Utshovঅধ্যায় 153
153.1
বৈশংপায়ন উবাচ
ততস্তানি মহার্হাণি দিব্যানি ভরতর্ষভ
বহূনি বহুরূপাণি বিরজাংসি সমাদদে
153.2
ততো বায়ুর্মহাঞ্শীঘ্রো নীচৈঃ শর্করকর্ষণঃ
প্রাদুরাসীত্খরস্পর্শঃ সংগ্রামমভিচোদয়ন্
153.3
পপাত মহতী চোল্কা সনির্ঘাতা মহাপ্রভা
নিষ্প্রভশ্চাভবত্সূর্যশ্ছন্নরশ্মিস্তমোবৃতঃ
153.4
নির্ঘাতশ্চাভবদ্ভীমো ভীমে বিক্রমমাস্থিতে
চচাল পৃথিবী চাপি পাংসুবর্ষং পপাত চ
153.5
সলোহিতা দিশশ্চাসন্খরবাচো মৃগদ্বিজাঃ
তমোবৃতমভূত্সর্বং ন প্রজ্ঞায়ত কিংচন
153.6
তদদ্ভুতমভিপ্রেক্ষ্য ধর্মপুত্রো যুধিষ্ঠিরঃ
উবাচ বদতাং শ্রেষ্ঠঃ কোঽস্মানভিভবিষ্যতি
153.7
সজ্জীভবত ভদ্রং বঃ পাণ্ডবা যুদ্ধদুর্মদাঃ
যথারূপাণি পশ্যামি স্বভ্যগ্রো নঃ পরাক্রমঃ
153.8
এবমুক্ত্বা ততো রাজা বীক্ষাং চক্রে সমন্ততঃ
অপশ্যমানো ভীমং চ ধর্মরাজো যুধিষ্ঠিরঃ
153.9
তত্র কৃষ্ণাং যমৌ চৈব সমীপস্থানরিংদমঃ
পপ্রচ্ছ ভ্রাতরং ভীমং ভীমকর্মাণমাহবে
153.10
কচ্চিন্ন ভীমঃ পাঞ্চালি কিংচিত্কৃত্যং চিকীর্ষতি
কৃতবানপি বা বীরঃ সাহসং সাহসপ্রিয়ঃ
153.11
ইমে হ্যকস্মাদুত্পাতা মহাসমরদর্শিনঃ
দর্শয়ন্তো ভয়ং তীব্রং প্রাদুর্ভূতাঃ সমন্ততঃ
153.12
তং তথা বাদিনং কৃষ্ণা প্রত্যুবাচ মনস্বিনী
প্রিয়া প্রিয়ং চিকীর্ষন্তী মহিষী চারুহাসিনী
153.13
যত্তত্সৌগন্ধিকং রাজন্নাহৃতং মাতরিশ্বনা
তন্ময়া ভীমসেনস্য প্রীতয়াদ্যোপপাদিতম্
153.14
অপি চোক্তো ময়া বীরো যদি পশ্যেদ্বহূন্যপি
তানি সর্বাণ্যুপাদায় শীঘ্রমাগম্যতামিতি
153.15
স তু নূনং মহাবাহুঃ প্রিয়ার্থং মম পাণ্ডবঃ
প্রাগুদীচীং দিশং রাজংস্তান্যাহর্তুমিতো গতঃ
153.16
উক্তস্ত্বেবং তয়া রাজা যমাবিদমথাব্রবীৎ
গচ্ছাম সহিতাস্তূর্ণং যেন যাতো বৃকোদরঃ
153.17
বহন্তু রাক্ষসা বিপ্রান্যথাশ্রান্তান্যথাকৃশান্
ত্বমপ্যমরসংকাশ বহ কৃষ্ণাং ঘটোত্কচ
153.18
ব্যক্তং দূরমিতো ভীমঃ প্রবিষ্ট ইতি মে মতিঃ
চিরং চ তস্য কালোঽয়ং স চ বায়ুসমো জবে
153.19
তরস্বী বৈনতেয়স্য সদৃশো ভুবি লঙ্ঘনে
উত্পতেদপি চাকাশং নিপতেচ্চ যথেচ্ছকম্
153.20
তমন্বিয়াম ভবতাং প্রভাবাদ্রজনীচরাঃ
পুরা স নাপরাধ্নোতি সিদ্ধানাং ব্রহ্মবাদিনাম্
153.21
তথেত্যুক্ত্বা তু তে সর্বে হৈডিম্বপ্রমুখাস্তদা
উদ্দেশজ্ঞাঃ কুবেরস্য নলিন্যা ভরতর্ষভ
153.22
আদায় পাণ্ডবাংশ্চৈব তাংশ্চ বিপ্রাননেকশঃ
লোমশেনৈব সহিতাঃ প্রয়য়ুঃ প্রীতমানসাঃ
153.23
তে গত্বা সহিতাঃ সর্বে দদৃশুস্তত্র কাননে
প্রফুল্লপঙ্কজবতীং নলিনীং সুমনোহরাম্
153.24
তং চ ভীমং মহাত্মানং তস্যাস্তীরে ব্যবস্থিতম্
দদৃশুর্নিহতাংশ্চৈব যক্ষান্সুবিপুলেক্ষণান্
153.25
উদ্যম্য চ গদাং দোর্ভ্যাং নদীতীরে ব্যবস্থিতম্
প্রজাসংক্ষেপসময়ে দণ্ডহস্তমিবান্তকম্
153.26
তং দৃষ্ট্বা ধর্মরাজস্তু পরিষ্বজ্য পুনঃ পুনঃ
উবাচ শ্লক্ষ্ণয়া বাচা কৌন্তেয় কিমিদং কৃতম্
153.27
সাহসং বত ভদ্রং তে দেবানামপি চাপ্রিয়ম্
পুনরেবং ন কর্তব্যং মম চেদিচ্ছসি প্রিয়ম্
153.28
অনুশাস্য চ কৌন্তেয়ং পদ্মানি প্রতিগৃহ্য চ
তস্যামেব নলিন্যাং তে বিজহ্রুরমরোপমাঃ
153.29
এতস্মিন্নেব কালে তু প্রগৃহীতশিলায়ুধাঃ
প্রাদুরাসন্মহাকায়াস্তস্যোদ্যানস্য রক্ষিণঃ
153.30
তে দৃষ্ট্বা ধর্মরাজানং দেবর্ষিং চাপি লোমশম্
নকুলং সহদেবং চ তথান্যান্ব্রাহ্মণর্ষভান্
বিনয়েনানতাঃ সর্বে প্রণিপেতুশ্চ ভারত
153.31
সান্ত্বিতা ধর্মরাজেন প্রসেদুঃ ক্ষণদাচরাঃ
বিদিতাশ্চ কুবেরস্য ততস্তে নরপুংগবাঃ
ঊষুর্নাতিচিরং কালং রমমাণাঃ কুরূদ্বহাঃ