Utshovঅধ্যায় 152
152.1
ভীম উবাচ
পাণ্ডবো ভীমসেনোঽহং ধর্মপুত্রাদনন্তরঃ
বিশালাং বদরীং প্রাপ্তো ভ্রাতৃভিঃ সহ রাক্ষসাঃ
152.2
অপশ্যত্তত্র পাঞ্চালী সৌগন্ধিকমনুত্তমম্
অনিলোঢমিতো নূনং সা বহূনি পরীপ্সতি
152.3
তস্যা মামনবদ্যাঙ্গ্যা ধর্মপত্ন্যাঃ প্রিয়ে স্থিতম্
পুষ্পাহারমিহ প্রাপ্তং নিবোধত নিশাচরাঃ
152.4
রাক্ষসা ঊচুঃ
আক্রীডোঽয়ং কুবেরস্য দয়িতঃ পুরুষর্ষভ
নেহ শক্যং মনুষ্যেণ বিহর্তুং মর্ত্যধর্মিণা
152.5
দেবর্ষয়স্তথা যক্ষা দেবাশ্চাত্র বৃকোদর
আমন্ত্র্য যক্ষপ্রবরং পিবন্তি বিহরন্তি চ
গন্ধর্বাপ্সরসশ্চৈব বিহরন্ত্যত্র পাণ্ডব
152.6
অন্যায়েনেহ যঃ কশ্চিদবমন্য ধনেশ্বরম্
বিহর্তুমিচ্ছেদ্দুর্বৃত্তঃ স বিনশ্যেদসংশয়ম্
152.7
তমনাদৃত্য পদ্মানি জিহীর্ষসি বলাদিতঃ
ধর্মরাজস্য চাত্মানং ব্রবীষি ভ্রাতরং কথম্
152.8
ভীম উবাচ
রাক্ষসাস্তং ন পশ্যামি ধনেশ্বরমিহান্তিকে
দৃষ্ট্বাপি চ মহারাজং নাহং যাচিতুমুত্সহে
152.9
ন হি যাচন্তি রাজান এষ ধর্মঃ সনাতনঃ
ন চাহং হাতুমিচ্ছামি ক্ষাত্রধর্মং কথংচন
152.10
ইয়ং চ নলিনী রম্যা জাতা পর্বতনির্ঝরে
নেয়ং ভবনমাসাদ্য কুবেরস্য মহাত্মনঃ
152.11
তুল্যা হি সর্বভূতানামিয়ং বৈশ্রবণস্য চ
এবংগতেষু দ্রব্যেষু কঃ কং যাচিতুমর্হতি
152.12
বৈশংপায়ন উবাচ
ইত্যুক্ত্বা রাক্ষসান্সর্বান্ভীমসেনো ব্যগাহত
ততঃ স রাক্ষসৈর্বাচা প্রতিষিদ্ধঃ প্রতাপবান্
মা মৈবমিতি সক্রোধৈর্ভর্ত্সয়দ্ভিঃ সমন্ততঃ
152.13
কদর্থীকৃত্য তু স তান্রাক্ষসান্ভীমবিক্রমঃ
ব্যগাহত মহাতেজাস্তে তং সর্বে ন্যবারয়ন্
152.14
গৃহ্ণীত বধ্নীত নিকৃন্ততেমং; পচাম খাদাম চ ভীমসেনম্
ক্রুদ্ধা ব্রুবন্তোঽনুয়য়ুর্দ্রুতং তে; শস্ত্রাণি চোদ্যম্য বিবৃত্তনেত্রাঃ
152.15
ততঃ স গুর্বীং যমদণ্ডকল্পাং; মহাগদাং কাঞ্চনপট্টনদ্ধাম্
প্রগৃহ্য তানভ্যপতত্তরস্বী; ততোঽব্রবীত্তিষ্ঠত তিষ্ঠতেতি
152.16
তে তং তদা তোমরপট্টিশাদ্যৈ;র্ব্যাবিধ্য শস্ত্রৈঃ সহসাভিপেতুঃ
জিঘাংসবঃ ক্রোধবশাঃ সুভীমা; ভীমং সমন্তাত্পরিবব্রুরুগ্রাঃ
152.17
বাতেন কুন্ত্যাং বলবান্স জাতঃ; শূরস্তরস্বী দ্বিষতাং নিহন্তা
সত্যে চ ধর্মে চ রতঃ সদৈব; পরাক্রমে শত্রুভিরপ্রধৃষ্যঃ
152.18
তেষাং স মার্গান্বিবিধান্মহাত্মা; নিহত্য শস্ত্রাণি চ শাত্রবাণাম্
যথাপ্রবীরান্নিজঘান বীরঃ; পরঃশতান্পুষ্করিণীসমীপে
152.19
তে তস্য বীর্যং চ বলং চ দৃষ্ট্বা; বিদ্যাবলং বাহুবলং তথৈব
অশক্নুবন্তঃ সহিতাঃ সমন্তা;দ্ধতপ্রবীরাঃ সহসা নিবৃত্তাঃ
152.20
বিদীর্যমাণাস্তত এব তূর্ণ;মাকাশমাস্থায় বিমূঢসংজ্ঞাঃ
কৈলাসশৃঙ্গাণ্যভিদুদ্রুবুস্তে; ভীমার্দিতাঃ ক্রোধবশাঃ প্রভগ্নাঃ
152.21
স শক্রবদ্দানবদৈত্যসংঘা;ন্বিক্রম্য জিত্বা চ রণেঽরিসংঘান্
বিগাহ্য তাং পুষ্করিণীং জিতারিঃ; কামায় জগ্রাহ ততোঽম্বুজানি
152.22
ততঃ স পীত্বামৃতকল্পমম্ভো; ভূয়ো বভূবোত্তমবীর্যতেজাঃ
উত্পাট্য জগ্রাহ ততোঽম্বুজানি; সৌগন্ধিকান্যুত্তমগন্ধবন্তি
152.23
ততস্তু তে ক্রোধবশাঃ সমেত্য; ধনেশ্বরং ভীমবলপ্রণুন্নাঃ
ভীমস্য বীর্যং চ বলং চ সংখ্যে; যথাবদাচখ্যুরতীব দীনাঃ
152.24
তেষাং বচস্তত্তু নিশম্য দেবঃ; প্রহস্য রক্ষাংশি ততোঽভ্যুবাচ
গৃহ্ণাতু ভীমো জলজানি কামং; কৃষ্ণানিমিত্তং বিদিতং মমৈতৎ
152.25
ততোঽভ্যনুজ্ঞায় ধনেশ্বরং তে; জগ্মুঃ কুরূণাং প্রবরং বিরোষাঃ
ভীমং চ তস্যাং দদৃশুর্নলিন্যাং; যথোপজোষং বিহরন্তমেকম্