Utshovঅধ্যায় 135
135.1
লোমশ উবাচ
এষা মধুবিলা রাজন্সমঙ্গা সংপ্রকাশতে
এতত্কর্দমিলং নাম ভরতস্যাভিষেচনম্
135.2
অলক্ষ্ম্যা কিল সংয়ুক্তো বৃত্রং হত্বা শচীপতিঃ
আপ্লুতঃ সর্বপাপেভ্যঃ সমঙ্গায়াং ব্যমুচ্যত
135.3
এতদ্বিনশনং কুক্ষৌ মৈনাকস্য নরর্ষভ
অদিতির্যত্র পুত্রার্থং তদন্নমপচত্পুরা
135.4
এনং পর্বতরাজানমারুহ্য পুরুষর্ষভ
অয়শস্যামসংশব্দ্যামলক্ষ্মীং ব্যপনোত্স্যথ
135.5
এতে কনখলা রাজনৃষীণাং দয়িতা নগাঃ
এষা প্রকাশতে গঙ্গা যুধিষ্ঠির মহানদী
135.6
সনত্কুমারো ভগবানত্র সিদ্ধিমগাত্পরাম্
আজমীঢাবগাহ্যৈনাং সর্বপাপৈঃ প্রমোক্ষ্যসে
135.7
অপাং হ্রদং চ পুণ্যাখ্যং ভৃগুতুঙ্গং চ পর্বতম্
তূষ্ণীং গঙ্গাং চ কৌন্তেয় সামাত্যঃ সমুপস্পৃশ
135.8
আশ্রমঃ স্থূলশিরসো রমণীয়ঃ প্রকাশতে
অত্র মানং চ কৌন্তেয় ক্রোধং চৈব বিবর্জয়
135.9
এষ রৈভ্যাশ্রমঃ শ্রীমান্পাণ্ডবেয় প্রকাশতে
ভারদ্বাজো যত্র কবির্যবক্রীতো ব্যনশ্যত
135.10
যুধিষ্ঠির উবাচ
কথংয়ুক্তোঽভবদৃষির্ভরদ্বাজঃ প্রতাপবান্
কিমর্থং চ যবক্রীত ঋষিপুত্রো ব্যনশ্যত
135.11
এতত্সর্বং যথাবৃত্তং শ্রোতুমিচ্ছামি লোমশ
কর্মভির্দেবকল্পানাং কীর্ত্যমানৈর্ভৃশং রমে
135.12
লোমশ উবাচ
ভরদ্বাজশ্চ রৈভ্যশ্চ সখায়ৌ সংবভূবতুঃ
তাবূষতুরিহাত্যন্তং প্রীয়মাণৌ বনান্তরে
135.13
রৈভ্যস্য তু সুতাবাস্তামর্বাবসুপরাবসূ
আসীদ্যবক্রীঃ পুত্রস্তু ভরদ্বাজস্য ভারত
135.14
রৈভ্যো বিদ্বান্সহাপত্যস্তপস্বী চেতরোঽভবৎ
তয়োশ্চাপ্যতুলা প্রীতির্বাল্যাত্প্রভৃতি ভারত
135.15
যবক্রীঃ পিতরং দৃষ্ট্বা তপস্বিনমসত্কৃতম্
দৃষ্ট্বা চ সত্কৃতং বিপ্রৈ রৈভ্যং পুত্রৈঃ সহানঘ
135.16
পর্যতপ্যত তেজস্বী মন্যুনাভিপরিপ্লুতঃ
তপস্তেপে ততো ঘোরং বেদজ্ঞানায় পাণ্ডব
135.17
সুসমিদ্ধে মহত্যগ্নৌ শরীরমুপতাপয়ন্
জনয়ামাস সংতাপমিন্দ্রস্য সুমহাতপাঃ
135.18
তত ইন্দ্রো যবক্রীতমুপগম্য যুধিষ্ঠির
অব্রবীত্কস্য হেতোস্ত্বমাস্থিতস্তপ উত্তমম্
135.19
যবক্রীরুবাচ
দ্বিজানামনধীতা বৈ বেদাঃ সুরগণার্চিত
প্রতিভান্ত্বিতি তপ্যেঽহমিদং পরমকং তপঃ
135.20
স্বাধ্যায়ার্থে সমারম্ভো মমায়ং পাকশাসন
তপসা জ্ঞাতুমিচ্ছামি সর্বজ্ঞানানি কৌশিক
135.21
কালেন মহতা বেদাঃ শক্যা গুরুমুখাদ্বিভো
প্রাপ্তুং তস্মাদয়ং যত্নঃ পরমো মে সমাস্থিতঃ
135.22
ইন্দ্র উবাচ
অমার্গ এষ বিপ্রর্ষে যেন ত্বং যাতুমিচ্ছসি
কিং বিঘাতেন তে বিপ্র গচ্ছাধীহি গুরোর্মুখাৎ
135.23
লোমশ উবাচ
এবমুক্ত্বা গতঃ শক্রো যবক্রীরপি ভারত
ভূয় এবাকরোদ্যত্নং তপস্যমিতবিক্রম
135.24
ঘোরেণ তপসা রাজংস্তপ্যমানো মহাতপাঃ
সংতাপয়ামাস ভৃশং দেবেন্দ্রমিতি নঃ শ্রুতম্
135.25
তং তথা তপ্যমানং তু তপস্তীব্রং মহামুনিম্
উপেত্য বলভিদ্দেবো বারয়ামাস বৈ পুনঃ
135.26
অশক্যোঽর্থঃ সমারব্ধো নৈতদ্বুদ্ধিকৃতং তব
প্রতিভাস্যন্তি বৈ বেদাস্তব চৈব পিতুশ্চ তে
135.27
যবক্রীরুবাচ
ন চৈতদেবং ক্রিয়তে দেবরাজ মমেপ্সিতম্
মহতা নিয়মেনাহং তপ্স্যে ঘোরতরং তপঃ
135.28
সমিদ্ধেঽগ্নাবুপকৃত্যাঙ্গমঙ্গং; হোষ্যামি বা মঘবংস্তন্নিবোধ
যদ্যেতদেবং ন করোষি কামং; মমেপ্সিতং দেবরাজেহ সর্বম্
135.29
লোমশ উবাচ
নিশ্চয়ং তমভিজ্ঞায় মুনেস্তস্য মহাত্মনঃ
প্রতিবারণহেত্বর্থং বুদ্ধ্যা সংচিন্ত্য বুদ্ধিমান্
135.30
তত ইন্দ্রোঽকরোদ্রূপং ব্রাহ্মণস্য তপস্বিনঃ
অনেকশতবর্ষস্য দুর্বলস্য সয়ক্ষ্মণঃ
135.31
যবক্রীতস্য যত্তীর্থমুচিতং শৌচকর্মণি
ভাগীরথ্যাং তত্র সেতুং বালুকাভিশ্চকার সঃ
135.32
যদাস্য বদতো বাক্যং ন স চক্রে দ্বিজোত্তমঃ
বালুকাভিস্ততঃ শক্রো গঙ্গাং সমভিপূরয়ন্
135.33
বালুকামুষ্টিমনিশং ভাগীরথ্যাং ব্যসর্জয়ৎ
সেতুমভ্যারভচ্ছক্রো যবক্রীতং নিদর্শয়ন্
135.34
তং দদর্শ যবক্রীস্তু যত্নবন্তং নিবন্ধনে
প্রহসংশ্চাব্রবীদ্বাক্যমিদং স মুনিপুংগবঃ
135.35
কিমিদং বর্ততে ব্রহ্মন্কিং চ তে হ চিকীর্ষিতম্
অতীব হি মহান্যত্নঃ ক্রিয়তেঽয়ং নিরর্থকঃ
135.36
ইন্দ্র উবাচ
বন্ধিষ্যে সেতুনা গঙ্গাং সুখঃ পন্থা ভবিষ্যতি
ক্লিশ্যতে হি জনস্তাত তরমাণঃ পুনঃ পুনঃ
135.37
যবক্রীরুবাচ
নায়ং শক্যস্ত্বয়া বদ্ধুং মহানোঘঃ কথংচন
অশক্যাদ্বিনিবর্তস্ব শক্যমর্থং সমারভ
135.38
ইন্দ্র উবাচ
যথৈব ভবতা চেদং তপো বেদার্থমুদ্যতম্
অশক্যং তদ্বদস্মাভিরয়ং ভারঃ সমুদ্যতঃ
135.39
যবক্রীরুবাচ
যথা তব নিরর্থোঽয়মারম্ভস্ত্রিদশেশ্বর
তথা যদি মমাপীদং মন্যসে পাকশাসন
135.40
ক্রিয়তাং যদ্ভবেচ্ছক্যং ময়া সুরগণেশ্বর
বরাংশ্চ মে প্রয়চ্ছান্যান্যৈরন্যান্ভবিতাস্ম্যতি
135.41
লোমশ উবাচ
তস্মৈ প্রাদাদ্বরানিন্দ্র উক্তবান্যান্মহাতপাঃ
প্রতিভাস্যন্তি তে বেদাঃ পিত্রা সহ যথেপ্সিতাঃ
135.42
যচ্চান্যত্কাঙ্ক্ষসে কামং যবক্রীর্গম্যতামিতি
স লব্ধকামঃ পিতরমুপেত্যাথ ততোঽব্রবীৎ