Utshovঅধ্যায় 146
146.1
বৈশংপায়ন উবাচ
তত্র তে পুরুষব্যাঘ্রাঃ পরমং শৌচমাস্থিতাঃ
ষড্রাত্রমবসন্বীরা ধনংজয়দিদৃক্ষয়া
তস্মিন্বিহরমাণাশ্চ রমমাণাশ্চ পাণ্ডবাঃ
146.2
মনোজ্ঞে কাননবরে সর্বভূতমনোরমে
পাদপৈঃ পুষ্পবিকচৈঃ ফলভারাবনামিতৈঃ
146.3
শোভিতং সর্বতোরম্যৈঃ পুংস্কোকিলকুলাকুলৈঃ
স্নিগ্ধপত্রৈরবিরলৈঃ শীতচ্ছায়ৈর্মনোরমৈঃ
146.4
সরাংসি চ বিচিত্রাণি প্রসন্নসলিলানি চ
কমলৈঃ সোত্পলৈস্তত্র ভ্রাজমানানি সর্বশঃ
পশ্যন্তশ্চারুরূপাণি রেমিরে তত্র পাণ্ডবাঃ
146.5
পুণ্যগন্ধঃ সুখস্পর্শো ববৌ তত্র সমীরণঃ
হ্লাদয়ন্পাণ্ডবান্সর্বান্সকৃষ্ণান্সদ্বিজর্ষভান্
146.6
ততঃ পূর্বোত্তরো বায়ুঃ পবমানো যদৃচ্ছয়া
সহস্রপত্রমর্কাভং দিব্যং পদ্মমুদাবহৎ
146.7
তদপশ্যত পাঞ্চালী দিব্যগন্ধং মনোরমম্
অনিলেনাহৃতং ভূমৌ পতিতং জলজং শুচি
146.8
তচ্ছুভা শুভমাসাদ্য সৌগন্ধিকমনুত্তমম্
অতীব মুদিতা রাজন্ভীমসেনমথাব্রবীৎ
146.9
পশ্য দিব্যং সুরুচিরং ভীম পুষ্পমনুত্তমম্
গন্ধসংস্থানসংপন্নং মনসো মম নন্দনম্
146.10
এতত্তু ধর্মরাজায় প্রদাস্যামি পরংতপ
হরেরিদং মে কামায় কাম্যকে পুনরাশ্রমে
146.11
যদি তেঽহং প্রিয়া পার্থ বহূনীমান্যুপাহর
তান্যহং নেতুমিচ্ছামি কাম্যকং পুনরাশ্রমম্
146.12
এবমুক্ত্বা তু পাঞ্চালী ভীমসেনমনিন্দিতা
জগাম ধর্মরাজায় পুষ্পমাদায় তত্তদা
146.13
অভিপ্রায়ং তু বিজ্ঞায় মহিষ্যাঃ পুরুষর্ষভঃ
প্রিয়ায়াঃ প্রিয়কামঃ স ভীমো ভীমপরাক্রমঃ
146.14
বাতং তমেবাভিমুখো যতস্তত্পুষ্পমাগতম্
আজিহীর্ষুর্জগামাশু স পুষ্পাণ্যপরাণ্যপি
146.15
রুক্মপৃষ্ঠং ধনুর্গৃহ্য শরাংশ্চাশীবিষোপমান্
মৃগরাডিব সংক্রুদ্ধঃ প্রভিন্ন ইব কুঞ্জরঃ
146.16
দ্রৌপদ্যাঃ প্রিয়মন্বিচ্ছন্স্ববাহুবলমাশ্রিতঃ
ব্যপেতভয়সংমোহঃ শৈলমভ্যপতদ্বলী
146.17
স তং দ্রুমলতাগুল্মচ্ছন্নং নীলশিলাতলম্
গিরিং চচারারিহরঃ কিংনরাচরিতং শুভম্
146.18
নানাবর্ণধরৈশ্চিত্রং ধাতুদ্রুমমৃগাণ্ডজৈঃ
সর্বভূষণসংপূর্ণং ভূমের্ভুজমিবোচ্ছ্রিতম্
146.19
সর্বর্তুরমণীয়েষু গন্ধমাদনসানুষু
সক্তচক্ষুরভিপ্রায়ং হৃদয়েনানুচিন্তয়ন্
146.20
পুংস্কোকিলনিনাদেষু ষট্পদাভিরুতেষু চ
বদ্ধশ্রোত্রমনশ্চক্ষুর্জগামামিতবিক্রমঃ
146.21
জিঘ্রমাণো মহাতেজাঃ সর্বর্তুকুসুমোদ্ভবম্
গন্ধমুদ্দামমুদ্দামো বনে মত্ত ইব দ্বিপঃ
146.22
হ্রিয়মাণশ্রমঃ পিত্রা সংপ্রহৃষ্টতনূরুহঃ
পিতুঃ সংস্পর্শশীতেন গন্ধমাদনবায়ুনা
146.23
স যক্ষগন্ধর্বসুরব্রহ্মর্ষিগণসেবিতম্
বিলোডয়ামাস তদা পুষ্পহেতোররিংদমঃ
146.24
বিষমচ্ছেদরচিতৈরনুলিপ্তমিবাঙ্গুলৈঃ
বিমলৈর্ধাতুবিচ্ছেদৈঃ কাঞ্চনাঞ্জনরাজতৈঃ
146.25
সপক্ষমিব নৃত্যন্তং পার্শ্বলগ্নৈঃ পয়োধরৈঃ
মুক্তাহারৈরিব চিতং চ্যুতৈঃ প্রস্রবণোদকৈঃ
146.26
অভিরামনদীকুঞ্জনির্ঝরোদরকন্দরম্
অপ্সরোনূপুররবৈঃ প্রনৃত্তবহুবর্হিণম্
146.27
দিগ্বারণবিষাণাগ্রৈর্ঘৃষ্টোপলশিলাতলম্
স্রস্তাংশুকমিবাক্ষোভ্যৈর্নিম্নগানিঃসৃতৈর্জলৈঃ
146.28
সশষ্পকবলৈঃ স্বস্থৈরদূরপরিবর্তিভিঃ
ভয়স্যাজ্ঞৈশ্চ হরিণৈঃ কৌতূহলনিরীক্ষিতঃ
146.29
চালয়ন্নূরুবেগেন লতাজালান্যনেকশঃ
আক্রীডমানঃ কৌন্তেয়ঃ শ্রীমান্বায়ুসুতো যয়ৌ
146.30
প্রিয়ামনোরথং কর্তুমুদ্যতশ্চারুলোচনঃ
প্রাংশুঃ কনকতালাভঃ সিংহসংহননো যুবা
146.31
মত্তবারণবিক্রান্তো মত্তবারণবেগবান্
মত্তবারণতাম্রাক্ষো মত্তবারণবারণঃ
146.32
প্রিয়পার্শ্বোপবিষ্টাভির্ব্যাবৃত্তাভির্বিচেষ্টিতৈঃ
যক্ষগন্ধর্বয়োষাভিরদৃশ্যাভির্নিরীক্ষিতঃ
146.33
নবাবতারং রূপস্য বিক্রীণন্নিব পাণ্ডবঃ
চচার রমণীয়েষু গন্ধমাদনসানুষু
146.34
সংস্মরন্বিবিধান্ক্লেশান্দুর্যোধনকৃতান্বহূন্
দ্রৌপদ্যা বনবাসিন্যাঃ প্রিয়ং কর্তুং সমুদ্যতঃ
146.35
সোঽচিন্তয়দ্গতে স্বর্গমর্জুনে ময়ি চাগতে
পুষ্পহেতোঃ কথং ন্বার্যঃ করিষ্যতি যুধিষ্ঠিরঃ
146.36
স্নেহান্নরবরো নূনমবিশ্বাসাদ্বনস্য চ
নকুলং সহদেবং চ ন মোক্ষ্যতি যুধিষ্ঠিরঃ
146.37
কথং নু কুসুমাবাপ্তিঃ স্যাচ্ছীঘ্রমিতি চিন্তয়ন্
প্রতস্থে নরশার্দূলঃ পক্ষিরাডিব বেগিতঃ
146.38
কম্পয়ন্মেদিনীং পদ্ভ্যাং নির্ঘাত ইব পর্বসু
ত্রাসয়ন্গজয়ূথানি বাতরংহা বৃকোদরঃ
146.39
সিংহব্যাঘ্রগণাংশ্চৈব মর্দমানো মহাবলঃ
উন্মূলয়ন্মহাবৃক্ষান্পোথয়ংশ্চোরসা বলী
146.40
লতাবল্লীশ্চ বেগেন বিকর্ষন্পাণ্ডুনন্দনঃ
উপর্যুপরি শৈলাগ্রমারুরুক্ষুরিব দ্বিপঃ
বিনর্দমানোঽতিভৃশং সবিদ্যুদিব তোয়দঃ
146.41
তস্য শব্দেন ঘোরেণ ধনুর্ঘোষেণ চাভিভো
ত্রস্তানি মৃগয়ূথানি সমন্তাদ্বিপ্রদুদ্রুবুঃ
146.42
অথাপশ্যন্মহাবাহুর্গন্ধমাদনসানুষু
সুরম্যং কদলীষণ্ডং বহুয়োজনবিস্তৃতম্
146.43
তমভ্যগচ্ছদ্বেগেন ক্ষোভয়িষ্যন্মহাবলঃ
মহাগজ ইবাস্রাবী প্রভঞ্জন্বিবিধান্দ্রুমান্
146.44
উত্পাট্য কদলীস্কন্ধান্বহুতালসমুচ্ছ্রয়ান্
চিক্ষেপ তরসা ভীমঃ সমন্তাদ্বলিনাং বরঃ
146.45
ততঃ সত্ত্বান্যুপাক্রামন্বহূনি চ মহান্তি চ
রুরুবারণসংঘাশ্চ মহিষাশ্চ জলাশ্রয়াঃ
146.46
সিংহব্যাঘ্রাশ্চ সংক্রুদ্ধা ভীমসেনমভিদ্রবন্
ব্যাদিতাস্যা মহারৌদ্রা বিনদন্তোঽতিভীষণাঃ
146.47
ততো বায়ুসুতঃ ক্রোধাত্স্ববাহুবলমাশ্রিতঃ
গজেনাঘ্নন্গজং ভীমঃ সিংহং সিংহেন চাভিভূঃ
তলপ্রহারৈরন্যাংশ্চ ব্যহনত্পাণ্ডবো বলী
146.48
তে হন্যমানা ভীমেন সিংহব্যাঘ্রতরক্ষবঃ
ভয়াদ্বিসসৃপুঃ সর্বে শকৃন্মূত্রং চ সুস্রুবুঃ
146.49
প্রবিবেশ ততঃ ক্ষিপ্রং তানপাস্য মহাবলঃ
বনং পাণ্ডুসুতঃ শ্রীমাঞ্শব্দেনাপূরয়ন্দিশঃ
146.50
তেন শব্দেন চোগ্রেণ ভীমসেনরবেণ চ
বনান্তরগতাঃ সর্বে বিত্রেসুর্মৃগপক্ষিণঃ
146.51
তং শব্দং সহসা শ্রুত্বা মৃগপক্ষিসমীরিতম্
জলার্দ্রপক্ষা বিহগাঃ সমুত্পেতুঃ সহস্রশঃ
146.52
তানৌদকান্পক্ষিগণান্নিরীক্ষ্য ভরতর্ষভঃ
তানেবানুসরন্রম্যং দদর্শ সুমহত্সরঃ
146.53
কাঞ্চনৈঃ কদলীষণ্ডৈর্মন্দমারুতকম্পিতৈঃ
বীজ্যমানমিবাক্ষোভ্যং তীরান্তরবিসর্পিভিঃ
146.54
তত্সরোঽথাবতীর্যাশু প্রভূতকমলোত্পলম্
মহাগজ ইবোদ্দামশ্চিক্রীড বলবদ্বলী
বিক্রীড্য তস্মিন্সুচিরমুত্ততারামিতদ্যুতিঃ
146.55
ততোঽবগাহ্য বেগেন তদ্বনং বহুপাদপম্
দধ্মৌ চ শঙ্খং স্বনবত্সর্বপ্রাণেন পাণ্ডবঃ
146.56
তস্য শঙ্খস্য শব্দেন ভীমসেনরবেণ চ
বাহুশব্দেন চোগ্রেণ নর্দন্তীব গিরের্গুহাঃ
146.57
তং বজ্রনিষ্পেষসমমাস্ফোটিতরবং ভৃশম্
শ্রুত্বা শৈলগুহাসুপ্তৈঃ সিংহৈর্মুক্তো মহাস্বনঃ
146.58
সিংহনাদভয়ত্রস্তৈঃ কুঞ্জরৈরপি ভারত
মুক্তো বিরাবঃ সুমহান্পর্বতো যেন পূরিতঃ
146.59
তং তু নাদং ততঃ শ্রুত্বা সুপ্তো বানরপুংগবঃ
প্রাজৃম্ভত মহাকায়ো হনূমান্নাম বানরঃ
146.60
কদলীষণ্ডমধ্যস্থো নিদ্রাবশগতস্তদা
জৃম্ভমাণঃ সুবিপুলং শক্রধ্বজমিবোচ্ছ্রিতম্
আস্ফোটয়ত লাঙ্গূলমিন্দ্রাশনিসমস্বনম্
146.61
তস্য লাঙ্গূলনিনদং পর্বতঃ স গুহামুখৈঃ
উদ্গারমিব গৌর্নর্দমুত্সসর্জ সমন্ততঃ
146.62
স লাঙ্গূলরবস্তস্য মত্তবারণনিস্বনম্
অন্তর্ধায় বিচিত্রেষু চচার গিরিসানুষু
146.63
স ভীমসেনস্তং শ্রুত্বা সংপ্রহৃষ্টতনূরুহঃ
শব্দপ্রভবমন্বিচ্ছংশ্চচার কদলীবনম্
146.64
কদলীবনমধ্যস্থমথ পীনে শিলাতলে
স দদর্শ মহাবাহুর্বানরাধিপতিং স্থিতম্
146.65
বিদ্যুত্সংঘাতদুষ্প্রেক্ষ্যং বিদ্যুত্সংঘাতপিঙ্গলম্
বিদ্যুত্সংঘাতসদৃশং বিদ্যুত্সংঘাতচঞ্চলম্
146.66
বাহুস্বস্তিকবিন্যস্তপীনহ্রস্বশিরোধরম্
স্কন্ধভূয়িষ্ঠকায়ত্বাত্তনুমধ্যকটীতটম্
146.67
কিংচিচ্চাভুগ্নশীর্ষেণ দীর্ঘরোমাঞ্চিতেন চ
লাঙ্গূলেনোর্ধ্বগতিনা ধ্বজেনেব বিরাজিতম্
146.68
রক্তোষ্ঠং তাম্রজিহ্বাস্যং রক্তকর্ণং চলদ্ভ্রুবম্
বদনং বৃত্তদংষ্ট্রাগ্রং রশ্মিবন্তমিবোডুপম্
146.69
বদনাভ্যন্তরগতৈঃ শুক্লভাসৈরলংকৃতম্
কেসরোত্করসংমিশ্রমশোকানামিবোত্করম্
146.70
হিরণ্ময়ীনাং মধ্যস্থং কদলীনাং মহাদ্যুতিম্
দীপ্যমানং স্ববপুষা অর্চিষ্মন্তমিবানলম্
146.71
নিরীক্ষন্তমবিত্রস্তং লোচনৈর্মধুপিঙ্গলৈঃ
তং বানরবরং বীরমতিকায়ং মহাবলম্
146.72
অথোপসৃত্য তরসা ভীমো ভীমপরাক্রমঃ
সিংহনাদং সমকরোদ্বোধয়িষ্যন্কপিং তদা
146.73
তেন শব্দেন ভীমস্য বিত্রেসুর্মৃগপক্ষিণঃ
হনূমাংশ্চ মহাসত্ত্ব ঈষদুন্মীল্য লোচনে
অবৈক্ষদথ সাবজ্ঞং লোচনৈর্মধুপিঙ্গলৈঃ
146.74
স্মিতেনাভাষ্য কৌন্তেয়ং বানরো নরমব্রবীৎ
কিমর্থং সরুজস্তেঽহং সুখসুপ্তঃ প্রবোধিতঃ
146.75
ননু নাম ত্বয়া কার্যা দয়া ভূতেষু জানতা
বয়ং ধর্মং ন জানীমস্তির্যগ্যোনিং সমাশ্রিতাঃ
146.76
মনুষ্যা বুদ্ধিসংপন্না দয়াং কুর্বন্তি জন্তুষু
ক্রূরেষু কর্মসু কথং দেহবাক্চিত্তদূষিষু
ধর্মঘাতিষু সজ্জন্তে বুদ্ধিমন্তো ভবদ্বিধাঃ
146.77
ন ত্বং ধর্মং বিজানাসি বৃদ্ধা নোপাসিতাস্ত্বয়া
অল্পবুদ্ধিতয়া বন্যানুত্সাদয়সি যন্মৃগান্
146.78
ব্রূহি কস্ত্বং কিমর্থং বা বনং ত্বমিদমাগতঃ
বর্জিতং মানুষৈর্ভাবৈস্তথৈব পুরুষৈরপি
146.79
অতঃ পরমগম্যোঽয়ং পর্বতঃ সুদুরারুহঃ
বিনা সিদ্ধগতিং বীর গতিরত্র ন বিদ্যতে
146.80
কারুণ্যাত্সৌহৃদাচ্চৈব বারয়ে ত্বাং মহাবল
নাতঃ পরং ত্বয়া শক্যং গন্তুমাশ্বসিহি প্রভো
146.81
ইমান্যমৃতকল্পানি মূলানি চ ফলানি চ
ভক্ষয়িত্বা নিবর্তস্ব গ্রাহ্যং যদি বচো মম