Utshovঅধ্যায় 147
147.1
বৈশংপায়ন উবাচ
এতচ্ছ্রুত্বা বচস্তস্য বানরেন্দ্রস্য ধীমতঃ
ভীমসেনস্তদা বীরঃ প্রোবাচামিত্রকর্শনঃ
147.2
কো ভবান্কিংনিমিত্তং বা বানরং বপুরাশ্রিতঃ
ব্রাহ্মণানন্তরো বর্ণঃ ক্ষত্রিয়স্ত্বানুপৃচ্ছতি
147.3
কৌরবঃ সোমবংশীয়ঃ কুন্ত্যা গর্ভেণ ধারিতঃ
পাণ্ডবো বায়ুতনয়ো ভীমসেন ইতি শ্রুতঃ
147.4
স বাক্যং ভীমসেনস্য স্মিতেন প্রতিগৃহ্য তৎ
হনূমান্বায়ুতনয়ো বায়ুপুত্রমভাষত
147.5
বানরোঽহং ন তে মার্গং প্রদাস্যামি যথেপ্সিতম্
সাধু গচ্ছ নিবর্তস্ব মা ত্বং প্রাপ্স্যসি বৈশসম্
147.6
ভীম উবাচ
বৈশসং বাস্তু যদ্বান্যন্ন ত্বা পৃচ্ছামি বানর
প্রয়চ্ছোত্তিষ্ঠ মার্গং মে মা ত্বং প্রাপ্স্যসি বৈশসম্
147.7
হনূমানুবাচ
নাস্তি শক্তির্মমোত্থাতুং ব্যাধিনা ক্লেশিতো হ্যহম্
যদ্যবশ্যং প্রয়াতব্যং লঙ্ঘয়িত্বা প্রয়াহি মাম্
147.8
ভীম উবাচ
নির্গুণঃ পরমাত্মেতি দেহং তে ব্যাপ্য তিষ্ঠতি
তমহং জ্ঞানবিজ্ঞেয়ং নাবমন্যে ন লঙ্ঘয়ে
147.9
যদ্যাগমৈর্ন বিন্দেয়ং তমহং ভূতভাবনম্
ক্রমেয়ং ত্বাং গিরিং চেমং হনূমানিব সাগরম্
147.10
হনূমানুবাচ
ক এষ হনুমান্নাম সাগরো যেন লঙ্ঘিতঃ
পৃচ্ছামি ত্বা কুরুশ্রেষ্ঠ কথ্যতাং যদি শক্যতে
147.11
ভীম উবাচ
ভ্রাতা মম গুণশ্লাঘ্যো বুদ্ধিসত্ত্ববলান্বিতঃ
রামায়ণেঽতিবিখ্যাতঃ শূরো বানরপুংগবঃ
147.12
রামপত্নীকৃতে যেন শতয়োজনমায়তঃ
সাগরঃ প্লবগেন্দ্রেণ ক্রমেণৈকেন লঙ্ঘিতঃ
147.13
স মে ভ্রাতা মহাবীর্যস্তুল্যোঽহং তস্য তেজসা
বলে পরাক্রমে যুদ্ধে শক্তোঽহং তব নিগ্রহে
147.14
উত্তিষ্ঠ দেহি মে মার্গং পশ্য বা মেঽদ্য পৌরুষম্
মচ্ছাসনমকুর্বাণং মা ত্বা নেষ্যে যমক্ষয়ম্
147.15
বৈশংপায়ন উবাচ
বিজ্ঞায় তং বলোন্মত্তং বাহুবীর্যেণ গর্বিতম্
হৃদয়েনাবহস্যৈনং হনূমান্বাক্যমব্রবীৎ
147.16
প্রসীদ নাস্তি মে শক্তিরুত্থাতুং জরয়ানঘ
মমানুকম্পয়া ত্বেতত্পুচ্ছমুত্সার্য গম্যতাম্
147.17
সাবজ্ঞমথ বামেন স্ময়ঞ্জগ্রাহ পাণিনা
ন চাশকচ্চালয়িতুং ভীমঃ পুচ্ছং মহাকপেঃ
147.18
উচ্চিক্ষেপ পুনর্দোর্ভ্যামিন্দ্রায়ুধমিবোচ্ছ্রিতম্
নোদ্ধর্তুমশকদ্ভীমো দোর্ভ্যামপি মহাবলঃ
147.19
উত্ক্ষিপ্তভ্রূর্বিবৃত্তাক্ষঃ সংহতভ্রুকুটীমুখঃ
স্বিন্নগাত্রোঽভবদ্ভীমো ন চোদ্ধর্তুং শশাক হ
147.20
যত্নবানপি তু শ্রীমাঁল্লাঙ্গূলোদ্ধরণোদ্ধুতঃ
কপেঃ পার্শ্বগতো ভীমস্তস্থৌ ব্রীডাদধোমুখঃ
147.21
প্রণিপত্য চ কৌন্তেয়ঃ প্রাঞ্জলির্বাক্যমব্রবীৎ
প্রসীদ কপিশার্দূল দুরুক্তং ক্ষম্যতাং মম
147.22
সিদ্ধো বা যদি বা দেবো গন্ধর্বো বাথ গুহ্যকঃ
পৃষ্টঃ সন্কাময়া ব্রূহি কস্ত্বং বানররূপধৃক্
147.23
হনূমানুবাচ
যত্তে মম পরিজ্ঞানে কৌতূহলমরিংদম
তত্সর্বমখিলেন ত্বং শৃণু পাণ্ডবনন্দন
147.24
অহং কেসরিণঃ ক্ষেত্রে বায়ুনা জগদায়ুষা
জাতঃ কমলপত্রাক্ষ হনূমান্নাম বানরঃ
147.25
সূর্যপুত্রং চ সুগ্রীবং শক্রপুত্রং চ বালিনম্
সর্ববানররাজানৌ সর্ববানরয়ূথপাঃ
147.26
উপতস্থুর্মহাবীর্যা মম চামিত্রকর্শন
সুগ্রীবেণাভবত্প্রীতিরনিলস্যাগ্নিনা যথা
147.27
নিকৃতঃ স ততো ভ্রাত্রা কস্মিংশ্চিত্কারণান্তরে
ঋশ্যমূকে ময়া সার্ধং সুগ্রীবো ন্যবসচ্চিরম্
147.28
অথ দাশরথির্বীরো রামো নাম মহাবলঃ
বিষ্ণুর্মানুষরূপেণ চচার বসুধামিমাম্
147.29
স পিতুঃ প্রিয়মন্বিচ্ছন্সহভার্যঃ সহানুজঃ
সধনুর্ধন্বিনাং শ্রেষ্ঠো দণ্ডকারণ্যমাশ্রিতঃ
147.30
তস্য ভার্যা জনস্থানাদ্রাবণেন হৃতা বলাৎ
বঞ্চয়িত্বা মহাবুদ্ধিং মৃগরূপেণ রাঘবম্
147.31
হৃতদারঃ সহ ভ্রাত্রা পত্নীং মার্গন্স রাঘবঃ
দৃষ্টবাঞ্শৈলশিখরে সুগ্রীবং বানরর্ষভম্
147.32
তেন তস্যাভবত্সখ্যং রাঘবস্য মহাত্মনঃ
স হত্বা বালিনং রাজ্যে সুগ্রীবং প্রত্যপাদয়ৎ
স হরীন্প্রেষয়ামাস সীতায়াঃ পরিমার্গণে
147.33
ততো বানরকোটীভির্যাং বয়ং প্রস্থিতা দিশম্
তত্র প্রবৃত্তিঃ সীতায়া গৃধ্রেণ প্রতিপাদিতা
147.34
ততোঽহং কার্যসিদ্ধ্যর্থং রামস্যাক্লিষ্টকর্মণঃ
শতয়োজনবিস্তীর্ণমর্ণবং সহসাপ্লুতঃ
147.35
দৃষ্টা সা চ ময়া দেবী রাবণস্য নিবেশনে
প্রত্যাগতশ্চাপি পুনর্নাম তত্র প্রকাশ্য বৈ
147.36
ততো রামেণ বীরেণ হত্বা তান্সর্বরাক্ষসান্
পুনঃ প্রত্যাহৃতা ভার্যা নষ্টা বেদশ্রুতির্যথা
147.37
ততঃ প্রতিষ্ঠিতে রামে বীরোঽয়ং যাচিতো ময়া
যাবদ্রামকথা বীর ভবেল্লোকেষু শত্রুহন্
তাবজ্জীবেয়মিত্যেবং তথাস্ত্বিতি চ সোঽব্রবীৎ
147.38
দশ বর্ষসহস্রাণি দশ বর্ষশতানি চ
রাজ্যং কারিতবান্রামস্ততস্তু ত্রিদিবং গতঃ
147.39
তদিহাপ্সরসস্তাত গন্ধর্বাশ্চ সদানঘ
তস্য বীরস্য চরিতং গায়ন্ত্যো রময়ন্তি মাম্
147.40
অয়ং চ মার্গো মর্ত্যানামগম্যঃ কুরুনন্দন
ততোঽহং রুদ্ধবান্মার্গং তবেমং দেবসেবিতম্
ধর্ষয়েদ্বা শপেদ্বাপি মা কশ্চিদিতি ভারত
147.41
দিব্যো দেবপথো হ্যেষ নাত্র গচ্ছন্তি মানুষাঃ
যদর্থমাগতশ্চাসি তত্সরোঽভ্যর্ণ এব হি