Utshovঅধ্যায় 132
132.1
লোমশ উবাচ
যঃ কথ্যতে মন্ত্রবিদগ্র্যবুদ্ধি;রৌদ্দালকিঃ শ্বেতকেতুঃ পৃথিব্যাম্
তস্যাশ্রমং পশ্য নরেন্দ্র পুণ্যং; সদাফলৈরুপপন্নং মহীজৈঃ
132.2
সাক্ষাদত্র শ্বেতকেতুর্দদর্শ; সরস্বতীং মানুষদেহরূপাম্
বেত্স্যামি বাণীমিতি সংপ্রবৃত্তাং; সরস্বতীং শ্বেতকেতুর্বভাষে
132.3
তস্মিন্কালে ব্রহ্মবিদাং বরিষ্ঠা;বাস্তাং তদা মাতুলভাগিনেয়ৌ
অষ্টাবক্রশ্চৈব কহোডসূনু;রৌদ্দালকিঃ শ্বেতকেতুশ্চ রাজন্
132.4
বিদেহরাজস্য মহীপতেস্তৌ; বিপ্রাবুভৌ মাতুলভাগিনেয়ৌ
প্রবিশ্য যজ্ঞায়তনং বিবাদে; বন্দিং নিজগ্রাহতুরপ্রমেয়ম্
132.5
যুধিষ্ঠির উবাচ
কথংপ্রভাবঃ স বভূব বিপ্র;স্তথায়ুক্তং যো নিজগ্রাহ বন্দিম্
অষ্টাবক্রঃ কেন চাসৌ বভূব; তত্সর্বং মে লোমশ শংস তত্ত্বম্
132.6
লোমশ উবাচ
উদ্দালকস্য নিয়তঃ শিষ্য একো; নাম্না কহোডেতি বভূব রাজন্
শুশ্রূষুরাচার্যবশানুবর্তী; দীর্ঘং কালং সোঽধ্যয়নং চকার
132.7
তং বৈ বিপ্রাঃ পর্যভবংশ্চ শিষ্যা;স্তং চ জ্ঞাত্বা বিপ্রকারং গুরুঃ সঃ
তস্মৈ প্রাদাত্সদ্য এব শ্রুতং চ; ভার্যাং চ বৈ দুহিতরং স্বাং সুজাতাম্
132.8
তস্যা গর্ভঃ সমভবদগ্নিকল্পঃ; সোঽধীয়ানং পিতরমথাভ্যুবাচ
সর্বাং রাত্রিমধ্যয়নং করোষি; নেদং পিতঃ সম্যগিবোপবর্ততে
132.9
উপালব্ধঃ শিষ্যমধ্যে মহর্ষিঃ; স তং কোপাদুদরস্থং শশাপ
যস্মাত্কুক্ষৌ বর্তমানো ব্রবীষি; তস্মাদ্বক্রো ভবিতাস্যষ্টকৃত্বঃ
132.10
স বৈ তথা বক্র এবাভ্যজায়;দষ্টাবক্রঃ প্রথিতো বৈ মহর্ষিঃ
তস্যাসীদ্বৈ মাতুলঃ শ্বেতকেতুঃ; স তেন তুল্যো বয়সা বভূব
132.11
সংপীড্যমানা তু তদা সুজাতা; বিবর্ধমানেন সুতেন কুক্ষৌ
উবাচ ভর্তারমিদং রহোগতা; প্রসাদ্য হীনং বসুনা ধনার্থিনী
132.12
কথং করিষ্যাম্যধনা মহর্ষে; মাসশ্চায়ং দশমো বর্ততে মে
ন চাস্তি তে বসু কিংচিত্প্রজাতা; যেনাহমেতামাপদং নিস্তরেয়ম্
132.13
উক্তস্ত্বেবং ভার্যয়া বৈ কহোডো; বিত্তস্যার্থে জনকমথাভ্যগচ্ছৎ
স বৈ তদা বাদবিদা নিগৃহ্য; নিমজ্জিতো বন্দিনেহাপ্সু বিপ্রঃ
132.14
উদ্দালকস্তং তু তদা নিশম্য; সূতেন বাদেঽপ্সু তথা নিমজ্জিতম্
উবাচ তাং তত্র ততঃ সুজাতা;মষ্টাবক্রে গূহিতব্যোঽয়মর্থঃ
132.15
ররক্ষ সা চাপ্যতি তং সুমন্ত্রং; জাতোঽপ্যেবং ন স শুশ্রাব বিপ্রঃ
উদ্দালকং পিতৃবচ্চাপি মেনে; অষ্টাবক্রো ভ্রাতৃবচ্ছ্বেতকেতুম্
132.16
ততো বর্ষে দ্বাদশে শ্বেতকেতু;রষ্টাবক্রং পিতুরঙ্কে নিষণ্ণম্
অপাকর্ষদ্গৃহ্য পাণৌ রুদন্তং; নায়ং তবাঙ্কঃ পিতুরিত্যুক্তবাংশ্চ
132.17
যত্তেনোক্তং দুরুক্তং তত্তদানীং; হৃদি স্থিতং তস্য সুদুঃখমাসীৎ
গৃহং গত্বা মাতরং রোদমানঃ; পপ্রচ্ছেদং ক্ব নু তাতো মমেতি
132.18
ততঃ সুজাতা পরমার্তরূপা; শাপাদ্ভীতা সর্বমেবাচচক্ষে
তদ্বৈ তত্ত্বং সর্বমাজ্ঞায় মাতু;রিত্যব্রবীচ্ছ্বেতকেতুং স বিপ্রঃ
132.19
গচ্ছাব যজ্ঞং জনকস্য রাজ্ঞো; বহ্বাশ্চর্যঃ শ্রূয়তে তস্য যজ্ঞঃ
শ্রোষ্যাবোঽত্র ব্রাহ্মণানাং বিবাদ;মন্নং চাগ্র্যং তত্র ভোক্ষ্যাবহে চ
বিচক্ষণত্বং চ ভবিষ্যতে নৌ; শিবশ্চ সৌম্যশ্চ হি ব্রহ্মঘোষঃ
132.20
তৌ জগ্মতুর্মাতুলভাগিনেয়ৌ; যজ্ঞং সমৃদ্ধং জনকস্য রাজ্ঞঃ
অষ্টাবক্রঃ পথি রাজ্ঞা সমেত্য; উত্সার্যমাণো বাক্যমিদং জগাদ