অধ্যায় 138

138.1

লোমশ উবাচ
ভরদ্বাজস্তু কৌন্তেয় কৃত্বা স্বাধ্যায়মাহ্নিকম্
সমিত্কলাপমাদায় প্রবিবেশ স্বমাশ্রমম্

তং স্ম দৃষ্ট্বা পুরা সর্বে প্রত্যুত্তিষ্ঠন্তি পাবকাঃ
ন ত্বেনমুপতিষ্ঠন্তি হতপুত্রং তদাগ্নয়ঃ

বৈকৃতং ত্বগ্নিহোত্রে স লক্ষয়িত্বা মহাতপাঃ
তমন্ধং শূদ্রমাসীনং গৃহপালমথাব্রবীৎ

কিং নু মে নাগ্নয়ঃ শূদ্র প্রতিনন্দন্তি দর্শনম্
ত্বং চাপি ন যথাপূর্বং কচ্চিত্ক্ষেমমিহাশ্রমে

কচ্চিন্ন রৈভ্যং পুত্রো মে গতবানল্পচেতনঃ
এতদাচক্ষ্ব মে শীঘ্রং ন হি মে শুধ্যতে মনঃ

শূদ্র উবাচ
রৈভ্যং গতো নূনমসৌ সুতস্তে মন্দচেতনঃ
তথা হি নিহতঃ শেতে রাক্ষসেন বলীয়সা

প্রকাল্যমানস্তেনায়ং শূলহস্তেন রক্ষসা
অগ্ন্যাগারং প্রতি দ্বারি ময়া দোর্ভ্যাং নিবারিতঃ

ততঃ স নিহতো হ্যত্র জলকামোঽশুচির্ধ্রুবম্
সংভাবিতো হি তূর্ণেন শূলহস্তেন রক্ষসা

লোমশ উবাচ
ভরদ্বাজস্তু শূদ্রস্য তচ্ছ্রুত্বা বিপ্রিয়ং বচঃ
গতাসুং পুত্রমাদায় বিললাপ সুদুঃখিতঃ

ব্রাহ্মণানাং কিলার্থায় ননু ত্বং তপ্তবাংস্তপঃ
দ্বিজানামনধীতা বৈ বেদাঃ সংপ্রতিভান্ত্বিতি

তথা কল্যাণশীলস্ত্বং ব্রাহ্মণেষু মহাত্মসু
অনাগাঃ সর্বভূতেষু কর্কশত্বমুপেয়িবান্

প্রতিষিদ্ধো ময়া তাত রৈভ্যাবসথদর্শনাৎ
গতবানেব তং ক্ষুদ্রং কালান্তকয়মোপমম্

যঃ স জানন্মহাতেজা বৃদ্ধস্যৈকং মমাত্মজম্
গতবানেব কোপস্য বশং পরমদুর্মতিঃ

পুত্রশোকমনুপ্রাপ্য এষ রৈভ্যস্য কর্মণা
ত্যক্ষ্যামি ত্বামৃতে পুত্র প্রাণানিষ্টতমান্ভুবি

যথাহং পুত্রশোকেন দেহং ত্যক্ষ্যামি কিল্বিষী
তথা জ্যেষ্ঠঃ সুতো রৈভ্যং হিংস্যাচ্ছীঘ্রমনাগসম্

সুখিনো বৈ নরা যেষাং জাত্যা পুত্রো ন বিদ্যতে
তে পুত্রশোকমপ্রাপ্য বিচরন্তি যথাসুখম্

যে তু পুত্রকৃতাচ্ছোকাদ্ভৃশং ব্যাকুলচেতসঃ
শপন্তীষ্টান্সখীনার্তাস্তেভ্যঃ পাপতরো নু কঃ

পরাসুশ্চ সুতো দৃষ্টঃ শপ্তশ্চেষ্টঃ সখা ময়া
ঈদৃশীমাপদং কো নু দ্বিতীয়োঽনুভবিষ্যতি

বিলপ্যৈবং বহুবিধং ভরদ্বাজোঽদহত্সুতম্
সুসমিদ্ধং ততঃ পশ্চাত্প্রবিবেশ হুতাশনম্