেমং পক্ষিণং শ্যেন শরণার্থিনমাগতম্
131.21
যেনেমং বর্জয়েথাস্ত্বং কর্মণা পক্ষিসত্তম
তদাচক্ষ্ব করিষ্যামি ন হি দাস্যে কপোতকম্
131.22
শ্যেন উবাচ
উশীনর কপোতে তে যদি স্নেহো নরাধিপ
আত্মনো মাংসমুত্কৃত্য কপোততুলয়া ধৃতম্
131.23
যদা সমং কপোতেন তব মাংসং ভবেন্নৃপ
তদা প্রদেয়ং তন্মহ্যং সা মে তুষ্টির্ভবিষ্যতি
131.24
রাজোবাচ
অনুগ্রহমিমং মন্যে শ্যেন যন্মাভিয়াচসে
তস্মাত্তেঽদ্য প্রদাস্যামি স্বমাংসং তুলয়া ধৃতম্
131.25
লোমশ উবাচ
অথোত্কৃত্য স্বমাংসং তু রাজা পরমধর্মবিৎ
তুলয়ামাস কৌন্তেয় কপোতেন সহাভিভো
131.26
ধ্রিয়মাণস্তু তুলয়া কপোতো ব্যতিরিচ্যতে
পুনশ্চোত্কৃত্য মাংসানি রাজা প্রাদাদুশীনরঃ
131.27
ন বিদ্যতে যদা মাংসং কপোতেন সমং ধৃতম্
তত উত্কৃত্তমাংসোঽসাবারুরোহ স্বয়ং তুলাম্
131.28
শ্যেন উবাচ
ইন্দ্রোঽহমস্মি ধর্মজ্ঞ কপোতো হব্যবাডয়ম্
জিজ্ঞাসমানৌ ধর্মে ত্বাং যজ্ঞবাটমুপাগতৌ
131.29
যত্তে মাংসানি গাত্রেভ্য উত্কৃত্তানি বিশাং পতে
এষা তে ভাস্বরী কীর্তির্লোকানভিভবিষ্যতি
131.30
যাবল্লোকে মনুষ্যাস্ত্বাং কথয়িষ্যন্তি পার্থিব
তাবত্কীর্তিশ্চ লোকাশ্চ স্থাস্যন্তি তব শাশ্বতাঃ
131.31
লোমশ উবাচ
তত্পাণ্ডবেয় সদনং রাজ্ঞস্তস্য মহাত্মনঃ
পশ্যস্বৈতন্ময়া সার্ধং পুণ্যং পাপপ্রমোচনম্
131.32
অত্র বৈ সততং দেবা মুনয়শ্চ সনাতনাঃ
দৃশ্যন্তে ব্রাহ্মণৈ রাজন্পুণ্যবদ্ভির্মহাত্মভিঃ