Utshovঅধ্যায় 144
144.1
বৈশংপায়ন উবাচ
ততঃ প্রয়াতমাত্রেষু পাণ্ডবেষু মহাত্মসু
পদ্ভ্যামনুচিতা গন্তুং দ্রৌপদী সমুপাবিশৎ
144.2
শ্রান্তা দুঃখপরীতা চ বাতবর্ষেণ তেন চ
সৌকুমার্যাচ্চ পাঞ্চালী সংমুমোহ যশস্বিনী
144.3
সা পাত্যমানা মোহেন বাহুভ্যামসিতেক্ষণা
বৃত্তাভ্যামনুরূপাভ্যামূরূ সমবলম্বত
144.4
আলম্বমানা সহিতাবূরূ গজকরোপমৌ
পপাত সহসা ভূমৌ বেপন্তী কদলী যথা
144.5
তাং পতন্তীং বরারোহাং সজ্জমানাং লতামিব
নকুলঃ সমভিদ্রুত্য পরিজগ্রাহ বীর্যবান্
144.6
নকুল উবাচ
রাজন্পাঞ্চালরাজস্য সুতেয়মসিতেক্ষণা
শ্রান্তা নিপতিতা ভূমৌ তামবেক্ষস্ব ভারত
144.7
অদুঃখার্হা পরং দুঃখং প্রাপ্তেয়ং মৃদুগামিনী
আশ্বাসয় মহারাজ তামিমাং শ্রমকর্শিতাম্
144.8
বৈশংপায়ন উবাচ
রাজা তু বচনাত্তস্য ভৃশং দুঃখসমন্বিতঃ
ভীমশ্চ সহদেবশ্চ সহসা সমুপাদ্রবন্
144.9
তামবেক্ষ্য তু কৌন্তেয়ো বিবর্ণবদনাং কৃশাম্
অঙ্কমানীয় ধর্মাত্মা পর্যদেবয়দাতুরঃ
144.10
কথং বেশ্মসু গুপ্তেষু স্বাস্তীর্ণশয়নোচিতা
শেতে নিপতিতা ভূমৌ সুখার্হা বরবর্ণিনী
144.11
সুকুমারৌ কথং পাদৌ মুখং চ কমলপ্রভম্
মত্কৃতেঽদ্য বরার্হায়াঃ শ্যামতাং সমুপাগতম্
144.12
কিমিদং দ্যূতকামেন ময়া কৃতমবুদ্ধিনা
আদায় কৃষ্ণাং চরতা বনে মৃগগণায়ুতে
144.13
সুখং প্রাপ্স্যতি পাঞ্চালী পাণ্ডবান্প্রাপ্য বৈ পতীন্
ইতি দ্রুপদরাজেন পিত্রা দত্তায়তেক্ষণা
144.14
তত্সর্বমনবাপ্যৈব শ্রমশোকাদ্ধি কর্শিতা
শেতে নিপতিতা ভূমৌ পাপস্য মম কর্মভিঃ
144.15
তথা লালপ্যমানে তু ধর্মরাজে যুধিষ্ঠিরে
ধৌম্যপ্রভৃতয়ঃ সর্বে তত্রাজগ্মুর্দ্বিজোত্তমাঃ
144.16
তে সমাশ্বাসয়ামাসুরাশীর্ভিশ্চাপ্যপূজয়ন্
রক্ষোঘ্নাংশ্চ তথা মন্ত্রাঞ্জেপুশ্চক্রুশ্চ তে ক্রিয়াঃ
144.17
পঠ্যমানেষু মন্ত্রেষু শান্ত্যর্থং পরমর্ষিভিঃ
স্পৃশ্যমানা করৈঃ শীতৈঃ পাণ্ডবৈশ্চ মুহুর্মুহুঃ
144.18
সেব্যমানা চ শীতেন জলমিশ্রেণ বায়ুনা
পাঞ্চালী সুখমাসাদ্য লেভে চেতঃ শনৈঃ শনৈঃ
144.19
পরিগৃহ্য চ তাং দীনাং কৃষ্ণামজিনসংস্তরে
তদা বিশ্রাময়ামাসুর্লব্ধসংজ্ঞাং তপস্বিনীম্
144.20
তস্যা যমৌ রক্ততলৌ পাদৌ পূজিতলক্ষণৌ
করাভ্যাং কিণজাতাভ্যাং শনকৈঃ সংববাহতুঃ
144.21
পর্যাশ্বাসয়দপ্যেনাং ধর্মরাজো যুধিষ্ঠিরঃ
উবাচ চ কুরুশ্রেষ্ঠো ভীমসেনমিদং বচঃ
144.22
বহবঃ পর্বতা ভীম বিষমা হিমদুর্গমাঃ
তেষু কৃষ্ণা মহাবাহো কথং নু বিচরিষ্যতি
144.23
ভীমসেন উবাচ
ত্বাং রাজন্রাজপুত্রীং চ যমৌ চ পুরুষর্ষভৌ
স্বয়ং নেষ্যামি রাজেন্দ্র মা বিষাদে মনঃ কৃথাঃ
144.24
অথ বাসৌ ময়া জাতো বিহগো মদ্বলোপমঃ
বহেদনঘ সর্বান্নো বচনাত্তে ঘটোত্কচঃ
144.25
বৈশংপায়ন উবাচ
অনুজ্ঞাতো ধর্মরাজ্ঞা পুত্রং সস্মার রাক্ষসম্
ঘটোত্কচশ্চ ধর্মাত্মা স্মৃতমাত্রঃ পিতুস্তদা
কৃতাঞ্জলিরুপাতিষ্ঠদভিবাদ্যাথ পাণ্ডবান্
144.26
ব্রাহ্মণাংশ্চ মহাবাহুঃ স চ তৈরভিনন্দিতঃ
উবাচ ভীমসেনং স পিতরং সত্যবিক্রমঃ
144.27
স্মৃতোঽস্মি ভবতা শীঘ্রং শুশ্রূষুরহমাগতঃ
আজ্ঞাপয় মহাবাহো সর্বং কর্তাস্ম্যসংশয়ম্
তচ্ছ্রুত্বা ভীমসেনস্তু রাক্ষসং পরিষস্বজে