Utshovঅধ্যায় 142
142.1
যুধিষ্ঠির উবাচ
ভীমসেন যমৌ চোভৌ পাঞ্চালি চ নিবোধত
নাস্তি ভূতস্য নাশো বৈ পশ্যতাস্মান্বনেচরান্
142.2
দুর্বলাঃ ক্লেশিতাঃ স্মেতি যদ্ব্রবীথেতরেতরম্
অশক্যেঽপি ব্রজামেতি ধনংজয়দিদৃক্ষয়া
142.3
তন্মে দহতি গাত্রাণি তূলরাশিমিবানলঃ
যচ্চ বীরং ন পশ্যামি ধনংজয়মুপান্তিকে
142.4
তস্য দর্শনতৃষ্ণং মাং সানুজং বনমাস্থিতম্
যাজ্ঞসেন্যাঃ পরামর্শঃ স চ বীর দহত্যুত
142.5
নকুলাত্পূর্বজং পার্থং ন পশ্যাম্যমিতৌজসম্
অজেয়মুগ্রধন্বানং তেন তপ্যে বৃকোদর
142.6
তীর্থানি চৈব রম্যাণি বনানি চ সরাংসি চ
চরামি সহ যুষ্মাভিস্তস্য দর্শনকাঙ্ক্ষয়া
142.7
পঞ্চ বর্ষাণ্যহং বীরং সত্যসংধং ধনংজয়ম্
যন্ন পশ্যামি বীভত্সুং তেন তপ্যে বৃকোদর
142.8
তং বৈ শ্যামং গুডাকেশং সিংহবিক্রান্তগামিনম্
ন পশ্যামি মহাবাহুং তেন তপ্যে বৃকোদর
142.9
কৃতাস্ত্রং নিপুণং যুদ্ধে প্রতিমানং ধনুষ্মতাম্
ন পশ্যামি নরশ্রেষ্ঠং তেন তপ্যে বৃকোদর
142.10
চরন্তমরিসংঘেষু কালং ক্রুদ্ধমিবান্তকম্
প্রভিন্নমিব মাতঙ্গং সিংহস্কন্ধং ধনংজয়ম্
142.11
যঃ স শক্রাদনবরো বীর্যেণ দ্রবিণেন চ
যময়োঃ পূর্বজঃ পার্থঃ শ্বেতাশ্বোঽমিতবিক্রমঃ
142.12
দুঃখেন মহতাবিষ্টঃ স্বকৃতেনানিবর্তিনা
অজেয়মুগ্রধন্বানং তং ন পশ্যামি ফল্গুনম্
142.13
সততং যঃ ক্ষমাশীলঃ ক্ষিপ্যমাণোঽপ্যণীয়সা
ঋজুমার্গপ্রপন্নস্য শর্মদাতাভয়স্য চ
142.14
স তু জিহ্মপ্রবৃত্তস্য মায়য়াভিজিঘাংসতঃ
অপি বজ্রধরস্যাপি ভবেত্কালবিষোপমঃ
142.15
শত্রোরপি প্রপন্নস্য সোঽনৃশংসঃ প্রতাপবান্
দাতাভয়স্য বীভত্সুরমিতাত্মা মহাবলঃ
142.16
সর্বেষামাশ্রয়োঽস্মাকং রণেঽরীণাং প্রমর্দিতা
আহর্তা সর্বরত্নানাং সর্বেষাং নঃ সুখাবহঃ
142.17
রত্নানি যস্য বীর্যেণ দিব্যান্যাসন্পুরা মম
বহূনি বহুজাতানি যানি প্রাপ্তঃ সুয়োধনঃ
142.18
যস্য বাহুবলাদ্বীর সভা চাসীত্পুরা মম
সর্বরত্নময়ী খ্যাতা ত্রিষু লোকেষু পাণ্ডব
142.19
বাসুদেবসমং বীর্যে কার্তবীর্যসমং যুধি
অজেয়মজিতং যুদ্ধে তং ন পশ্যামি ফল্গুনম্
142.20
সংকর্ষণং মহাবীর্যং ত্বাং চ ভীমাপরাজিতম্
অনুজাতঃ স বীর্যেণ বাসুদেবং চ শত্রুহা
142.21
যস্য বাহুবলে তুল্যঃ প্রভাবে চ পুরংদরঃ
জবে বায়ুর্মুখে সোমঃ ক্রোধে মৃত্যুঃ সনাতনঃ
142.22
তে বয়ং তং নরব্যাঘ্রং সর্বে বীর দিদৃক্ষবঃ
প্রবেক্ষ্যামো মহাবাহো পর্বতং গন্ধমাদনম্
142.23
বিশালা বদরী যত্র নরনারায়ণাশ্রমঃ
তং সদাধ্যুষিতং যক্ষৈর্দ্রক্ষ্যামো গিরিমুত্তমম্
142.24
কুবেরনলিনীং রম্যাং রাক্ষসৈরভিরক্ষিতাম্
পদ্ভিরেব গমিষ্যামস্তপ্যমানা মহত্তপঃ
142.25
নাতপ্ততপসা শক্যো দেশো গন্তুং বৃকোদর
ন নৃশংসেন লুব্ধেন নাপ্রশান্তেন ভারত
142.26
তত্র সর্বে গমিষ্যামো ভীমার্জুনপদৈষিণঃ
সায়ুধা বদ্ধনিস্ত্রিংশাঃ সহ বিপ্রৈর্মহাব্রতৈঃ
142.27
মক্ষিকান্মশকান্দংশান্ব্যাঘ্রান্সিংহান্সরীসৃপান্
প্রাপ্নোত্যনিয়তঃ পার্থ নিয়তস্তান্ন পশ্যতি
142.28
তে বয়ং নিয়তাত্মানঃ পর্বতং গন্ধমাদনম্
প্রবেক্ষ্যামো মিতাহারা ধনংজয়দিদৃক্ষবঃ