Utshovঅধ্যায় 148
148.1
বৈশংপায়ন উবাচ
এবমুক্তো মহাবাহুর্ভীমসেনঃ প্রতাপবান্
প্রণিপত্য ততঃ প্রীত্যা ভ্রাতরং হৃষ্টমানসঃ
উবাচ শ্লক্ষ্ণয়া বাচা হনূমন্তং কপীশ্বরম্
148.2
ময়া ধন্যতরো নাস্তি যদার্যং দৃষ্টবানহম্
অনুগ্রহো মে সুমহাংস্তৃপ্তিশ্চ তব দর্শনাৎ
148.3
এবং তু কৃতমিচ্ছামি ত্বয়ার্যাদ্য প্রিয়ং মম
যত্তে তদাসীত্প্লবতঃ সাগরং মকরালয়ম্
রূপমপ্রতিমং বীর তদিচ্ছামি নিরীক্ষিতুম্
148.4
এবং তুষ্টো ভবিষ্যামি শ্রদ্ধাস্যামি চ তে বচঃ
এবমুক্তঃ স তেজস্বী প্রহস্য হরিরব্রবীৎ
148.5
ন তচ্ছক্যং ত্বয়া দ্রষ্টুং রূপং নান্যেন কেনচিৎ
কালাবস্থা তদা হ্যন্যা বর্ততে সা ন সাংপ্রতম্
148.6
অন্যঃ কৃতয়ুগে কালস্ত্রেতায়াং দ্বাপরেঽপরঃ
অয়ং প্রধ্বংসনঃ কালো নাদ্য তদ্রূপমস্তি মে
148.7
ভূমির্নদ্যো নগাঃ শৈলাঃ সিদ্ধা দেবা মহর্ষয়ঃ
কালং সমনুবর্তন্তে যথা ভাবা যুগে যুগে
বলবর্ষ্মপ্রভাবা হি প্রহীয়ন্ত্যুদ্ভবন্তি চ
148.8
তদলং তব তদ্রূপং দ্রষ্টুং কুরুকুলোদ্বহ
যুগং সমনুবর্তামি কালো হি দুরতিক্রমঃ
148.9
ভীম উবাচ
যুগসংখ্যাং সমাচক্ষ্ব আচারং চ যুগে যুগে
ধর্মকামার্থভাবাংশ্চ বর্ষ্ম বীর্যং ভবাভবৌ
148.10
হনূমানুবাচ
কৃতং নাম যুগং তাত যত্র ধর্মঃ সনাতনঃ
কৃতমেব ন কর্তব্যং তস্মিন্কালে যুগোত্তমে
148.11
ন তত্র ধর্মাঃ সীদন্তি ন ক্ষীয়ন্তে চ বৈ প্রজাঃ
ততঃ কৃতয়ুগং নাম কালেন গুণতাং গতম্
148.12
দেবদানবগন্ধর্বয়ক্ষরাক্ষসপন্নগাঃ
নাসন্কৃতয়ুগে তাত তদা ন ক্রয়বিক্রয়াঃ
148.13
ন সাময়জুঋগ্বর্ণাঃ ক্রিয়া নাসীচ্চ মানবী
অভিধ্যায় ফলং তত্র ধর্মঃ সংন্যাস এব চ
148.14
ন তস্মিন্যুগসংসর্গে ব্যাধয়ো নেন্দ্রিয়ক্ষয়ঃ
নাসূয়া নাপি রুদিতং ন দর্পো নাপি পৈশুনম্
148.15
ন বিগ্রহঃ কুতস্তন্দ্রী ন দ্বেষো নাপি বৈকৃতম্
ন ভয়ং ন চ সংতাপো ন চের্ষ্যা ন চ মত্সরঃ
148.16
ততঃ পরমকং ব্রহ্ম যা গতির্যোগিনাং পরা
আত্মা চ সর্বভূতানাং শুক্লো নারায়ণস্তদা
148.17
ব্রাহ্মণাঃ ক্ষত্রিয়া বৈশ্যাঃ শূদ্রাশ্চ কৃতলক্ষণাঃ
কৃতে যুগে সমভবন্স্বকর্মনিরতাঃ প্রজাঃ
148.18
সমাশ্রমং সমাচারং সমজ্ঞানমতীবলম্
তদা হি সমকর্মাণো বর্ণা ধর্মানবাপ্নুবন্
148.19
একবেদসমায়ুক্তা একমন্ত্রবিধিক্রিয়াঃ
পৃথগ্ধর্মাস্ত্বেকবেদা ধর্মমেকমনুব্রতাঃ
148.20
চাতুরাশ্রম্যয়ুক্তেন কর্মণা কালয়োগিনা
অকামফলসংয়োগাত্প্রাপ্নুবন্তি পরাং গতিম্
148.21
আত্ময়োগসমায়ুক্তো ধর্মোঽয়ং কৃতলক্ষণঃ
কৃতে যুগে চতুষ্পাদশ্চাতুর্বর্ণ্যস্য শাশ্বতঃ
148.22
এতত্কৃতয়ুগং নাম ত্রৈগুণ্যপরিবর্জিতম্
ত্রেতামপি নিবোধ ত্বং যস্মিন্সত্রং প্রবর্ততে
148.23
পাদেন হ্রসতে ধর্মো রক্ততাং যাতি চাচ্যুতঃ
সত্যপ্রবৃত্তাশ্চ নরাঃ ক্রিয়াধর্মপরায়ণাঃ
148.24
ততো যজ্ঞাঃ প্রবর্তন্তে ধর্মাশ্চ বিবিধাঃ ক্রিয়াঃ
ত্রেতায়াং ভাবসংকল্পাঃ ক্রিয়াদানফলোদয়াঃ
148.25
প্রচলন্তি ন বৈ ধর্মাত্তপোদানপরায়ণাঃ
স্বধর্মস্থাঃ ক্রিয়াবন্তো জনাস্ত্রেতায়ুগেঽভবন্
148.26
দ্বাপরেঽপি যুগে ধর্মো দ্বিভাগোনঃ প্রবর্ততে
বিষ্ণুর্বৈ পীততাং যাতি চতুর্ধা বেদ এব চ
148.27
ততোঽন্যে চ চতুর্বেদাস্ত্রিবেদাশ্চ তথাপরে
দ্বিবেদাশ্চৈকবেদাশ্চাপ্যনৃচশ্চ তথাপরে
148.28
এবং শাস্ত্রেষু ভিন্নেষু বহুধা নীয়তে ক্রিয়া
তপোদানপ্রবৃত্তা চ রাজসী ভবতি প্রজা
148.29
একবেদস্য চাজ্ঞানাদ্বেদাস্তে বহবঃ কৃতাঃ
সত্যস্য চেহ বিভ্রংশাত্সত্যে কশ্চিদবস্থিতঃ
148.30
সত্যাত্প্রচ্যবমানানাং ব্যাধয়ো বহবোঽভবন্
কামাশ্চোপদ্রবাশ্চৈব তদা দৈবতকারিতাঃ
148.31
যৈরর্দ্যমানাঃ সুভৃশং তপস্তপ্যন্তি মানবাঃ
কামকামাঃ স্বর্গকামা যজ্ঞাংস্তন্বন্তি চাপরে
148.32
এবং দ্বাপরমাসাদ্য প্রজাঃ ক্ষীয়ন্ত্যধর্মতঃ
পাদেনৈকেন কৌন্তেয় ধর্মঃ কলিয়ুগে স্থিতঃ
148.33
তামসং যুগমাসাদ্য কৃষ্ণো ভবতি কেশবঃ
বেদাচারাঃ প্রশাম্যন্তি ধর্ময়জ্ঞক্রিয়াস্তথা
148.34
ঈতয়ো ব্যাধয়স্তন্দ্রী দোষাঃ ক্রোধাদয়স্তথা
উপদ্রবাশ্চ বর্তন্তে আধয়ো ব্যাধয়স্তথা
148.35
যুগেষ্বাবর্তমানেষু ধর্মো ব্যাবর্ততে পুনঃ
ধর্মে ব্যাবর্তমানে তু লোকো ব্যাবর্ততে পুনঃ
148.36
লোকে ক্ষীণে ক্ষয়ং যান্তি ভাবা লোকপ্রবর্তকাঃ
যুগক্ষয়কৃতা ধর্মাঃ প্রার্থনানি বিকুর্বতে
148.37
এতত্কলিয়ুগং নাম অচিরাদ্যত্প্রবর্ততে
যুগানুবর্তনং ত্বেতত্কুর্বন্তি চিরজীবিনঃ
148.38
যচ্চ তে মত্পরিজ্ঞানে কৌতূহলমরিংদম
অনর্থকেষু কো ভাবঃ পুরুষস্য বিজানতঃ
148.39
এতত্তে সর্বমাখ্যাতং যন্মাং ত্বং পরিপৃচ্ছসি
যুগসংখ্যাং মহাবাহো স্বস্তি প্রাপ্নুহি গম্যতাম্