অধ্যায় 151

151.1

বৈশংপায়ন উবাচ
স গত্বা নলিনীং রম্যাং রাক্ষসৈরভিরক্ষিতাম্
কৈলাসশিখরে রম্যে দদর্শ শুভকাননে

কুবেরভবনাভ্যাশে জাতাং পর্বতনির্ঝরে
সুরম্যাং বিপুলচ্ছায়াং নানাদ্রুমলতাবৃতাম্

হরিতাম্বুজসংছন্নাং দিব্যাং কনকপুষ্করাম্
পবিত্রভূতাং লোকস্য শুভামদ্ভুতদর্শনাম্

তত্রামৃতরসং শীতং লঘু কুন্তীসুতঃ শুভম্
দদর্শ বিমলং তোয়ং শিবং বহু চ পাণ্ডবঃ

তাং তু পুষ্করিণীং রম্যাং পদ্মসৌগন্ধিকায়ুতাম্
জাতরূপময়ৈঃ পদ্মৈশ্ছন্নাং পরমগন্ধিভিঃ

বৈডূর্যবরনালৈশ্চ বহুচিত্রৈর্মনোহরৈঃ
হংসকারণ্ডবোদ্ধূতৈঃ সৃজদ্ভিরমলং রজঃ

আক্রীডং যক্ষরাজস্য কুবেরস্য মহাত্মনঃ
গন্ধর্বৈরপ্সরোভিশ্চ দেবৈশ্চ পরমার্চিতাম্

সেবিতামৃষিভির্দিব্যাং যক্ষৈঃ কিংপুরুষৈস্তথা
রাক্ষসৈঃ কিংনরৈশ্চৈব গুপ্তাং বৈশ্রবণেন চ

তাং চ দৃষ্ট্বৈব কৌন্তেয়ো ভীমসেনো মহাবলঃ
বভূব পরমপ্রীতো দিব্যং সংপ্রেক্ষ্য তত্সরঃ

তচ্চ ক্রোধবশা নাম রাক্ষসা রাজশাসনাৎ
রক্ষন্তি শতসাহস্রাশ্চিত্রায়ুধপরিচ্ছদাঃ

তে তু দৃষ্ট্বৈব কৌন্তেয়মজিনৈঃ পরিবারিতম্
রুক্মাঙ্গদধরং বীরং ভীমং ভীমপরাক্রমম্

সায়ুধং বদ্ধনিস্ত্রিংশমশঙ্কিতমরিংদমম্
পুষ্করেপ্সুমুপায়ান্তমন্যোন্যমভিচুক্রুশুঃ

অয়ং পুরুষশার্দূলঃ সায়ুধোঽজিনসংবৃতঃ
যচ্চিকীর্ষুরিহ প্রাপ্তস্তত্সংপ্রষ্টুমিহার্হথ

ততঃ সর্বে মহাবাহুং সমাসাদ্য বৃকোদরম্
তেজোয়ুক্তমপৃচ্ছন্ত কস্ত্বমাখ্যাতুমর্হসি

মুনিবেষধরশ্চাসি চীরবাসাশ্চ লক্ষ্যসে
যদর্থমসি সংপ্রাপ্তস্তদাচক্ষ্ব মহাদ্যুতে