Utshovঅধ্যায় 140
140.1
লোমশ উবাচ
উশীরবীজং মৈনাকং গিরিং শ্বেতং চ ভারত
সমতীতোঽসি কৌন্তেয় কালশৈলং চ পার্থিব
140.2
এষা গঙ্গা সপ্তবিধা রাজতে ভরতর্ষভ
স্থানং বিরজসং রম্যং যত্রাগ্নির্নিত্যমিধ্যতে
140.3
এতদ্বৈ মানুষেণাদ্য ন শক্যং দ্রষ্টুমপ্যুত
সমাধিং কুরুতাব্যগ্রাস্তীর্থান্যেতানি দ্রক্ষ্যথ
140.4
শ্বেতং গিরিং প্রবেক্ষ্যামো মন্দরং চৈব পর্বতম্
যত্র মাণিচরো যক্ষঃ কুবেরশ্চাপি যক্ষরাট্
140.5
অষ্টাশীতিসহস্রাণি গন্ধর্বাঃ শীঘ্রচারিণঃ
তথা কিংপুরুষা রাজন্যক্ষাশ্চৈব চতুর্গুণাঃ
140.6
অনেকরূপসংস্থানা নানাপ্রহরণাশ্চ তে
যক্ষেন্দ্রং মনুজশ্রেষ্ঠ মাণিভদ্রমুপাসতে
140.7
তেষামৃদ্ধিরতীবাগ্র্যা গতৌ বায়ুসমাশ্চ তে
স্থানাত্প্রচ্যাবয়েয়ুর্যে দেবরাজমপি ধ্রুবম্
140.8
তৈস্তাত বলিভির্গুপ্তা যাতুধানৈশ্চ রক্ষিতাঃ
দুর্গমাঃ পর্বতাঃ পার্থ সমাধিং পরমং কুরু
140.9
কুবেরসচিবাশ্চান্যে রৌদ্রা মৈত্রাশ্চ রাক্ষসাঃ
তৈঃ সমেষ্যাম কৌন্তেয় যত্তো বিক্রমণে ভব
140.10
কৈলাসঃ পর্বতো রাজন্ষড্যোজনশতান্যুত
যত্র দেবাঃ সমায়ান্তি বিশালা যত্র ভারত
140.11
অসংখ্যেয়াস্তু কৌন্তেয় যক্ষরাক্ষসকিংনরাঃ
নাগাঃ সুপর্ণা গন্ধর্বাঃ কুবেরসদনং প্রতি
140.12
তান্বিগাহস্ব পার্থাদ্য তপসা চ দমেন চ
রক্ষ্যমাণো ময়া রাজন্ভীমসেনবলেন চ
140.13
স্বস্তি তে বরুণো রাজা যমশ্চ সমিতিংজয়ঃ
গঙ্গা চ যমুনা চৈব পর্বতশ্চ দধাতু তে
140.14
ইন্দ্রস্য জাম্বূনদপর্বতাগ্রে; শৃণোমি ঘোষং তব দেবি গঙ্গে
গোপায়য়েমং সুভগে গিরিভ্যঃ; সর্বাজমীঢাপচিতং নরেন্দ্রম্
ভবস্ব শর্ম প্রবিবিক্ষতোঽস্য; শৈলানিমাঞ্শৈলসুতে নৃপস্য
140.15
যুধিষ্ঠির উবাচ
অপূর্বোঽয়ং সংভ্রমো লোমশস্য; কৃষ্ণাং সর্বে রক্ষত মা প্রমাদম্
দেশো হ্যয়ং দুর্গতমো মতোঽস্য; তস্মাত্পরং শৌচমিহাচরধ্বম্
140.16
বৈশংপায়ন উবাচ
ততোঽব্রবীদ্ভীমমুদারবীর্যং; কৃষ্ণাং যত্তঃ পালয় ভীমসেন
শূন্যেঽর্জুনেঽসংনিহিতে চ তাত; ত্বমেব কৃষ্ণাং ভজসেঽসুখেষু
140.17
ততো মহাত্মা যমজৌ সমেত্য; মূর্ধন্যুপাঘ্রায় বিমৃজ্য গাত্রে
উবাচ তৌ বাষ্পকলং স রাজা; মা ভৈষ্টমাগচ্ছতমপ্রমত্তৌ