Utshovঅধ্যায় 139
139.1
লোমশ উবাচ
এতস্মিন্নেব কালে তু বৃহদ্দ্যুম্নো মহীপতিঃ
সত্রমাস্তে মহাভাগো রৈভ্যয়াজ্যঃ প্রতাপবান্
139.2
তেন রৈভ্যস্য বৈ পুত্রাবর্বাবসুপরাবসূ
বৃতৌ সহায়ৌ সত্রার্থে বৃহদ্দ্যুম্নেন ধীমতা
139.3
তত্র তৌ সমনুজ্ঞাতৌ পিত্রা কৌন্তেয় জগ্মতুঃ
আশ্রমে ত্বভবদ্রৈভ্যো ভার্যা চৈব পরাবসোঃ
139.4
অথাবলোককোঽগচ্ছদ্গৃহানেকঃ পরাবসুঃ
কৃষ্ণাজিনেন সংবীতং দদর্শ পিতরং বনে
139.5
জঘন্যরাত্রে নিদ্রান্ধঃ সাবশেষে তমস্যপি
চরন্তং গহনেঽরণ্যে মেনে স পিতরং মৃগম্
139.6
মৃগং তু মন্যমানেন পিতা বৈ তেন হিংসিতঃ
অকাময়ানেন তদা শরীরত্রাণমিচ্ছতা
139.7
স তস্য প্রেতকার্যাণি কৃত্বা সর্বাণি ভারত
পুনরাগম্য তত্সত্রমব্রবীদ্ভ্রাতরং বচঃ
139.8
ইদং কর্ম ন শক্তস্ত্বং বোঢুমেকঃ কথংচন
ময়া তু হিংসিতস্তাতো মন্যমানেন তং মৃগম্
139.9
সোঽস্মদর্থে ব্রতং সাধু চর ত্বং ব্রহ্মহিংসনম্
সমর্থো হ্যহমেকাকী কর্ম কর্তুমিদং মুনে
139.10
অর্বাবসুরুবাচ
করোতু বৈ ভবান্সত্রং বৃহদ্দ্যুম্নস্য ধীমতঃ
ব্রহ্মহত্যাং চরিষ্যেঽহং ত্বদর্থং নিয়তেন্দ্রিয়ঃ
139.11
লোমশ উবাচ
স তস্যা ব্রহ্মহত্যায়াঃ পারং গত্বা যুধিষ্ঠির
অর্বাবসুস্তদা সত্রমাজগাম পুনর্মুনিঃ
139.12
ততঃ পরাবসুর্দৃষ্ট্বা ভ্রাতরং সমুপস্থিতম্
বৃহদ্দ্যুম্নমুবাচেদং বচনং পরিষদ্গতম্
139.13
এষ তে ব্রহ্মহা যজ্ঞং মা দ্রষ্টুং প্রবিশেদিতি
ব্রহ্মহা প্রেক্ষিতেনাপি পীডয়েত্ত্বাং ন সংশয়ঃ
139.14
প্রেষ্যৈরুত্সার্যমাণস্তু রাজন্নর্বাবসুস্তদা
ন ময়া ব্রহ্মহত্যেয়ং কৃতেত্যাহ পুনঃ পুনঃ
139.15
উচ্যমানোঽসকৃত্প্রেষ্যৈর্ব্রহ্মহন্নিতি ভারত
নৈব স প্রতিজানাতি ব্রহ্মহত্যাং স্বয়ং কৃতাম্
মম ভ্রাত্রা কৃতমিদং ময়া তু পরিরক্ষিতম্
139.16
প্রীতাস্তস্যাভবন্দেবাঃ কর্মণার্বাবসোর্নৃপ
তং তে প্রবরয়ামাসুর্নিরাসুশ্চ পরাবসুম্
139.17
ততো দেবা বরং তস্মৈ দদুরগ্নিপুরোগমাঃ
স চাপি বরয়ামাস পিতুরুত্থানমাত্মনঃ
139.18
অনাগস্ত্বং তথা ভ্রাতুঃ পিতুশ্চাস্মরণং বধে
ভরদ্বাজস্য চোত্থানং যবক্রীতস্য চোভয়োঃ
139.19
ততঃ প্রাদুর্বভূবুস্তে সর্ব এব যুধিষ্ঠির
অথাব্রবীদ্যবক্রীতো দেবানগ্নিপুরোগমান্
139.20
সমধীতং ময়া ব্রহ্ম ব্রতানি চরিতানি চ
কথং নু রৈভ্যঃ শক্তো মামধীয়ানং তপস্বিনম্
তথায়ুক্তেন বিধিনা নিহন্তুমমরোত্তমাঃ
139.21
দেবা ঊচুঃ
মৈবং কৃথা যবক্রীত যথা বদসি বৈ মুনে
ঋতে গুরুমধীতা হি সুখং বেদাস্ত্বয়া পুরা
139.22
অনেন তু গুরূন্দুঃখাত্তোষয়িত্বা স্বকর্মণা
কালেন মহতা ক্লেশাদ্ব্রহ্মাধিগতমুত্তমম্
139.23
লোমশ উবাচ
যবক্রীতমথোক্ত্বৈবং দেবাঃ সাগ্নিপুরোগমাঃ
সংজীবয়িত্বা তান্সর্বান্পুনর্জগ্মুস্ত্রিবিষ্টপম্
139.24
আশ্রমস্তস্য পুণ্যোঽয়ং সদাপুষ্পফলদ্রুমঃ
অত্রোষ্য রাজশার্দূল সর্বপাপৈঃ প্রমোক্ষ্যসে