অধ্যায় 137

137.1

লোমশ উবাচ
চঙ্ক্রম্যমাণঃ স তদা যবক্রীরকুতোভয়ঃ
জগাম মাধবে মাসি রৈভ্যাশ্রমপদং প্রতি

স দদর্শাশ্রমে পুণ্যে পুষ্পিতদ্রুমভূষিতে
বিচরন্তীং স্নুষাং তস্য কিংনরীমিব ভারত

যবক্রীস্তামুবাচেদমুপতিষ্ঠস্ব মামিতি
নির্লজ্জো লজ্জয়া যুক্তাং কামেন হৃতচেতনঃ

সা তস্য শীলমাজ্ঞায় তস্মাচ্ছাপাচ্চ বিভ্যতী
তেজস্বিতাং চ রৈভ্যস্য তথেত্যুক্ত্বা জগাম সা

তত একান্তমুন্নীয় মজ্জয়ামাস ভারত
আজগাম তদা রৈভ্যঃ স্বমাশ্রমমরিংদম

রুদন্তীং চ স্নুষাং দৃষ্ট্বা ভার্যামার্তাং পরাবসোঃ
সান্ত্বয়ঞ্শ্লক্ষ্ণয়া বাচা পর্যপৃচ্ছদ্যুধিষ্ঠির

সা তস্মৈ সর্বমাচষ্ট যবক্রীভাষিতং শুভা
প্রত্যুক্তং চ যবক্রীতং প্রেক্ষাপূর্বং তদাত্মনা

শৃণ্বানস্যৈব রৈভ্যস্য যবক্রীতবিচেষ্টিতম্
দহন্নিব তদা চেতঃ ক্রোধঃ সমভবন্মহান্

স তদা মন্যুনাবিষ্টস্তপস্বী ভৃশকোপনঃ
অবলুপ্য জটামেকাং জুহাবাগ্নৌ সুসংস্কৃতে

ততঃ সমভবন্নারী তস্যা রূপেণ সংমিতা
অবলুপ্যাপরাং চাথ জুহাবাগ্নৌ জটাং পুনঃ

ততঃ সমভবদ্রক্ষো ঘোরাক্ষং ভীমদর্শনম্
অব্রূতাং তৌ তদা রৈভ্যং কিং কার্যং করবামহে

তাবব্রবীদৃষিঃ ক্রুদ্ধো যবক্রীর্বধ্যতামিতি
জগ্মতুস্তৌ তথেত্যুক্ত্বা যবক্রীতজিঘাংসয়া

ততস্তং সমুপাস্থায় কৃত্যা সৃষ্টা মহাত্মনা
কমণ্ডলুং জহারাস্য মোহয়িত্বা তু ভারত

উচ্ছিষ্টং তু যবক্রীতমপকৃষ্টকমণ্ডলুম্
তত উদ্যতশূলঃ স রাক্ষসঃ সমুপাদ্রবৎ

তমাপতন্তং সংপ্রেক্ষ্য শূলহস্তং জিঘাংসয়া
যবক্রীঃ সহসোত্থায় প্রাদ্রবদ্যেন বৈ সরঃ

জলহীনং সরো দৃষ্ট্বা যবক্রীস্ত্বরিতঃ পুনঃ
জগাম সরিতঃ সর্বাস্তাশ্চাপ্যাসন্বিশোষিতাঃ

স কাল্যমানো ঘোরেণ শূলহস্তেন রক্ষসা
অগ্নিহোত্রং পিতুর্ভীতঃ সহসা সমুপাদ্রবৎ

স বৈ প্রবিশমানস্তু শূদ্রেণান্ধেন রক্ষিণা
নিগৃহীতো বলাদ্দ্বারি সোঽবাতিষ্ঠত পার্থিব

নিগৃহীতং তু শূদ্রেণ যবক্রীতং স রাক্ষসঃ
তাডয়ামাস শূলেন স ভিন্নহৃদয়োঽপতৎ

যবক্রীতং স হত্বা তু রাক্ষসো রৈভ্যমাগমৎ
অনুজ্ঞাতস্তু রৈভ্যেণ তয়া নার্যা সহাচরৎ