Utshovঅধ্যায় 154
154.1
বৈশংপায়ন উবাচ
ততস্তান্পরিবিশ্বস্তান্বসতস্তত্র পাণ্ডবান্
গতেষু তেষু রক্ষঃসু ভীমসেনাত্মজেঽপি চ
154.2
রহিতান্ভীমসেনেন কদাচিত্তান্যদৃচ্ছয়া
জহার ধর্মরাজানং যমৌ কৃষ্ণাং চ রাক্ষসঃ
154.3
ব্রাহ্মণো মন্ত্রকুশলঃ সর্বাস্ত্রেষ্বস্ত্রবিত্তমঃ
ইতি ব্রুবন্পাণ্ডবেয়ান্পর্যুপাস্তে স্ম নিত্যদা
154.4
পরীক্ষমাণঃ পার্থানাং কলাপানি ধনূংষি চ
অন্তরং সমভিপ্রেপ্সুর্নাম্না খ্যাতো জটাসুরঃ
154.5
স ভীমসেনে নিষ্ক্রান্তে মৃগয়ার্থমরিংদমে
অন্যদ্রূপং সমাস্থায় বিকৃতং ভৈরবং মহৎ
154.6
গৃহীত্বা সর্বশস্ত্রাণি দ্রৌপদীং পরিগৃহ্য চ
প্রাতিষ্ঠত স দুষ্টাত্মা ত্রীন্গৃহীত্বা চ পাণ্ডবান্
154.7
সহদেবস্তু যত্নেন ততোঽপক্রম্য পাণ্ডবঃ
আক্রন্দদ্ভীমসেনং বৈ যেন যাতো মহাবলঃ
154.8
তমব্রবীদ্ধর্মরাজো হ্রিয়মাণো যুধিষ্ঠিরঃ
ধর্মস্তে হীয়তে মূঢ ন চৈনং সমবেক্ষসে
154.9
যেঽন্যে কেচিন্মনুষ্যেষু তির্যগ্যোনিগতা অপি
গন্ধর্বয়ক্ষরক্ষাংসি বয়াংসি পশবস্তথা
মনুষ্যানুপজীবন্তি ততস্ত্বমুপজীবসি
154.10
সমৃদ্ধ্যা হ্যস্য লোকস্য লোকো যুষ্মাকমৃধ্যতে
ইমং চ লোকং শোচন্তমনুশোচন্তি দেবতাঃ
পূজ্যমানাশ্চ বর্ধন্তে হব্যকব্যৈর্যথাবিধি
154.11
বয়ং রাষ্ট্রস্য গোপ্তারো রক্ষিতারশ্চ রাক্ষস
রাষ্ট্রস্যারক্ষ্যমাণস্য কুতো ভূতিঃ কুতঃ সুখম্
154.12
ন চ রাজাবমন্তব্যো রক্ষসা জাত্বনাগসি
অণুরপ্যপচারশ্চ নাস্ত্যস্মাকং নরাশন
154.13
দ্রোগ্ধব্যং ন চ মিত্রেষু ন বিশ্বস্তেষু কর্হিচিৎ
যেষাং চান্নানি ভুঞ্জীত যত্র চ স্যাত্প্রতিশ্রয়ঃ
154.14
স ত্বং প্রতিশ্রয়েঽস্মাকং পূজ্যমানঃ সুখোষিতঃ
ভুক্ত্বা চান্নানি দুষ্প্রজ্ঞ কথমস্মাঞ্জিহীর্ষসি
154.15
এবমেব বৃথাচারো বৃথাবৃদ্ধো বৃথামতিঃ
বৃথামরণমর্হস্ত্বং বৃথাদ্য ন ভবিষ্যসি
154.16
অথ চেদ্দুষ্টবুদ্ধিস্ত্বং সর্বৈর্ধর্মৈর্বিবর্জিতঃ
প্রদায় শস্ত্রাণ্যস্মাকং যুদ্ধেন দ্রৌপদীং হর
154.17
অথ চেত্ত্বমবিজ্ঞায় ইদং কর্ম করিষ্যসি
অধর্মং চাপ্যকীর্তিং চ লোকে প্রাপ্স্যসি কেবলম্
154.18
এতামদ্য পরামৃশ্য স্ত্রিয়ং রাক্ষস মানুষীম্
বিষমেতত্সমালোড্য কুম্ভেন প্রাশিতং ত্বয়া
154.19
ততো যুধিষ্ঠিরস্তস্য ভারিকঃ সমপদ্যত
স তু ভারাভিভূতাত্মা ন তথা শীঘ্রগোঽভবৎ
154.20
অথাব্রবীদ্দ্রৌপদীং চ নকুলং চ যুধিষ্ঠিরঃ
মা ভৈষ্ট রাক্ষসান্মূঢাদ্গতিরস্য ময়া হৃতা
154.21
নাতিদূরে মহাবাহুর্ভবিতা পবনাত্মজঃ
অস্মিন্মুহূর্তে সংপ্রাপ্তে ন ভবিষ্যতি রাক্ষসঃ
154.22
সহদেবস্তু তং দৃষ্ট্বা রাক্ষসং মূঢচেতসম্
উবাচ বচনং রাজন্কুন্তীপুত্রং যুধিষ্ঠিরম্
154.23
রাজন্কিং নাম তত্কৃত্যং ক্ষত্রিয়স্যাস্ত্যতোঽধিকম্
যদ্যুদ্ধেঽভিমুখঃ প্রাণাংস্ত্যজেচ্ছত্রূঞ্জয়েত বা
154.24
এষ চাস্মান্বয়ং চৈনং যুধ্যমানাঃ পরংতপ
সূদয়েম মহাবাহো দেশকালো হ্যয়ং নৃপ
154.25
ক্ষত্রধর্মস্য সংপ্রাপ্তঃ কালঃ সত্যপরাক্রম
জয়ন্তঃ পাত্যমানা বা প্রাপ্তুমর্হাম সদ্গতিম্
154.26
রাক্ষসে জীবমানেঽদ্য রবিরস্তমিয়াদ্যদি
নাহং ব্রূয়াং পুনর্জাতু ক্ষত্রিয়োঽস্মীতি ভারত
154.27
ভো ভো রাক্ষস তিষ্ঠস্ব সহদেবোঽস্মি পাণ্ডবঃ
হত্বা বা মাং নয়স্বৈনান্হতো বাদ্যেহ স্বপ্স্যসি
154.28
তথৈব তস্মিন্ব্রুবতি ভীমসেনো যদৃচ্ছয়া
প্রাদৃশ্যত মহাবাহুঃ সবজ্র ইব বাসবঃ
154.29
সোঽপশ্যদ্ভ্রাতরৌ তত্র দ্রৌপদীং চ যশস্বিনীম্
ক্ষিতিস্থং সহদেবং চ ক্ষিপন্তং রাক্ষসং তদা
154.30
মার্গাচ্চ রাক্ষসং মূঢং কালোপহতচেতসম্
ভ্রমন্তং তত্র তত্রৈব দৈবেন বিনিবারিতম্
154.31
ভ্রাতৄংস্তান্হ্রিয়তো দৃষ্ট্বা দ্রৌপদীং চ মহাবলঃ
ক্রোধমাহারয়দ্ভীমো রাক্ষসং চেদমব্রবীৎ
154.32
বিজ্ঞাতোঽসি ময়া পূর্বং চেষ্টঞ্শস্ত্রপরীক্ষণে
আস্থা তু ত্বয়ি মে নাস্তি যতোঽসি ন হতস্তদা
ব্রহ্মরূপপ্রতিচ্ছন্নো ন নো বদসি চাপ্রিয়ম্
154.33
প্রিয়েষু চরমাণং ত্বাং ন চৈবাপ্রিয়কারিণম্
অতিথিং ব্রহ্মরূপং চ কথং হন্যামনাগসম্
রাক্ষসং মন্যমানোঽপি যো হন্যান্নরকং ব্রজেৎ
154.34
অপক্বস্য চ কালেন বধস্তব ন বিদ্যতে
নূনমদ্যাসি সংপক্বো যথা তে মতিরীদৃশী
দত্তা কৃষ্ণাপহরণে কালেনাদ্ভুতকর্মণা
154.35
বডিশোঽয়ং ত্বয়া গ্রস্তঃ কালসূত্রেণ লম্বিতঃ
মত্স্যোঽম্ভসীব স্যূতাস্যঃ কথং মেঽদ্য গমিষ্যসি
154.36
যং চাসি প্রস্থিতো দেশং মনঃ পূর্বং গতং চ তে
ন তং গন্তাসি গন্তাসি মার্গং বকহিডিম্বয়োঃ
154.37
এবমুক্তস্তু ভীমেন রাক্ষসঃ কালচোদিতঃ
ভীত উত্সৃজ্য তান্সর্বান্যুদ্ধায় সমুপস্থিতঃ
154.38
অব্রবীচ্চ পুনর্ভীমং রোষাত্প্রস্ফুরিতাধরঃ
ন মে মূঢা দিশঃ পাপ ত্বদর্থং মে বিলম্বনম্
154.39
শ্রুতা মে রাক্ষসা যে যে ত্বয়া বিনিহতা রণে
তেষামদ্য করিষ্যামি তবাস্রেণোদকক্রিয়াম্
154.40
এবমুক্তস্ততো ভীমঃ সৃক্কিণী পরিসংলিহন্
স্ময়মান ইব ক্রোধাত্সাক্ষাত্কালান্তকোপমঃ
বাহুসংরম্ভমেবেচ্ছন্নভিদুদ্রাব রাক্ষসম্
154.41
রাক্ষসোঽপি তদা ভীমং যুদ্ধার্থিনমবস্থিতম্
অভিদুদ্রাব সংরব্ধো বলো বজ্রধরং যথা
154.42
বর্তমানে তদা তাভ্যাং বাহুয়ুদ্ধে সুদারুণে
মাদ্রীপুত্রাবভিক্রুদ্ধাবুভাবপ্যভ্যধাবতাম্
154.43
ন্যবারয়ত্তৌ প্রহসন্কুন্তীপুত্রো বৃকোদরঃ
শক্তোঽহং রাক্ষসস্যেতি প্রেক্ষধ্বমিতি চাব্রবীৎ
154.44
আত্মনা ভ্রাতৃভিশ্চাহং ধর্মেণ সুকৃতেন চ
ইষ্টেন চ শপে রাজন্সূদয়িষ্যামি রাক্ষসম্
154.45
ইত্যেবমুক্ত্বা তৌ বীরৌ স্পর্ধমানৌ পরস্পরম্
বাহুভিঃ সমসজ্জেতামুভৌ রক্ষোবৃকোদরৌ
154.46
তয়োরাসীত্সংপ্রহারঃ ক্রুদ্ধয়োর্ভীমরক্ষসোঃ
অমৃষ্যমাণয়োঃ সংখ্যে দেবদানবয়োরিব
154.47
আরুজ্যারুজ্য তৌ বৃক্ষানন্যোন্যমভিজঘ্নতুঃ
জীমূতাবিব ঘর্মান্তে বিনদন্তৌ মহাবলৌ
154.48
বভঞ্জতুর্মহাবৃক্ষানূরুভির্বলিনাং বরৌ
অন্যোন্যেনাভিসংরব্ধৌ পরস্পরজয়ৈষিণৌ
154.49
তদ্বৃক্ষয়ুদ্ধমভবন্মহীরুহবিনাশনম্
বালিসুগ্রীবয়োর্ভ্রাত্রোঃ পুরেব কপিসিংহয়োঃ
154.50
আবিধ্যাবিধ্য তৌ বৃক্ষান্মুহূর্তমিতরেতরম্
তাডয়ামাসতুরুভৌ বিনদন্তৌ মুহুর্মুহুঃ
154.51
তস্মিন্দেশে যদা বৃক্ষাঃ সর্ব এব নিপাতিতাঃ
পুঞ্জীকৃতাশ্চ শতশঃ পরস্পরবধেপ্সয়া
154.52
তদা শিলাঃ সমাদায় মুহূর্তমিব ভারত
মহাভ্রৈরিব শৈলেন্দ্রৌ যুয়ুধাতে মহাবলৌ
154.53
উগ্রাভিরুগ্ররূপাভির্বৃহতীভিঃ পরস্পরম্
বজ্রৈরিব মহাবেগৈরাজঘ্নতুরমর্ষণৌ
154.54
অভিহত্য চ ভূয়স্তাবন্যোন্যং বলদর্পিতৌ
ভুজাভ্যাং পরিগৃহ্যাথ চকর্ষাতে গজাবিব
154.55
মুষ্টিভিশ্চ মহাঘোরৈরন্যোন্যমভিপেততুঃ
তয়োশ্চটচটাশব্দো বভূব সুমহাত্মনোঃ
154.56
ততঃ সংহৃত্য মুষ্টিং তু পঞ্চশীর্ষমিবোরগম্
বেগেনাভ্যহনদ্ভীমো রাক্ষসস্য শিরোধরাম্
154.57
ততঃ শ্রান্তং তু তদ্রক্ষো ভীমসেনভুজাহতম্
সুপরিশ্রান্তমালক্ষ্য ভীমসেনোঽভ্যবর্তত
154.58
তত এনং মহাবাহুর্বাহুভ্যামমরোপমঃ
সমুত্ক্ষিপ্য বলাদ্ভীমো নিষ্পিপেষ মহীতলে
154.59
তস্য গাত্রাণি সর্বাণি চূর্ণয়ামাস পাণ্ডবঃ
অরত্নিনা চাভিহত্য শিরঃ কায়াদপাহরৎ
154.60
সংদষ্টোষ্ঠং বিবৃত্তাক্ষং ফলং বৃন্তাদিব চ্যুতম্
জটাসুরস্য তু শিরো ভীমসেনবলাদ্ধৃতম্
পপাত রুধিরাদিগ্ধং সংদষ্টদশনচ্ছদম্
154.61
তং নিহত্য মহেষ্বাসো যুধিষ্ঠিরমুপাগমৎ
স্তূয়মানো দ্বিজাগ্র্যৈস্তৈর্মরুদ্ভিরিব বাসবঃ