অধ্যায় 143

143.1

বৈশংপায়ন উবাচ
তে শূরাস্ততধন্বানস্তূণবন্তঃ সমার্গণাঃ
বদ্ধগোধাঙ্গুলিত্রাণাঃ খড্গবন্তোঽমিতৌজসঃ

পরিগৃহ্য দ্বিজশ্রেষ্ঠাঞ্শ্রেষ্ঠাঃ সর্বধনুষ্মতাম্
পাঞ্চালীসহিতা রাজন্প্রয়য়ুর্গন্ধমাদনম্

সরাংসি সরিতশ্চৈব পর্বতাংশ্চ বনানি চ
বৃক্ষাংশ্চ বহুলচ্ছায়ান্দদৃশুর্গিরিমূর্ধনি
নিত্যপুষ্পফলান্দেশান্দেবর্ষিগণসেবিতান্

আত্মন্যাত্মানমাধায় বীরা মূলফলাশনাঃ
চেরুরুচ্চাবচাকারান্দেশান্বিষমসংকটান্
পশ্যন্তো মৃগজাতানি বহূনি বিবিধানি চ

ঋষিসিদ্ধামরয়ুতং গন্ধর্বাপ্সরসাং প্রিয়ম্
বিবিশুস্তে মহাত্মানঃ কিংনরাচরিতং গিরিম্

প্রবিশত্স্বথ বীরেষু পর্বতং গন্ধমাদনম্
চণ্ডবাতং মহদ্বর্ষং প্রাদুরাসীদ্বিশাং পতে

ততো রেণুঃ সমুদ্ভূতঃ সপত্রবহুলো মহান্
পৃথিবীং চান্তরিক্ষং চ দ্যাং চৈব তমসাবৃণোৎ

ন স্ম প্রজ্ঞায়তে কিংচিদাবৃতে ব্যোম্নি রেণুনা
ন চাপি শেকুস্তে কর্তুমন্যোন্যস্যাভিভাষণম্

ন চাপশ্যন্ত তেঽন্যোন্যং তমসা হতচক্ষুষঃ
আকৃষ্যমাণা বাতেন সাশ্মচূর্ণেন ভারত

দ্রুমাণাং বাতভগ্নানাং পততাং ভূতলে ভৃশম্
অন্যেষাং চ মহীজানাং শব্দঃ সমভবন্মহান্

দ্যৌঃ স্বিত্পততি কিং ভূমৌ দীর্যন্তে পর্বতা নু কিম্
ইতি তে মেনিরে সর্বে পবনেন বিমোহিতাঃ

তে যথানন্তরান্বৃক্ষান্বল্মীকান্বিষমাণি চ
পাণিভিঃ পরিমার্গন্তো ভীতা বায়োর্নিলিল্যিরে

ততঃ কার্মুকমুদ্যম্য ভীমসেনো মহাবলঃ
কৃষ্ণামাদায় সংগত্যা তস্থাবাশ্রিত্য পাদপম্

ধর্মরাজশ্চ ধৌম্যশ্চ নিলিল্যাতে মহাবনে
অগ্নিহোত্রাণ্যুপাদায় সহদেবস্তু পর্বতে

নকুলো ব্রাহ্মণাশ্চান্যে লোমশশ্চ মহাতপাঃ
বৃক্ষানাসাদ্য সংত্রস্তাস্তত্র তত্র নিলিল্যিরে

মন্দীভূতে চ পবনে তস্মিন্রজসি শাম্যতি
মহদ্ভিঃ পৃষতৈস্তূর্ণং বর্ষমভ্যাজগাম হ

ততোঽশ্মসহিতা ধারাঃ সংবৃণ্বন্ত্যঃ সমন্ততঃ
প্রপেতুরনিশং তত্র শীঘ্রবাতসমীরিতাঃ

ততঃ সাগরগা আপঃ কীর্যমাণাঃ সমন্ততঃ
প্রাদুরাসন্সকলুষাঃ ফেনবত্যো বিশাং পতে

বহন্ত্যো বারি বহুলং ফেনোডুপপরিপ্লুতম্
পরিসস্রুর্মহাশব্দাঃ প্রকর্ষন্ত্যো মহীরুহান্

তস্মিন্নুপরতে বর্ষে বাতে চ সমতাং গতে
গতে হ্যম্ভসি নিম্নানি প্রাদুর্ভূতে দিবাকরে

নির্জগ্মুস্তে শনৈঃ সর্বে সমাজগ্মুশ্চ ভারত
প্রতস্থুশ্চ পুনর্বীরাঃ পর্বতং গন্ধমাদনম্