অধ্যায় 136

136.1

যবক্রীরুবাচ
প্রতিভাস্যন্তি বৈ বেদা মম তাতস্য চোভয়োঃ
অতি চান্যান্ভবিষ্যাবো বরা লব্ধাস্তথা ময়া

ভরদ্বাজ উবাচ
দর্পস্তে ভবিতা তাত বরাঁল্লব্ধ্বা যথেপ্সিতান্
স দর্পপূর্ণঃ কৃপণঃ ক্ষিপ্রমেব বিনশ্যসি

অত্রাপ্যুদাহরন্তীমা গাথা দেবৈরুদাহৃতাঃ
ঋষিরাসীত্পুরা পুত্র বালধির্নাম বীর্যবান্

স পুত্রশোকাদুদ্বিগ্নস্তপস্তেপে সুদুশ্চরম্
ভবেন্মম সুতোঽমর্ত্য ইতি তং লব্ধবাংশ্চ সঃ

তস্য প্রসাদো দেবৈশ্চ কৃতো ন ত্বমরৈঃ সমঃ
নামর্ত্যো বিদ্যতে মর্ত্যো নিমিত্তায়ুর্ভবিষ্যতি

বালধিরুবাচ
যথেমে পর্বতাঃ শশ্বত্তিষ্ঠন্তি সুরসত্তমাঃ
অক্ষয়াস্তন্নিমিত্তং মে সুতস্যায়ুর্ভবেদিতি

ভরদ্বাজ উবাচ
তস্য পুত্রস্তদা জজ্ঞে মেধাবী ক্রোধনঃ সদা
স তচ্ছ্রুত্বাকরোদ্দর্পমৃষীংশ্চৈবাবমন্যত

বিকুর্বাণো মুনীনাং তু চরমাণো মহীমিমাম্
আসসাদ মহাবীর্যং ধনুষাক্ষং মনীষিণম্

তস্যাপচক্রে মেধাবী তং শশাপ স বীর্যবান্
ভব ভস্মেতি চোক্তঃ স ন ভস্ম সমপদ্যত

ধনুষাক্ষস্তু তং দৃষ্ট্বা মেধাবিনমনাময়ম্
নিমিত্তমস্য মহিষৈর্ভেদয়ামাস বীর্যবান্

স নিমিত্তে বিনষ্টে তু মমার সহসা শিশুঃ
তং মৃতং পুত্রমাদায় বিললাপ ততঃ পিতা

লালপ্যমানং তং দৃষ্ট্বা মুনয়ঃ পুনরার্তবৎ
ঊচুর্বেদোক্তয়া পূর্বং গাথয়া তন্নিবোধ মে

ন দিষ্টমর্থমত্যেতুমীশো মর্ত্যঃ কথংচন
মহিষৈর্ভেদয়ামাস ধনুষাক্ষো মহীধরান্

এবং লব্ধ্বা বরান্বালা দর্পপূর্ণাস্তরস্বিনঃ
ক্ষিপ্রমেব বিনশ্যন্তি যথা ন স্যাত্তথা ভবান্

এষ রৈভ্যো মহাবীর্যঃ পুত্রৌ চাস্য তথাবিধৌ
তং যথা পুত্র নাভ্যেষি তথা কুর্যাস্ত্বতন্দ্রিতঃ

স হি ক্রুদ্ধঃ সমর্থস্ত্বাং পুত্র পীডয়িতুং রুষা
বৈদ্যশ্চাপি তপস্বী চ কোপনশ্চ মহানৃষিঃ

যবক্রীরুবাচ
এবং করিষ্যে মা তাপং তাত কার্ষীঃ কথংচন
যথা হি মে ভবান্মান্যস্তথা রৈভ্যঃ পিতা মম

লোমশ উবাচ
উক্ত্বা স পিতরং শ্লক্ষ্ণং যবক্রীরকুতোভয়ঃ
বিপ্রকুর্বন্নৃষীনন্যানতুষ্যত্পরয়া মুদা