Utshovঅধ্যায় 145
145.1
যুধিষ্ঠির উবাচ
ধর্মজ্ঞো বলবাঞ্শূরঃ সদ্যো রাক্ষসপুংগবঃ
ভক্তোঽস্মানৌরসঃ পুত্রো ভীম গৃহ্ণাতু মাতরম্
145.2
তব ভীম বলেনাহমতিভীমপরাক্রম
অক্ষতঃ সহ পাঞ্চাল্যা গচ্ছেয়ং গন্ধমাদনম্
145.3
বৈশংপায়ন উবাচ
ভ্রাতুর্বচনমাজ্ঞায় ভীমসেনো ঘটোত্কচম্
আদিদেশ নরব্যাঘ্রস্তনয়ং শত্রুকর্শনম্
145.4
হৈডিম্বেয় পরিশ্রান্তা তব মাতাপরাজিতা
ত্বং চ কামগমস্তাত বলবান্বহ তাং খগ
145.5
স্কন্ধমারোপ্য ভদ্রং তে মধ্যেঽস্মাকং বিহায়সা
গচ্ছ নীচিকয়া গত্যা যথা চৈনাং ন পীডয়েঃ
145.6
ঘটোত্কচ উবাচ
ধর্মরাজং চ ধৌম্যং চ রাজপুত্রীং যমৌ তথা
একোঽপ্যহমলং বোঢুং কিমুতাদ্য সহায়বান্
145.7
বৈশংপায়ন উবাচ
এবমুক্ত্বা ততঃ কৃষ্ণামুবাহ স ঘটোত্কচঃ
পাণ্ডূনাং মধ্যগো বীরঃ পাণ্ডবানপি চাপরে
145.8
লোমশঃ সিদ্ধমার্গেণ জগামানুপমদ্যুতিঃ
স্বেনৈবাত্মপ্রভাবেন দ্বিতীয় ইব ভাস্করঃ
145.9
ব্রাহ্মণাংশ্চাপি তান্সর্বান্সমুপাদায় রাক্ষসাঃ
নিয়োগাদ্রাক্ষসেন্দ্রস্য জগ্মুর্ভীমপরাক্রমাঃ
145.10
এবং সুরমণীয়ানি বনান্যুপবনানি চ
আলোকয়ন্তস্তে জগ্মুর্বিশালাং বদরীং প্রতি
145.11
তে ত্বাশুগতিভির্বীরা রাক্ষসৈস্তৈর্মহাবলৈঃ
উহ্যমানা যয়ুঃ শীঘ্রং মহদধ্বানমল্পবৎ
145.12
দেশান্ম্লেচ্ছগণাকীর্ণান্নানারত্নাকরায়ুতান্
দদৃশুর্গিরিপাদাংশ্চ নানাধাতুসমাচিতান্
145.13
বিদ্যাধরগণাকীর্ণান্যুতান্বানরকিংনরৈঃ
তথা কিংপুরুষৈশ্চৈব গন্ধর্বৈশ্চ সমন্ততঃ
145.14
নদীজালসমাকীর্ণান্নানাপক্ষিরুতাকুলান্
নানাবিধৈর্মৃগৈর্জুষ্টান্বানরৈশ্চোপশোভিতান্
145.15
তে ব্যতীত্য বহূন্দেশানুত্তরাংশ্চ কুরূনপি
দদৃশুর্বিবিধাশ্চর্যং কৈলাসং পর্বতোত্তমম্
145.16
তস্যাভ্যাশে তু দদৃশুর্নরনারায়ণাশ্রমম্
উপেতং পাদপৈর্দিব্যৈঃ সদাপুষ্পফলোপগৈঃ
145.17
দদৃশুস্তাং চ বদরীং বৃত্তস্কন্ধাং মনোরমাম্
স্নিগ্ধামবিরলচ্ছায়াং শ্রিয়া পরময়া যুতাম্
145.18
পত্রৈঃ স্নিগ্ধৈরবিরলৈরুপেতাং মৃদুভিঃ শুভাম্
বিশালশাখাং বিস্তীর্ণামতিদ্যুতিসমন্বিতাম্
145.19
ফলৈরুপচিতৈর্দিব্যৈরাচিতাং স্বাদুভির্ভৃশম্
মধুস্রবৈঃ সদা দিব্যাং মহর্ষিগণসেবিতাম্
মদপ্রমুদিতৈর্নিত্যং নানাদ্বিজগণৈর্যুতাম্
145.20
অদংশমশকে দেশে বহুমূলফলোদকে
নীলশাদ্বলসংছন্নে দেবগন্ধর্বসেবিতে
145.21
সুসমীকৃতভূভাগে স্বভাববিহিতে শুভে
জাতাং হিমমৃদুস্পর্শে দেশেঽপহতকণ্টকে
145.22
তামুপেত্য মহাত্মানঃ সহ তৈর্ব্রাহ্মণর্ষভৈঃ
অবতেরুস্ততঃ সর্বে রাক্ষসস্কন্ধতঃ শনৈঃ
145.23
ততস্তমাশ্রমং পুণ্যং নরনারায়ণাশ্রিতম্
দদৃশুঃ পাণ্ডবা রাজন্সহিতা দ্বিজপুংগবৈঃ
145.24
তমসা রহিতং পুণ্যমনামৃষ্টং রবেঃ করৈঃ
ক্ষুত্তৃট্শীতোষ্ণদোষৈশ্চ বর্জিতং শোকনাশনম্
145.25
মহর্ষিগণসংবাধং ব্রাহ্ম্যা লক্ষ্ম্যা সমন্বিতম্
দুষ্প্রবেশং মহারাজ নরৈর্ধর্মবহিষ্কৃতৈঃ
145.26
বলিহোমার্চিতং দিব্যং সুসংমৃষ্টানুলেপনম্
দিব্যপুষ্পোপহারৈশ্চ সর্বতোঽভিবিরাজিতম্
145.27
বিশালৈরগ্নিশরণৈঃ স্রুগ্ভাণ্ডৈরাচিতং শুভৈঃ
মহদ্ভিস্তোয়কলশৈঃ কঠিনৈশ্চোপশোভিতম্
শরণ্যং সর্বভূতানাং ব্রহ্মঘোষনিনাদিতম্
145.28
দিব্যমাশ্রয়ণীয়ং তমাশ্রমং শ্রমনাশনম্
শ্রিয়া যুতমনির্দেশ্যং দেবচর্যোপশোভিতম্
145.29
ফলমূলাশনৈর্দান্তৈশ্চীরকৃষ্ণাজিনাম্বরৈঃ
সূর্যবৈশ্বানরসমৈস্তপসা ভাবিতাত্মভিঃ
145.30
মহর্ষিভির্মোক্ষপরৈর্যতিভির্নিয়তেন্দ্রিয়ৈঃ
ব্রহ্মভূতৈর্মহাভাগৈরুপেতং ব্রহ্মবাদিভিঃ
145.31
সোঽভ্যগচ্ছন্মহাতেজাস্তানৃষীন্নিয়তঃ শুচিঃ
ভ্রাতৃভিঃ সহিতো ধীমান্ধর্মপুত্রো যুধিষ্ঠিরঃ
145.32
দিব্যজ্ঞানোপপন্নাস্তে দৃষ্ট্বা প্রাপ্তং যুধিষ্ঠিরম্
অভ্যগচ্ছন্ত সুপ্রীতাঃ সর্ব এব মহর্ষয়ঃ
আশীর্বাদান্প্রয়ুঞ্জানাঃ স্বাধ্যায়নিরতা ভৃশম্
145.33
প্রীতাস্তে তস্য সত্কারং বিধিনা পাবকোপমাঃ
উপাজহ্রুশ্চ সলিলং পুষ্পমূলফলং শুচি
145.34
স তৈঃ প্রীত্যাথ সত্কারমুপনীতং মহর্ষিভিঃ
প্রয়তঃ প্রতিগৃহ্যাথ ধর্মপুত্রো যুধিষ্ঠিরঃ
145.35
তং শক্রসদনপ্রখ্যং দিব্যগন্ধং মনোরমম্
প্রীতঃ স্বর্গোপমং পুণ্যং পাণ্ডবঃ সহ কৃষ্ণয়া
145.36
বিবেশ শোভয়া যুক্তং ভ্রাতৃভিশ্চ সহানঘ
ব্রাহ্মণৈর্বেদবেদাঙ্গপারগৈশ্চ সহাচ্যুতঃ
145.37
তত্রাপশ্যত্স ধর্মাত্মা দেবদেবর্ষিপূজিতম্
নরনারায়ণস্থানং ভাগীরথ্যোপশোভিতম্
145.38
মধুস্রবফলাং দিব্যাং মহর্ষিগণসেবিতাম্
তামুপেত্য মহাত্মানস্তেঽবসন্ব্রাহ্মণৈঃ সহ
145.39
আলোকয়ন্তো মৈনাকং নানাদ্বিজগণায়ুতম্
হিরণ্যশিখরং চৈব তচ্চ বিন্দুসরঃ শিবম্
145.40
ভাগীরথীং সুতীর্থাং চ শীতামলজলাং শিবাম্
মণিপ্রবালপ্রস্তারাং পাদপৈরুপশোভিতাম্
145.41
দিব্যপুষ্পসমাকীর্ণাং মনসঃ প্রীতিবর্ধনীম্
বীক্ষমাণা মহাত্মানো বিজহ্রুস্তত্র পাণ্ডবাঃ
145.42
তত্র দেবান্পিতৄংশ্চৈব তর্পয়ন্তঃ পুনঃ পুনঃ
ব্রাহ্মণৈঃ সহিতা বীরা ন্যবসন্পুরুষর্ষভাঃ
145.43
কৃষ্ণায়াস্তত্র পশ্যন্তঃ ক্রীডিতান্যমরপ্রভাঃ
বিচিত্রাণি নরব্যাঘ্রা রেমিরে তত্র পাণ্ডবাঃ