অধ্যায় 141

141.1

যুধিষ্ঠির উবাচ
অন্তর্হিতানি ভূতানি রক্ষাংসি বলবন্তি চ
অগ্নিনা তপসা চৈব শক্যং গন্তুং বৃকোদর

141.2

সংনিবর্তয় কৌন্তেয় ক্ষুত্পিপাসে বলান্বয়াৎ
ততো বলং চ দাক্ষ্যং চ সংশ্রয়স্ব কুরূদ্বহ

141.3

ঋষেস্ত্বয়া শ্রুতং বাক্যং কৈলাসং পর্বতং প্রতি
বুদ্ধ্যা প্রপশ্য কৌন্তেয় কথং কৃষ্ণা গমিষ্যতি

141.4

অথ বা সহদেবেন ধৌম্যেন চ সহাভিভো
সূদৈঃ পৌরোগবৈশ্চৈব সর্বৈশ্চ পরিচারকৈঃ

141.5

রথৈরশ্বৈশ্চ যে চান্যে বিপ্রাঃ ক্লেশাসহাঃ পথি
সর্বৈস্ত্বং সহিতো ভীম নিবর্তস্বায়তেক্ষণ

141.6

ত্রয়ো বয়ং গমিষ্যামো লঘ্বাহারা যতব্রতাঃ
অহং চ নকুলশ্চৈব লোমশশ্চ মহাতপাঃ

141.7

মমাগমনমাকাঙ্ক্ষন্গঙ্গাদ্বারে সমাহিতঃ
বসেহ দ্রৌপদীং রক্ষন্যাবদাগমনং মম

141.8

ভীম উবাচ
রাজপুত্রী শ্রমেণার্তা দুঃখার্তা চৈব ভারত
ব্রজত্যেব হি কল্যাণী শ্বেতবাহদিদৃক্ষয়া

141.9

তব চাপ্যরতিস্তীব্রা বর্ধতে তমপশ্যতঃ
কিং পুনঃ সহদেবং চ মাং চ কৃষ্ণাং চ ভারত

141.10

রথাঃ কামং নিবর্তন্তাং সর্বে চ পরিচারকাঃ
সূদাঃ পৌরোগবাশ্চৈব মন্যতে যত্র নো ভবান্

141.11

ন হ্যহং হাতুমিচ্ছামি ভবন্তমিহ কর্হিচিৎ
শৈলেঽস্মিন্রাক্ষসাকীর্ণে দুর্গেষু বিষমেষু চ

141.12

ইয়ং চাপি মহাভাগা রাজপুত্রী যতব্রতা
ত্বামৃতে পুরুষব্যাঘ্র নোত্সহেদ্বিনিবর্তিতুম্

141.13

তথৈব সহদেবোঽয়ং সততং ত্বামনুব্রতঃ
ন জাতু বিনিবর্তেত মতজ্ঞো হ্যহমস্য বৈ

141.14

অপি চাত্র মহারাজ সব্যসাচিদিদৃক্ষয়া
সর্বে লালসভূতাঃ স্ম তস্মাদ্যাস্যামহে সহ

141.15

যদ্যশক্যো রথৈর্গন্তুং শৈলোঽয়ং বহুকন্দরঃ
পদ্ভিরেব গমিষ্যামো মা রাজন্বিমনা ভব

141.16

অহং বহিষ্যে পাঞ্চালীং যত্র যত্র ন শক্ষ্যতি
ইতি মে বর্ততে বুদ্ধির্মা রাজন্বিমনা ভব

141.17

সুকুমারৌ তথা বীরৌ মাদ্রীনন্দিকরাবুভৌ
দুর্গে সংতারয়িষ্যামি যদ্যশক্তৌ ভবিষ্যতঃ

141.18

যুধিষ্ঠির উবাচ
এবং তে ভাষমাণস্য বলং ভীমাভিবর্ধতাম্
যস্ত্বমুত্সহসে বোঢুং দ্রৌপদীং বিপুলেঽধ্বনি

141.19

যমজৌ চাপি ভদ্রং তে নৈতদন্যত্র বিদ্যতে
বলং চ তে যশশ্চৈব ধর্মঃ কীর্তিশ্চ বর্ধতাম্

141.20

যস্ত্বমুত্সহসে নেতুং ভ্রাতরৌ সহ কৃষ্ণয়া
মা তে গ্লানির্মহাবাহো মা চ তেঽস্তু পরাভবঃ

141.21

বৈশংপায়ন উবাচ
ততঃ কৃষ্ণাব্রবীদ্বাক্যং প্রহসন্তী মনোরমা
গমিষ্যামি ন সংতাপঃ কার্যো মাং প্রতি ভারত

141.22

লোমশ উবাচ
তপসা শক্যতে গন্তুং পর্বতো গন্ধমাদনঃ
তপসা চৈব কৌন্তেয় সর্বে যোক্ষ্যামহে বয়ম্

141.23

নকুলঃ সহদেবশ্চ ভীমসেনশ্চ পার্থিব
অহং চ ত্বং চ কৌন্তেয় দ্রক্ষ্যামঃ শ্বেতবাহনম্

141.24

বৈশংপায়ন উবাচ
এবং সংভাষমাণাস্তে সুবাহোর্বিষয়ং মহৎ
দদৃশুর্মুদিতা রাজন্প্রভূতগজবাজিমৎ

141.25

কিরাততঙ্গণাকীর্ণং কুণিন্দশতসংকুলম্
হিমবত্যমরৈর্জুষ্টং বহ্বাশ্চর্যসমাকুলম্

141.26

সুবাহুশ্চাপি তান্দৃষ্ট্বা পূজয়া প্রত্যগৃহ্ণত
বিষয়ান্তে কুণিন্দানামীশ্বরঃ প্রীতিপূর্বকম্

141.27

তত্র তে পূজিতাস্তেন সর্ব এব সুখোষিতাঃ
প্রতস্থুর্বিমলে সূর্যে হিমবন্তং গিরিং প্রতি

141.28

ইন্দ্রসেনমুখাংশ্চৈব ভৃত্যান্পৌরোগবাংস্তথা
সূদাংশ্চ পরিবর্হং চ দ্রৌপদ্যাঃ সর্বশো নৃপ

141.29

রাজ্ঞঃ কুণিন্দাধিপতেঃ পরিদায় মহারথাঃ
পদ্ভিরেব মহাবীর্যা যয়ুঃ কৌরবনন্দনাঃ

141.30

তে শনৈঃ প্রাদ্রবন্সর্বে কৃষ্ণয়া সহ পাণ্ডবাঃ
তস্মাদ্দেশাত্সুসংহৃষ্টা দ্রষ্টুকামা ধনংজয়ম্

Contains text from DharmicData, made available under the Open Database License (ODbL). Simple meanings are written by AI and can contain mistakes.