Utshovঅধ্যায় 149
149.1
ভীম উবাচ
পূর্বরূপমদৃষ্ট্বা তে ন যাস্যামি কথংচন
যদি তেঽহমনুগ্রাহ্যো দর্শয়াত্মানমাত্মনা
149.2
বৈশংপায়ন উবাচ
এবমুক্তস্তু ভীমেন স্মিতং কৃত্বা প্লবংগমঃ
তদ্রূপং দর্শয়ামাস যদ্বৈ সাগরলঙ্ঘনে
149.3
ভ্রাতুঃ প্রিয়মভীপ্সন্বৈ চকার সুমহদ্বপুঃ
দেহস্তস্য ততোঽতীব বর্ধত্যায়ামবিস্তরৈঃ
149.4
তদ্রূপং কদলীষণ্ডং ছাদয়ন্নমিতদ্যুতিঃ
গিরেশ্চোচ্ছ্রয়মাগম্য তস্থৌ তত্র স বানরঃ
149.5
সমুচ্ছ্রিতমহাকায়ো দ্বিতীয় ইব পর্বতঃ
তাম্রেক্ষণস্তীক্ষ্ণদংষ্ট্রো ভৃকুটীকৃতলোচনঃ
দীর্ঘলাঙ্গূলমাবিধ্য দিশো ব্যাপ্য স্থিতঃ কপিঃ
149.6
তদ্রূপং মহদালক্ষ্য ভ্রাতুঃ কৌরবনন্দনঃ
বিসিস্মিয়ে তদা ভীমো জহৃষে চ পুনঃ পুনঃ
149.7
তমর্কমিব তেজোভিঃ সৌবর্ণমিব পর্বতম্
প্রদীপ্তমিব চাকাশং দৃষ্ট্বা ভীমো ন্যমীলয়ৎ
149.8
আবভাষে চ হনুমান্ভীমসেনং স্ময়ন্নিব
এতাবদিহ শক্তস্ত্বং রূপং দ্রষ্টুং মমানঘ
149.9
বর্ধেঽহং চাপ্যতো ভূয়ো যাবন্মে মনসেপ্সিতম্
ভীম শত্রুষু চাত্যর্থং বর্ধতে মূর্তিরোজসা
149.10
তদদ্ভুতং মহারৌদ্রং বিন্ধ্যমন্দরসংনিভম্
দৃষ্ট্বা হনূমতো বর্ষ্ম সংভ্রান্তঃ পবনাত্মজঃ
149.11
প্রত্যুবাচ ততো ভীমঃ সংপ্রহৃষ্টতনূরুহঃ
কৃতাঞ্জলিরদীনাত্মা হনূমন্তমবস্থিতম্
149.12
দৃষ্টং প্রমাণং বিপুলং শরীরস্যাস্য তে বিভো
সংহরস্ব মহাবীর্য স্বয়মাত্মানমাত্মনা
149.13
ন হি শক্নোমি ত্বাং দ্রষ্টুং দিবাকরমিবোদিতম্
অপ্রমেয়মনাধৃষ্যং মৈনাকমিব পর্বতম্
149.14
বিস্ময়শ্চৈব মে বীর সুমহান্মনসোঽদ্য বৈ
যদ্রামস্ত্বয়ি পার্শ্বস্থে স্বয়ং রাবণমভ্যগাৎ
149.15
ত্বমেব শক্তস্তাং লঙ্কাং সয়োধাং সহবাহনাম্
স্ববাহুবলমাশ্রিত্য বিনাশয়িতুমোজসা
149.16
ন হি তে কিংচিদপ্রাপ্যং মারুতাত্মজ বিদ্যতে
তব নৈকস্য পর্যাপ্তো রাবণঃ সগণো যুধি
149.17
এবমুক্তস্তু ভীমেন হনূমান্প্লবগর্ষভঃ
প্রত্যুবাচ ততো বাক্যং স্নিগ্ধগম্ভীরয়া গিরা
149.18
এবমেতন্মহাবাহো যথা বদসি ভারত
ভীমসেন ন পর্যাপ্তো মমাসৌ রাক্ষসাধমঃ
149.19
ময়া তু তস্মিন্নিহতে রাবণে লোককণ্টকে
কীর্তির্নশ্যেদ্রাঘবস্য তত এতদুপেক্ষিতম্
149.20
তেন বীরেণ হত্বা তু সগণং রাক্ষসাধিপম্
আনীতা স্বপুরং সীতা লোকে কীর্তিশ্চ স্থাপিতা
149.21
তদ্গচ্ছ বিপুলপ্রজ্ঞ ভ্রাতুঃ প্রিয়হিতে রতঃ
অরিষ্টং ক্ষেমমধ্বানং বায়ুনা পরিরক্ষিতঃ
149.22
এষ পন্থাঃ কুরুশ্রেষ্ঠ সৌগন্ধিকবনায় তে
দ্রক্ষ্যসে ধনদোদ্যানং রক্ষিতং যক্ষরাক্ষসৈঃ
149.23
ন চ তে তরসা কার্যঃ কুসুমাবচয়ঃ স্বয়ম্
দৈবতানি হি মান্যানি পুরুষেণ বিশেষতঃ
149.24
বলিহোমনমস্কারৈর্মন্ত্রৈশ্চ ভরতর্ষভ
দৈবতানি প্রসাদং হি ভক্ত্যা কুর্বন্তি ভারত
149.25
মা তাত সাহসং কার্ষীঃ স্বধর্মমনুপালয়
স্বধর্মস্থঃ পরং ধর্মং বুধ্যস্বাগময়স্ব চ
149.26
ন হি ধর্মমবিজ্ঞায় বৃদ্ধাননুপসেব্য চ
ধর্মো বৈ বেদিতুং শক্যো বৃহস্পতিসমৈরপি
149.27
অধর্মো যত্র ধর্মাখ্যো ধর্মশ্চাধর্মসংজ্ঞিতঃ
বিজ্ঞাতব্যো বিভাগেন যত্র মুহ্যন্ত্যবুদ্ধয়ঃ
149.28
আচারসংভবো ধর্মো ধর্মাদ্বেদাঃ সমুত্থিতাঃ
বেদৈর্যজ্ঞাঃ সমুত্পন্না যজ্ঞৈর্দেবাঃ প্রতিষ্ঠিতাঃ
149.29
বেদাচারবিধানোক্তৈর্যজ্ঞৈর্ধার্যন্তি দেবতাঃ
বৃহস্পত্যুশনোক্তৈশ্চ নয়ৈর্ধার্যন্তি মানবাঃ
149.30
পণ্যাকরবণিজ্যাভিঃ কৃষ্যাথো যোনিপোষণৈঃ
বার্তয়া ধার্যতে সর্বং ধর্মৈরেতৈর্দ্বিজাতিভিঃ
149.31
ত্রয়ী বার্তা দণ্ডনীতিস্তিস্রো বিদ্যা বিজানতাম্
তাভিঃ সম্যক্প্রয়ুক্তাভির্লোকয়াত্রা বিধীয়তে
149.32
সা চেদ্ধর্মক্রিয়া ন স্যাত্ত্রয়ীধর্মমৃতে ভুবি
দণ্ডনীতিমৃতে চাপি নির্মর্যাদমিদং ভবেৎ
149.33
বার্তাধর্মে হ্যবর্তন্ত্যো বিনশ্যেয়ুরিমাঃ প্রজাঃ
সুপ্রবৃত্তৈস্ত্রিভির্হ্যেতৈর্ধর্মৈঃ সূয়ন্তি বৈ প্রজাঃ
149.34
দ্বিজানামমৃতং ধর্মো হ্যেকশ্চৈবৈকবর্ণিকঃ
যজ্ঞাধ্যয়নদানানি ত্রয়ঃ সাধারণাঃ স্মৃতাঃ
149.35
যাজনাধ্যাপনে চোভে ব্রাহ্মণানাং প্রতিগ্রহঃ
পালনং ক্ষত্রিয়াণাং বৈ বৈশ্যধর্মশ্চ পোষণম্
149.36
শুশ্রূষা তু দ্বিজাতীনাং শূদ্রাণাং ধর্ম উচ্যতে
ভৈক্ষহোমব্রতৈর্হীনাস্তথৈব গুরুবাসিনাম্
149.37
ক্ষত্রধর্মোঽত্র কৌন্তেয় তব ধর্মাভিরক্ষণম্
স্বধর্মং প্রতিপদ্যস্ব বিনীতো নিয়তেন্দ্রিয়ঃ
149.38
বৃদ্ধৈঃ সংমন্ত্র্য সদ্ভিশ্চ বুদ্ধিমদ্ভিঃ শ্রুতান্বিতৈঃ
সুস্থিতঃ শাস্তি দণ্ডেন ব্যসনী পরিভূয়তে
149.39
নিগ্রহানুগ্রহৈঃ সম্যগ্যদা রাজা প্রবর্ততে
তদা ভবতি লোকস্য মর্যাদা সুব্যবস্থিতা
149.40
তস্মাদ্দেশে চ দুর্গে চ শত্রুমিত্রবলেষু চ
নিত্যং চারেণ বোদ্ধব্যং স্থানং বৃদ্ধিঃ ক্ষয়স্তথা
149.41
রাজ্ঞামুপায়াশ্চত্বারো বুদ্ধিমন্ত্রঃ পরাক্রমঃ
নিগ্রহানুগ্রহৌ চৈব দাক্ষ্যং তত্কার্যসাধনম্
149.42
সাম্না দানেন ভেদেন দণ্ডেনোপেক্ষণেন চ
সাধনীয়ানি কার্যাণি সমাসব্যাসয়োগতঃ
149.43
মন্ত্রমূলা নয়াঃ সর্বে চারাশ্চ ভরতর্ষভ
সুমন্ত্রিতৈর্নয়ৈঃ সিদ্ধিস্তদ্বিদৈঃ সহ মন্ত্রয়েৎ
149.44
স্ত্রিয়া মূঢেন লুব্ধেন বালেন লঘুনা তথা
ন মন্ত্রয়েত গুহ্যানি যেষু চোন্মাদলক্ষণম্
149.45
মন্ত্রয়েত্সহ বিদ্বদ্ভিঃ শক্তৈঃ কর্মাণি কারয়েৎ
স্নিগ্ধৈশ্চ নীতিবিন্যাসান্মূর্খান্সর্বত্র বর্জয়েৎ
149.46
ধার্মিকান্ধর্মকার্যেষু অর্থকার্যেষু পণ্ডিতান্
স্ত্রীষু ক্লীবান্নিয়ুঞ্জীত ক্রূরান্ক্রূরেষু কর্মসু
149.47
স্বেভ্যশ্চৈব পরেভ্যশ্চ কার্যাকার্যসমুদ্ভবা
বুদ্ধিঃ কর্মসু বিজ্ঞেয়া রিপূণাং চ বলাবলম্
149.48
বুদ্ধ্যা সুপ্রতিপন্নেষু কুর্যাত্সাধুপরিগ্রহম্
নিগ্রহং চাপ্যশিষ্টেষু নির্মর্যাদেষু কারয়েৎ
149.49
নিগ্রহে প্রগ্রহে সম্যগ্যদা রাজা প্রবর্ততে
তদা ভবতি লোকস্য মর্যাদা সুব্যবস্থিতা
149.50
এষ তে বিহিতঃ পার্থ ঘোরো ধর্মো দুরন্বয়ঃ
তং স্বধর্মবিভাগেন বিনয়স্থোঽনুপালয়
149.51
তপোধর্মদমেজ্যাভির্বিপ্রা যান্তি যথা দিবম্
দানাতিথ্যক্রিয়াধর্মৈর্যান্তি বৈশ্যাশ্চ সদ্গতিম্
149.52
ক্ষত্রং যাতি তথা স্বর্গং ভুবি নিগ্রহপালনৈঃ
সম্যক্প্রণীয় দণ্ডং হি কামদ্বেষবিবর্জিতাঃ
অলুব্ধা বিগতক্রোধাঃ সতাং যান্তি সলোকতাম্