Utshovঅধ্যায় 150
150.1
বৈশংপায়ন উবাচ
ততঃ সংহৃত্য বিপুলং তদ্বপুঃ কামবর্ধিতম্
ভীমসেনং পুনর্দোর্ভ্যাং পর্যষ্বজত বানরঃ
150.2
পরিষ্বক্তস্য তস্যাশু ভ্রাত্রা ভীমস্য ভারত
শ্রমো নাশমুপাগচ্ছত্সর্বং চাসীত্প্রদক্ষিণম্
150.3
ততঃ পুনরথোবাচ পর্যশ্রুনয়নো হরিঃ
ভীমমাভাষ্য সৌহার্দাদ্বাষ্পগদ্গদয়া গিরা
150.4
গচ্ছ বীর স্বমাবাসং স্মর্তব্যোঽস্মি কথান্তরে
ইহস্থশ্চ কুরুশ্রেষ্ঠ ন নিবেদ্যোঽস্মি কস্যচিৎ
150.5
ধনদস্যালয়াচ্চাপি বিসৃষ্টানাং মহাবল
দেশকাল ইহায়াতুং দেবগন্ধর্বয়োষিতাম্
150.6
মমাপি সফলং চক্ষুঃ স্মারিতশ্চাস্মি রাঘবম্
মানুষং গাত্রসংস্পর্শং গত্বা ভীম ত্বয়া সহ
150.7
তদস্মদ্দর্শনং বীর কৌন্তেয়ামোঘমস্তু তে
ভ্রাতৃত্বং ত্বং পুরস্কৃত্য বরং বরয় ভারত
150.8
যদি তাবন্ময়া ক্ষুদ্রা গত্বা বারণসাহ্বয়ম্
ধার্তরাষ্ট্রা নিহন্তব্যা যাবদেতত্করোম্যহম্
150.9
শিলয়া নগরং বা তন্মর্দিতব্যং ময়া যদি
যাবদদ্য করোম্যেতত্কামং তব মহাবল
150.10
ভীমসেনস্তু তদ্বাক্যং শ্রুত্বা তস্য মহাত্মনঃ
প্রত্যুবাচ হনূমন্তং প্রহৃষ্টেনান্তরাত্মনা
150.11
কৃতমেব ত্বয়া সর্বং মম বানরপুংগব
স্বস্তি তেঽস্তু মহাবাহো ক্ষাময়ে ত্বাং প্রসীদ মে
150.12
সনাথাঃ পাণ্ডবাঃ সর্বে ত্বয়া নাথেন বীর্যবন্
তবৈব তেজসা সর্বান্বিজেষ্যামো বয়ং রিপূন্
150.13
এবমুক্তস্তু হনুমান্ভীমসেনমভাষত
ভ্রাতৃত্বাত্সৌহৃদাচ্চাপি করিষ্যামি তব প্রিয়ম্
150.14
চমূং বিগাহ্য শত্রূণাং শরশক্তিসমাকুলাম্
যদা সিংহরবং বীর করিষ্যসি মহাবল
তদাহং বৃংহয়িষ্যামি স্বরবেণ রবং তব
150.15
বিজয়স্য ধ্বজস্থশ্চ নাদান্মোক্ষ্যামি দারুণান্
শত্রূণাং তে প্রাণহরানিত্যুক্ত্বান্তরধীয়ত
150.16
গতে তস্মিন্হরিবরে ভীমোঽপি বলিনাং বরঃ
তেন মার্গেণ বিপুলং ব্যচরদ্গন্ধমাদনম্
150.17
অনুস্মরন্বপুস্তস্য শ্রিয়ং চাপ্রতিমাং ভুবি
মাহাত্ম্যমনুভাবং চ স্মরন্দাশরথের্যয়ৌ
150.18
স তানি রমণীয়ানি বনান্যুপবনানি চ
বিলোডয়ামাস তদা সৌগন্ধিকবনেপ্সয়া
150.19
ফুল্লপদ্মবিচিত্রাণি পুষ্পিতানি বনানি চ
মত্তবারণয়ূথানি পঙ্কক্লিন্নানি ভারত
বর্ষতামিব মেঘানাং বৃন্দানি দদৃশে তদা
150.20
হরিণৈশ্চঞ্চলাপাঙ্গৈর্হরিণীসহিতৈর্বনে
সশষ্পকবলৈঃ শ্রীমান্পথি দৃষ্টো দ্রুতং যয়ৌ
150.21
মহিষৈশ্চ বরাহৈশ্চ শার্দূলৈশ্চ নিষেবিতম্
ব্যপেতভীর্গিরিং শৌর্যাদ্ভীমসেনো ব্যগাহত
150.22
কুসুমানতশাখৈশ্চ তাম্রপল্লবকোমলৈঃ
যাচ্যমান ইবারণ্যে দ্রুমৈর্মারুতকম্পিতৈঃ
150.23
কৃতপদ্মাঞ্জলিপুটা মত্তষট্পদসেবিতাঃ
প্রিয়তীর্থবনা মার্গে পদ্মিনীঃ সমতিক্রমন্
150.24
সজ্জমানমনোদৃষ্টিঃ ফুল্লেষু গিরিসানুষু
দ্রৌপদীবাক্যপাথেয়ো ভীমঃ শীঘ্রতরং যয়ৌ
150.25
পরিবৃত্তেঽহনি ততঃ প্রকীর্ণহরিণে বনে
কাঞ্চনৈর্বিমলৈঃ পদ্মৈর্দদর্শ বিপুলাং নদীম্
150.26
মত্তকারণ্ডবয়ুতাং চক্রবাকোপশোভিতাম্
রচিতামিব তস্যাদ্রের্মালাং বিমলপঙ্কজাম্
150.27
তস্যাং নদ্যাং মহাসত্ত্বঃ সৌগন্ধিকবনং মহৎ
অপশ্যত্প্রীতিজননং বালার্কসদৃশদ্যুতি
150.28
তদ্দৃষ্ট্বা লব্ধকামঃ স মনসা পাণ্ডুনন্দনঃ
বনবাসপরিক্লিষ্টাং জগাম মনসা প্রিয়াম্