Utshovঅধ্যায় 134
134.1
অষ্টাবক্র উবাচ
অত্রোগ্রসেনসমিতেষু রাজ;ন্সমাগতেষ্বপ্রতিমেষু রাজসু
ন বৈ বিবিত্সান্তরমস্তি বাদিনাং; মহাজলে হংসনিনাদিনামিব
134.2
ন মেঽদ্য বক্ষ্যস্যতিবাদিমানি;ন্গ্লহং প্রপন্নঃ সরিতামিবাগমঃ
হুতাশনস্যেব সমিদ্ধতেজসঃ; স্থিরো ভবস্বেহ মমাদ্য বন্দিন্
134.3
বন্দ্যুবাচ
ব্যাঘ্রং শয়ানং প্রতি মা প্রবোধয়; আশীবিষং সৃক্কিণী লেলিহানম্
পদাহতস্যেব শিরোঽভিহত্য; নাদষ্টো বৈ মোক্ষ্যসে তন্নিবোধ
134.4
যো বৈ দর্পাত্সংহননোপপন্নঃ; সুদুর্বলঃ পর্বতমাবিহন্তি
তস্যৈব পাণিঃ সনখো বিশীর্যতে; ন চৈব শৈলস্য হি দৃশ্যতে ব্রণঃ
134.5
সর্বে রাজ্ঞো মৈথিলস্য মৈনাকস্যেব পর্বতাঃ
নিকৃষ্টভূতা রাজানো বত্সা অনদুহো যথা
134.6
লোমশ উবাচ
অষ্টাবক্রঃ সমিতৌ গর্জমানো; জাতক্রোধো বন্দিনমাহ রাজন্
উক্তে বাক্যে চোত্তরং মে ব্রবীহি; বাক্যস্য চাপ্যুত্তরং তে ব্রবীমি
134.7
বন্দ্যুবাচ
এক এবাগ্নির্বহুধা সমিধ্যতে; একঃ সূর্যঃ সর্বমিদং প্রভাসতে
একো বীরো দেবরাজো নিহন্তা; যমঃ পিতৄণামীশ্বরশ্চৈক এব
134.8
অষ্টাবক্র উবাচ
দ্বাবিন্দ্রাগ্নী চরতো বৈ সখায়ৌ; দ্বৌ দেবর্ষী নারদঃ পর্বতশ্চ
দ্বাবশ্বিনৌ দ্বে চ রথস্য চক্রে; ভার্যাপতী দ্বৌ বিহিতৌ বিধাত্রা
134.9
বন্দ্যুবাচ
ত্রিঃ সূয়তে কর্মণা বৈ প্রজেয়ং; ত্রয়ো যুক্তা বাজপেয়ং বহন্তি
অধ্বর্যবস্ত্রিষবণানি তন্বতে; ত্রয়ো লোকাস্ত্রীণি জ্যোতীংষি চাহুঃ
134.10
অষ্টাবক্র উবাচ
চতুষ্টয়ং ব্রাহ্মণানাং নিকেতং; চত্বারো যুক্তা যজ্ঞমিমং বহন্তি
দিশশ্চতস্রশ্চতুরশ্চ বর্ণা;শ্চতুষ্পদা গৌরপি শশ্বদুক্তা
134.11
বন্দ্যুবাচ
পঞ্চাগ্নয়ঃ পঞ্চপদা চ পঙ্ক্তি;র্যজ্ঞাঃ পঞ্চৈবাপ্যথ পঞ্চেন্দ্রিয়াণি
দৃষ্টা বেদে পঞ্চচূডাশ্চ পঞ্চ; লোকে খ্যাতং পঞ্চনদং চ পুণ্যম্
134.12
অষ্টাবক্র উবাচ
ষডাধানে দক্ষিণামাহুরেকে; ষডেবেমে ঋতবঃ কালচক্রম্
ষডিন্দ্রিয়াণ্যুত ষট্কৃত্তিকাশ্চ; ষট্সাদ্যস্কাঃ সর্ববেদেষু দৃষ্টাঃ
134.13
বন্দ্যুবাচ
সপ্ত গ্রাম্যাঃ পশবঃ সপ্ত বন্যাঃ; সপ্ত ছন্দাংসি ক্রতুমেকং বহন্তি
সপ্তর্ষয়ঃ সপ্ত চাপ্যর্হণানি; সপ্ততন্ত্রী প্রথিতা চৈব বীণা
134.14
অষ্টাবক্র উবাচ
অষ্টৌ শাণাঃ শতমানং বহন্তি; তথাষ্টপাদঃ শরভঃ সিংহঘাতী
অষ্টৌ বসূঞ্শুশ্রুম দেবতাসু; যূপশ্চাষ্টাস্রির্বিহিতঃ সর্বয়জ্ঞঃ
134.15
বন্দ্যুবাচ
নবৈবোক্তাঃ সামিধেন্যঃ পিতৄণাং; তথা প্রাহুর্নবয়োগং বিসর্গম্
নবাক্ষরা বৃহতী সংপ্রদিষ্টা; নবয়োগো গণনামেতি শশ্বৎ
134.16
অষ্টাবক্র উবাচ
দশা দশোক্তাঃ পুরুষস্য লোকে; সহস্রমাহুর্দশ পূর্ণং শতানি
দশৈব মাসান্বিভ্রতি গর্ভবত্যো; দশেরকা দশ দাশা দশার্ণাঃ
134.17
বন্দ্যুবাচ
একাদশৈকাদশিনঃ পশূনা;মেকাদশৈবাত্র ভবন্তি যূপাঃ
একাদশ প্রাণভৃতাং বিকারা; একাদশোক্তা দিবি দেবেষু রুদ্রাঃ
134.18
অষ্টাবক্র উবাচ
সংবত্সরং দ্বাদশ মাসমাহু;র্জগত্যাঃ পাদো দ্বাদশৈবাক্ষরাণি
দ্বাদশাহঃ প্রাকৃতো যজ্ঞ উক্তো; দ্বাদশাদিত্যান্কথয়ন্তীহ বিপ্রাঃ
134.19
বন্দ্যুবাচ
ত্রয়োদশী তিথিরুক্তা মহোগ্রা; ত্রয়োদশদ্বীপবতী মহী চ
134.20
লোমশ উবাচ
এতাবদুক্ত্বা বিররাম বন্দী; শ্লোকস্যার্ধং ব্যাজহারাষ্টবক্রঃ
ত্রয়োদশাহানি সসার কেশী; ত্রয়োদশাদীন্যতিচ্ছন্দাংসি চাহুঃ
134.21
ততো মহানুদতিষ্ঠন্নিনাদ;স্তূষ্ণীংভূতং সূতপুত্রং নিশম্য
অধোমুখং ধ্যানপরং তদানী;মষ্টাবক্রং চাপ্যুদীর্যন্তমেব
134.22
তস্মিংস্তথা সংকুলে বর্তমানে; স্ফীতে যজ্ঞে জনকস্যাথ রাজ্ঞঃ
অষ্টাবক্রং পূজয়ন্তোঽভ্যুপেয়ু;র্বিপ্রাঃ সর্বে প্রাঞ্জলয়ঃ প্রতীতাঃ
134.23
অষ্টাবক্র উবাচ
অনেন বৈ ব্রাহ্মণাঃ শুশ্রুবাংসো; বাদে জিত্বা সলিলে মজ্জিতাঃ কিল
তানেব ধর্মানয়মদ্য বন্দী; প্রাপ্নোতু গৃহ্যাপ্সু নিমজ্জয়ৈনম্
134.24
বন্দ্যুবাচ
অহং পুত্রো বরুণস্যোত রাজ্ঞ;স্তত্রাস সত্রং দ্বাদশবার্ষিকং বৈ
সত্রেণ তে জনক তুল্যকালং; তদর্থং তে প্রহিতা মে দ্বিজাগ্র্যাঃ
134.25
এতে সর্বে বরুণস্যোত যজ্ঞং; দ্রষ্টুং গতা ইহ আয়ান্তি ভূয়ঃ
অষ্টাবক্রং পূজয়ে পূজনীয়ং; যস্য হেতোর্জনিতারং সমেষ্যে
134.26
অষ্টাবক্র উবাচ
বিপ্রাঃ সমুদ্রাম্ভসি মজ্জিতাস্তে; বাচা জিতা মেধয়া আবিদানাঃ
তাং মেধয়া বাচমথোজ্জহার; যথা বাচমবচিন্বন্তি সন্তঃ
134.27
অগ্নির্দহঞ্জাতবেদাঃ সতাং গৃহা;ন্বিসর্জয়ংস্তেজসা ন স্ম ধাক্ষীৎ
বালেষু পুত্রেষু কৃপণং বদত্সু; তথা বাচমবচিন্বন্তি সন্তঃ
134.28
শ্লেষ্মাতকী ক্ষীণবর্চাঃ শৃণোষি; উতাহো ত্বাং স্তুতয়ো মাদয়ন্তি
হস্তীব ত্বং জনক বিতুদ্যমানো; ন মামিকাং বাচমিমাং শৃণোষি
134.29
জনক উবাচ
শৃণোমি বাচং তব দিব্যরূপা;মমানুষীং দিব্যরূপোঽসি সাক্ষাৎ
অজৈষীর্যদ্বন্দিনং ত্বং বিবাদে; নিসৃষ্ট এষ তব কামোঽদ্য বন্দী
134.30
অষ্টাবক্র উবাচ
নানেন জীবতা কশ্চিদর্থো মে বন্দিনা নৃপ
পিতা যদ্যস্য বরুণো মজ্জয়ৈনং জলাশয়ে
134.31
বন্দ্যুবাচ
অহং পুত্রো বরুণস্যোত রাজ্ঞো; ন মে ভয়ং সলিলে মজ্জিতস্য
ইমং মুহূর্তং পিতরং দ্রক্ষ্যতেঽয়;মষ্টাবক্রশ্চিরনষ্টং কহোডম্
134.32
লোমশ উবাচ
ততস্তে পূজিতা বিপ্রা বরুণেন মহাত্মনা
উদতিষ্ঠন্ত তে সর্বে জনকস্য সমীপতঃ
134.33
কহোড উবাচ
ইত্যর্থমিচ্ছন্তি সুতাঞ্জনা জনক কর্মণা
যদহং নাশকং কর্তুং তত্পুত্রঃ কৃতবান্মম
134.34
উতাবলস্য বলবানুত বালস্য পণ্ডিতঃ
উত বাবিদুষো বিদ্বান্পুত্রো জনক জায়তে
134.35
বন্দ্যুবাচ
শিতেন তে পরশুনা স্বয়মেবান্তকো নৃপ
শিরাংস্যপাহরত্বাজৌ রিপূণাং ভদ্রমস্তু তে
134.36
মহদুক্থ্যং গীয়তে সাম চাগ্র্যং; সম্যক্সোমঃ পীয়তে চাত্র সত্রে
শুচীন্ভাগান্প্রতিজগৃহুশ্চ হৃষ্টাঃ; সাক্ষাদ্দেবা জনকস্যেহ যজ্ঞে
134.37
লোমশ উবাচ
সমুত্থিতেষ্বথ সর্বেষু রাজ;ন্বিপ্রেষু তেষ্বধিকং সুপ্রভেষু
অনুজ্ঞাতো জনকেনাথ রাজ্ঞা; বিবেশ তোয়ং সাগরস্যোত বন্দী
134.38
অষ্টাবক্রঃ পিতরং পূজয়িত্বা; সংপূজিতো ব্রাহ্মণৈস্তৈর্যথাবৎ
প্রত্যাজগামাশ্রমমেব চাগ্র্যং; জিত্বা বন্দিং সহিতো মাতুলেন
134.39
অত্র কৌন্তেয় সহিতো ভ্রাতৃভিস্ত্বং; সুখোষিতঃ সহ বিপ্রৈঃ প্রতীতঃ
পুণ্যান্যন্যানি শুচিকর্মৈকভক্তি;র্ময়া সার্ধং চরিতাস্যাজমীঢ