Utshovঅধ্যায় 133
133.1
অষ্টাবক্র উবাচ
অন্ধস্য পন্থা বধিরস্য পন্থাঃ; স্ত্রিয়ঃ পন্থা বৈবধিকস্য পন্থাঃ
রাজ্ঞঃ পন্থা ব্রাহ্মণেনাসমেত্য; সমেত্য তু ব্রাহ্মণস্যৈব পন্থাঃ
133.2
রাজোবাচ
পন্থা অয়ং তেঽদ্য ময়া নিসৃষ্টো; যেনেচ্ছসে তেন কামং ব্রজস্ব
ন পাবকো বিদ্যতে বৈ লঘীয়া;নিন্দ্রোঽপি নিত্যং নমতে ব্রাহ্মণানাম্
133.3
অষ্টাবক্র উবাচ
যজ্ঞং দ্রষ্টুং প্রাপ্তবন্তৌ স্ব তাত; কৌতূহলং নৌ বলবদ্বৈ বিবৃদ্ধম্
আবাং প্রাপ্তাবতিথী সংপ্রবেশং; কাঙ্ক্ষাবহে দ্বারপতে তবাজ্ঞাম্
133.4
ঐন্দ্রদ্যুম্নের্যজ্ঞদৃশাবিহাবাং; বিবক্ষূ বৈ জনকেন্দ্রং দিদৃক্ষূ
ন বৈ ক্রোধাদ্ব্যাধিনৈবোত্তমেন; সংয়োজয় দ্বারপাল ক্ষণেন
133.5
দ্বারপাল উবাচ
বন্দেঃ সমাদেশকরা বয়ং স্ম; নিবোধ বাক্যং চ ময়ের্যমাণম্
ন বৈ বালাঃ প্রবিশন্ত্যত্র বিপ্রা; বৃদ্ধা বিদ্বাংসঃ প্রবিশন্তি দ্বিজাগ্র্যাঃ
133.6
অষ্টাবক্র উবাচ
যদ্যত্র বৃদ্ধেষু কৃতঃ প্রবেশো; যুক্তং মম দ্বারপাল প্রবেষ্টুম্
বয়ং হি বৃদ্ধাশ্চরিতব্রতাশ্চ; বেদপ্রভাবেন প্রবেশনার্হাঃ
133.7
শুশ্রূষবশ্চাপি জিতেন্দ্রিয়াশ্চ; জ্ঞানাগমে চাপি গতাঃ স্ম নিষ্ঠাম্
ন বাল ইত্যবমন্তব্যমাহু;র্বালোঽপ্যগ্নির্দহতি স্পৃশ্যমানঃ
133.8
দ্বারপাল উবাচ
সরস্বতীমীরয় বেদজুষ্টা;মেকাক্ষরাং বহুরূপাং বিরাজম্
অঙ্গাত্মানং সমবেক্ষস্ব বালং; কিং শ্লাঘসে দুর্লভা বাদসিদ্ধিঃ
133.9
অষ্টাবক্র উবাচ
ন জ্ঞায়তে কায়বৃদ্ধ্যা বিবৃদ্ধি;র্যথাষ্ঠীলা শাল্মলেঃ সংপ্রবৃদ্ধা
হ্রস্বোঽল্পকায়ঃ ফলিতো বিবৃদ্ধো; যশ্চাফলস্তস্য ন বৃদ্ধভাবঃ
133.10
দ্বারপাল উবাচ
বৃদ্ধেভ্য এবেহ মতিং স্ম বালা; গৃহ্ণন্তি কালেন ভবন্তি বৃদ্ধাঃ
ন হি জ্ঞানমল্পকালেন শক্যং; কস্মাদ্বালো বৃদ্ধ ইবাবভাষসে
133.11
অষ্টাবক্র উবাচ
ন তেন স্থবিরো ভবতি যেনাস্য পলিতং শিরঃ
বালোঽপি যঃ প্রজানাতি তং দেবাঃ স্থবিরং বিদুঃ
133.12
ন হায়নৈর্ন পলিতৈর্ন বিত্তেন ন বন্ধুভিঃ
ঋষয়শ্চক্রিরে ধর্মং যোঽনূচানঃ স নো মহান্
133.13
দিদৃক্ষুরস্মি সংপ্রাপ্তো বন্দিনং রাজসংসদি
নিবেদয়স্ব মাং দ্বাঃস্থ রাজ্ঞে পুষ্করমালিনে
133.14
দ্রষ্টাস্যদ্য বদতো দ্বারপাল; মনীষিভিঃ সহ বাদে বিবৃদ্ধে
উতাহো বাপ্যুচ্চতাং নীচতাং বা; তূষ্ণীং ভূতেষ্বথ সর্বেষু চাদ্য
133.15
দ্বারপাল উবাচ
কথং যজ্ঞং দশবর্ষো বিশেস্ত্বং; বিনীতানাং বিদুষাং সংপ্রবেশ্যম্
উপায়তঃ প্রয়তিষ্যে তবাহং; প্রবেশনে কুরু যত্নং যথাবৎ
133.16
অষ্টাবক্র উবাচ
ভো ভো রাজঞ্জনকানাং বরিষ্ঠ; সভাজ্যস্ত্বং ত্বয়ি সর্বং সমৃদ্ধম্
ত্বং বা কর্তা কর্মণাং যজ্ঞিয়ানাং; যয়াতিরেকো নৃপতির্বা পুরস্তাৎ
133.17
বিদ্বান্বন্দী বেদবিদো নিগৃহ্য; বাদে ভগ্নানপ্রতিশঙ্কমানঃ
ত্বয়া নিসৃষ্টৈঃ পুরুষৈরাপ্তকৃদ্ভি;র্জলে সর্বান্মজ্জয়তীতি নঃ শ্রুতম্
133.18
স তচ্ছ্রুত্বা ব্রাহ্মণানাং সকাশা;দ্ব্রহ্মোদ্যং বৈ কথয়িতুমাগতোঽস্মি
ক্বাসৌ বন্দী যাবদেনং সমেত্য; নক্ষত্রাণীব সবিতা নাশয়ামি
133.19
রাজোবাচ
আশংসসে বন্দিনং ত্বং বিজেতু;মবিজ্ঞাত্বা বাক্যবলং পরস্য
বিজ্ঞাতবীর্যৈঃ শক্যমেবং প্রবক্তুং; দৃষ্টশ্চাসৌ ব্রাহ্মণৈর্বাদশীলৈঃ
133.20
অষ্টাবক্র উবাচ
বিবাদিতোঽসৌ ন হি মাদৃশৈর্হি; সিংহীকৃতস্তেন বদত্যভীতঃ
সমেত্য মাং নিহতঃ শেষ্যতেঽদ্য; মার্গে ভগ্নং শকটমিবাবলাক্ষম্
133.21
রাজোবাচ
ষণ্ণাভের্দ্বাদশাক্ষস্য চতুর্বিংশতিপর্বণঃ
যস্ত্রিষষ্টিশতারস্য বেদার্থং স পরঃ কবিঃ
133.22
অষ্টাবক্র উবাচ
চতুর্বিংশতিপর্ব ত্বাং ষণ্ণাভি দ্বাদশপ্রধি
তত্ত্রিষষ্টিশতারং বৈ চক্রং পাতু সদাগতি
133.23
রাজোবাচ
বডবে ইব সংয়ুক্তে শ্যেনপাতে দিবৌকসাম্
কস্তয়োর্গর্ভমাধত্তে গর্ভং সুষুবতুশ্চ কম্
133.24
অষ্টাবক্র উবাচ
মা স্ম তে তে গৃহে রাজঞ্শাত্রবাণামপি ধ্রুবম্
বাতসারথিরাধত্তে গর্ভং সুষুবতুশ্চ তম্
133.25
রাজোবাচ
কিং স্বিত্সুপ্তং ন নিমিষতি কিং স্বিজ্জাতং ন চোপতি
কস্য স্বিদ্ধৃদয়ং নাস্তি কিং স্বিদ্বেগেন বর্ধতে
133.26
অষ্টাবক্র উবাচ
মত্স্যঃ সুপ্তো ন নিমিষত্যণ্ডং জাতং ন চোপতি
অশ্মনো হৃদয়ং নাস্তি নদী বেগেন বর্ধতে
133.27
রাজোবাচ
ন ত্বা মন্যে মানুষং দেবসত্ত্বং; ন ত্বং বালঃ স্থবিরস্ত্বং মতো মে
ন তে তুল্যো বিদ্যতে বাক্প্রলাপে; তস্মাদ্দ্বারং বিতরাম্যেষ বন্দী