Utshovঅধ্যায় 155
155.1
বৈশংপায়ন উবাচ
নিহতে রাক্ষসে তস্মিন্পুনর্নারায়ণাশ্রমম্
অভ্যেত্য রাজা কৌন্তেয়ো নিবাসমকরোত্প্রভুঃ
155.2
স সমানীয় তান্সর্বান্ভ্রাতৄনিত্যব্রবীদ্বচঃ
দ্রৌপদ্যা সহিতান্কালে সংস্মরন্ভ্রাতরং জয়ম্
155.3
সমাশ্চতস্রোঽভিগতাঃ শিবেন চরতাং বনে
কৃতোদ্দেশশ্চ বীভত্সুঃ পঞ্চমীমভিতঃ সমাম্
155.4
প্রাপ্য পর্বতরাজানং শ্বেতং শিখরিণাং বরম্
তত্রাপি চ কৃতোদ্দেশঃ সমাগমদিদৃক্ষুভিঃ
155.5
কৃতশ্চ সময়স্তেন পার্থেনামিততেজসা
পঞ্চ বর্ষাণি বত্স্যামি বিদ্যার্থীতি পুরা ময়ি
155.6
তত্র গাণ্ডীবধন্বানমবাপ্তাস্ত্রমরিংদমম্
দেবলোকাদিমং লোকং দ্রক্ষ্যামঃ পুনরাগতম্
155.7
ইত্যুক্ত্বা ব্রাহ্মণান্সর্বানামন্ত্রয়ত পাণ্ডবঃ
কারণং চৈব তত্তেষামাচচক্ষে তপস্বিনাম্
155.8
তমুগ্রতপসঃ প্রীতাঃ কৃত্বা পার্থং প্রদক্ষিণম্
ব্রাহ্মণাস্তেঽন্বমোদন্ত শিবেন কুশলেন চ
155.9
সুখোদর্কমিমং ক্লেশমচিরাদ্ভরতর্ষভ
ক্ষত্রধর্মেণ ধর্মজ্ঞ তীর্ত্বা গাং পালয়িষ্যসি
155.10
তত্তু রাজা বচস্তেষাং প্রতিগৃহ্য তপস্বিনাম্
প্রতস্থে সহ বিপ্রৈস্তৈর্ভ্রাতৃভিশ্চ পরংতপঃ
155.11
দ্রৌপদ্যা সহিতঃ শ্রীমান্হৈডিম্বেয়াদিভিস্তথা
রাক্ষসৈরনুয়াতশ্চ লোমশেনাভিরক্ষিতঃ
155.12
ক্বচিজ্জগাম পদ্ভ্যাং তু রাক্ষসৈরুহ্যতে ক্বচিৎ
তত্র তত্র মহাতেজা ভ্রাতৃভিঃ সহ সুব্রতঃ
155.13
ততো যুধিষ্ঠিরো রাজা বহূন্ক্লেশান্বিচিন্তয়ন্
সিংহব্যাঘ্রগজাকীর্ণামুদীচীং প্রয়য়ৌ দিশম্
155.14
অবেক্ষমাণঃ কৈলাসং মৈনাকং চৈব পর্বতম্
গন্ধমাদনপাদাংশ্চ মেরুং চাপি শিলোচ্চয়ম্
155.15
উপর্যুপরি শৈলস্য বহ্বীশ্চ সরিতঃ শিবাঃ
প্রস্থং হিমবতঃ পুণ্যং যয়ৌ সপ্তদশেঽহনি
155.16
দদৃশুঃ পাণ্ডবা রাজন্গন্ধমাদনমন্তিকাৎ
পৃষ্ঠে হিমবতঃ পুণ্যে নানাদ্রুমলতায়ুতে
155.17
সলিলাবর্তসংজাতৈঃ পুষ্পিতৈশ্চ মহীরুহৈঃ
সমাবৃতং পুণ্যতমমাশ্রমং বৃষপর্বণঃ
155.18
তমুপক্রম্য রাজর্ষিং ধর্মাত্মানমরিংদমাঃ
পাণ্ডবা বৃষপর্বাণমবন্দন্ত গতক্লমাঃ
155.19
অভ্যনন্দত্স রাজর্ষিঃ পুত্রবদ্ভরতর্ষভান্
পূজিতাশ্চাবসংস্তত্র সপ্তরাত্রমরিংদমাঃ
155.20
অষ্টমেঽহনি সংপ্রাপ্তে তমৃষিং লোকবিশ্রুতম্
আমন্ত্র্য বৃষপর্বাণং প্রস্থানং সমরোচয়ন্
155.21
একৈকশশ্চ তান্বিপ্রান্নিবেদ্য বৃষপর্বণে
ন্যাসভূতান্যথাকালং বন্ধূনিব সুসত্কৃতান্
155.22
ততস্তে বরবস্ত্রাণি শুভান্যাভরণানি চ
ন্যদধুঃ পাণ্ডবাস্তস্মিন্নাশ্রমে বৃষপর্বণঃ
155.23
অতীতানাগতে বিদ্বান্কুশলঃ সর্বধর্মবিৎ
অন্বশাসত্স ধর্মজ্ঞঃ পুত্রবদ্ভরতর্ষভান্
155.24
তেঽনুজ্ঞাতা মহাত্মানঃ প্রয়য়ুর্দিশমুত্তরাম্
কৃষ্ণয়া সহিতা বীরা ব্রাহ্মণৈশ্চ মহাত্মভিঃ
তান্প্রস্থিতানন্বগচ্ছদ্বৃষপর্বা মহীপতিঃ
155.25
উপন্যস্য মহাতেজা বিপ্রেভ্যঃ পাণ্ডবাংস্তদা
অনুসংসাধ্য কৌন্তেয়ানাশীর্ভিরভিনন্দ্য চ
বৃষপর্বা নিববৃতে পন্থানমুপদিশ্য চ
155.26
নানামৃগগণৈর্জুষ্টং কৌন্তেয়ঃ সত্যবিক্রমঃ
পদাতির্ভ্রাতৃভিঃ সার্ধং প্রাতিষ্ঠত যুধিষ্ঠিরঃ
155.27
নানাদ্রুমনিরোধেষু বসন্তঃ শৈলসানুষু
পর্বতং বিবিশুঃ শ্বেতং চতুর্থেঽহনি পাণ্ডবাঃ
155.28
মহাভ্রঘনসংকাশং সলিলোপহিতং শুভম্
মণিকাঞ্চনরম্যং চ শৈলং নানাসমুচ্ছ্রয়ম্
155.29
তে সমাসাদ্য পন্থানং যথোক্তং বৃষপর্বণা
অনুসস্রুর্যথোদ্দেশং পশ্যন্তো বিবিধান্নগান্
155.30
উপর্যুপরি শৈলস্য গুহাঃ পরমদুর্গমাঃ
সুদুর্গমাংস্তে সুবহূন্সুখেনৈবাভিচক্রমুঃ
155.31
ধৌম্যঃ কৃষ্ণা চ পার্থাশ্চ লোমশশ্চ মহানৃষিঃ
অগমন্সহিতাস্তত্র ন কশ্চিদবহীয়তে
155.32
তে মৃগদ্বিজসংঘুষ্টং নানাদ্বিজসমাকুলম্
শাখামৃগগণৈশ্চৈব সেবিতং সুমনোহরম্
155.33
পুণ্যং পদ্মসরোপেতং সপল্বলমহাবনম্
উপতস্থুর্মহাবীর্যা মাল্যবন্তং মহাগিরিম্
155.34
ততঃ কিংপুরুষাবাসং সিদ্ধচারণসেবিতম্
দদৃশুর্হৃষ্টরোমাণঃ পর্বতং গন্ধমাদনম্
155.35
বিদ্যাধরানুচরিতং কিংনরীভিস্তথৈব চ
গজসিংহসমাকীর্ণমুদীর্ণশরভায়ুতম্
155.36
উপেতমন্যৈশ্চ তদা মৃগৈর্মৃদুনিনাদিভিঃ
তে গন্ধমাদনবনং তন্নন্দনবনোপমম্
155.37
মুদিতাঃ পাণ্ডুতনয়া মনোহৃদয়নন্দনম্
বিবিশুঃ ক্রমশো বীরা অরণ্যং শুভকাননম্
155.38
দ্রৌপদীসহিতা বীরাস্তৈশ্চ বিপ্রৈর্মহাত্মভিঃ
শৃণ্বন্তঃ প্রীতিজননান্বল্গূন্মদকলাঞ্শুভান্
শ্রোত্ররম্যান্সুমধুরাঞ্শব্দান্খগমুখেরিতান্
155.39
সর্বর্তুফলভারাঢ্যান্সর্বর্তুকুসুমোজ্জ্বলান্
পশ্যন্তঃ পাদপাংশ্চাপি ফলভারাবনামিতান্
155.40
আম্রানাম্রাতকান্ফুল্লান্নারিকেলান্সতিন্দুকান্
অজাতকাংস্তথা জীরান্দাডিমান্বীজপূরকান্
155.41
পনসাঁল্লিকুচান্মোচান্খর্জূরানাম্রবেতসান্
পারাবতাংস্তথা ক্ষৌদ্রান্নীপাংশ্চাপি মনোরমান্
155.42
বিল্বান্কপিত্থাঞ্জম্বূংশ্চ কাশ্মরীর্বদরীস্তথা
প্লক্ষানুদুম্বরবটানশ্বত্থান্ক্ষীরিণস্তথা
ভল্লাতকানামলকান্হরীতকবিভীতকান্
155.43
ইঙ্গুদান্করবীরাংশ্চ তিন্দুকাংশ্চ মহাফলান্
এতানন্যাংশ্চ বিবিধান্গন্ধমাদনসানুষু
155.44
ফলৈরমৃতকল্পৈস্তানাচিতান্স্বাদুভিস্তরূন্
তথৈব চম্পকাশোকান্কেতকান্বকুলাংস্তথা
155.45
পুংনাগান্সপ্তপর্ণাংশ্চ কর্ণিকারান্সকেতকান্
পাটলান্কুটজান্রম্যান্মন্দারেন্দীবরাংস্তথা
155.46
পারিজাতান্কোবিদারান্দেবদারুতরূংস্তথা
শালাংস্তালাংস্তমালাংশ্চ প্রিয়ালান্বকুলাংস্তথা
শাল্মলীঃ কিংশুকাশোকাঞ্শিংশপাংস্তরলাংস্তথা
155.47
চকোরৈঃ শতপত্রৈশ্চ ভৃঙ্গরাজৈস্তথা শুকৈঃ
কোকিলৈঃ কলবিঙ্কৈশ্চ হারীতৈর্জীবজীবকৈঃ
155.48
প্রিয়ব্রতৈশ্চাতকৈশ্চ তথান্যৈর্বিবিধৈঃ খগৈঃ
শ্রোত্ররম্যং সুমধুরং কূজদ্ভিশ্চাপ্যধিষ্ঠিতান্
155.49
সরাংসি চ বিচিত্রাণি প্রসন্নসলিলানি চ
কুমুদৈঃ পুণ্ডরীকৈশ্চ তথা কোকনদোত্পলৈঃ
কহ্লারৈঃ কমলৈশ্চৈব আচিতানি সমন্ততঃ
155.50
কদম্বৈশ্চক্রবাকৈশ্চ কুররৈর্জলকুক্কুটৈঃ
কারণ্ডবৈঃ প্লবৈর্হংসৈর্বকৈর্মদ্গুভিরেব চ
এতৈশ্চান্যৈশ্চ কীর্ণানি সমন্তাজ্জলচারিভিঃ
155.51
হৃষ্টৈস্তথা তামরসরসাসবমদালসৈঃ
পদ্মোদরচ্যুতরজঃকিঞ্জল্কারুণরঞ্জিতৈঃ
155.52
মধুরস্বরৈর্মধুকরৈর্বিরুতান্কমলাকরান্
পশ্যন্তস্তে মনোরম্যান্গন্ধমাদনসানুষু
155.53
তথৈব পদ্মষণ্ডৈশ্চ মণ্ডিতেষু সমন্ততঃ
শিখণ্ডিনীভিঃ সহিতাঁল্লতামণ্ডপকেষু চ
মেঘতূর্যরবোদ্দামমদনাকুলিতান্ভৃশম্
155.54
কৃত্বৈব কেকামধুরং সংগীতমধুরস্বরম্
চিত্রান্কলাপান্বিস্তীর্য সবিলাসান্মদালসান্
ময়ূরান্দদৃশুশ্চিত্রান্নৃত্যতো বনলাসকান্
155.55
কান্তাভিঃ সহিতানন্যানপশ্যন্রমতঃ সুখম্
বল্লীলতাসংকটেষু কটকেষু স্থিতাংস্তথা
155.56
কাংশ্চিচ্ছকুনজাতাংশ্চ বিটপেষূত্কটানপি
কলাপরচিতাটোপান্বিচিত্রমুকুটানিব
বিবরেষু তরূণাং চ মুদিতান্দদৃশুশ্চ তে
155.57
সিন্ধুবারানথোদ্দামান্মন্মথস্যেব তোমরান্
সুবর্ণকুসুমাকীর্ণান্গিরীণাং শিখরেষু চ
155.58
কর্ণিকারান্বিরচিতান্কর্ণপূরানিবোত্তমান্
অথাপশ্যন্কুরবকান্বনরাজিষু পুষ্পিতান্
কামবশ্যোত্সুককরান্কামস্যেব শরোত্করান্
155.59
তথৈব বনরাজীনামুদারান্রচিতানিব
বিরাজমানাংস্তেঽপশ্যংস্তিলকাংস্তিলকানিব
155.60
তথানঙ্গশরাকারান্সহকারান্মনোরমান্
অপশ্যন্ভ্রমরারাবান্মঞ্জরীভির্বিরাজিতান্
155.61
হিরণ্যসদৃশৈঃ পুষ্পৈর্দাবাগ্নিসদৃশৈরপি
লোহিতৈরঞ্জনাভৈশ্চ বৈডূর্যসদৃশৈরপি
155.62
তথা শালাংস্তমালাংশ্চ পাটল্যো বকুলানি চ
মালা ইব সমাসক্তাঃ শৈলানাং শিখরেষু চ
155.63
এবং ক্রমেণ তে বীরা বীক্ষমাণাঃ সমন্ততঃ
গজসংঘসমাবাধং সিংহব্যাঘ্রসমায়ুতম্
155.64
শরভোন্নাদসংঘুষ্টং নানারাবনিনাদিতম্
সর্বর্তুফলপুষ্পাঢ্যং গন্ধমাদনসানুষু
155.65
পীতা ভাস্বরবর্ণাভা বভূবুর্বনরাজয়ঃ
নাত্র কণ্টকিনঃ কেচিন্নাত্র কেচিদপুষ্পিতাঃ
স্নিগ্ধপত্রফলা বৃক্ষা গন্ধমাদনসানুষু
155.66
বিমলস্ফটিকাভানি পাণ্ডুরচ্ছদনৈর্দ্বিজৈঃ
রাজহংসৈরুপেতানি সারসাভিরুতানি চ
সরাংসি সরিতঃ পার্থাঃ পশ্যন্তঃ শৈলসানুষু
155.67
পদ্মোত্পলবিচিত্রাণি সুখস্পর্শজলানি চ
গন্ধবন্তি চ মাল্যানি রসবন্তি ফলানি চ
অতীব বৃক্ষা রাজন্তে পুষ্পিতাঃ শৈলসানুষু
155.68
এতে চান্যে চ বহবস্তত্র কাননজা দ্রুমাঃ
লতাশ্চ বিবিধাকারাঃ পত্রপুষ্পফলোচ্চয়াঃ
155.69
যুধিষ্ঠিরস্তু তান্বৃক্ষান্পশ্যমানো নগোত্তমে
ভীমসেনমিদং বাক্যমব্রবীন্মধুরাক্ষরম্
155.70
পশ্য ভীম শুভান্দেশান্দেবাক্রীডান্সমন্ততঃ
অমানুষগতিং প্রাপ্তাঃ সংসিদ্ধাঃ স্ম বৃকোদর
155.71
লতাভিশ্চৈব বহ্বীভিঃ পুষ্পিতাঃ পাদপোত্তমাঃ
সংশ্লিষ্টাঃ পার্থ শোভন্তে গন্ধমাদনসানুষু
155.72
শিখণ্ডিনীভিশ্চরতাং সহিতানাং শিখণ্ডিনাম্
নর্দতাং শৃণু নির্ঘোষং ভীম পর্বতসানুষু
155.73
চকোরাঃ শতপত্রাশ্চ মত্তকোকিলশারিকাঃ
পত্রিণঃ পুষ্পিতানেতান্সংশ্লিষ্যন্তি মহাদ্রুমান্
155.74
রক্তপীতারুণাঃ পার্থ পাদপাগ্রগতা দ্বিজাঃ
পরস্পরমুদীক্ষন্তে বহবো জীবজীবকাঃ
155.75
হরিতারুণবর্ণানাং শাদ্বলানাং সমন্ততঃ
সারসাঃ প্রতিদৃশ্যন্তে শৈলপ্রস্রবণেষ্বপি
155.76
বদন্তি মধুরা বাচঃ সর্বভূতমনোনুগাঃ
ভৃঙ্গরাজোপচক্রাশ্চ লোহপৃষ্ঠাশ্চ পত্রিণঃ
155.77
চতুর্বিষাণাঃ পদ্মাভাঃ কুঞ্জরাঃ সকরেণবঃ
এতে বৈডূর্যবর্ণাভং ক্ষোভয়ন্তি মহত্সরঃ
155.78
বহুতালসমুত্সেধাঃ শৈলশৃঙ্গাত্পরিচ্যুতাঃ
নানাপ্রস্রবণেভ্যশ্চ বারিধারাঃ পতন্ত্যমূঃ
155.79
ভাস্করাভপ্রভা ভীম শারদাভ্রঘনোপমাঃ
শোভয়ন্তি মহাশৈলং নানারজতধাতবঃ
155.80
ক্বচিদঞ্জনবর্ণাভাঃ ক্বচিত্কাঞ্চনসংনিভাঃ
ধাতবো হরিতালস্য ক্বচিদ্ধিঙ্গুলকস্য চ
155.81
মনঃশিলাগুহাশ্চৈব সংধ্যাভ্রনিকরোপমাঃ
শশলোহিতবর্ণাভাঃ ক্বচিদ্গৈরিকধাতবঃ
155.82
সিতাসিতাভ্রপ্রতিমা বালসূর্যসমপ্রভাঃ
এতে বহুবিধাঃ শৈলং শোভয়ন্তি মহাপ্রভাঃ
155.83
গন্ধর্বাঃ সহ কান্তাভির্যথোক্তং বৃষপর্বণা
দৃশ্যন্তে শৈলশৃঙ্গেষু পার্থ কিংপুরুষৈঃ সহ
155.84
গীতানাং তলতালানাং যথা সাম্নাং চ নিস্বনঃ
শ্রূয়তে বহুধা ভীম সর্বভূতমনোহরঃ
155.85
মহাগঙ্গামুদীক্ষস্ব পুণ্যাং দেবনদীং শুভাম্
কলহংসগণৈর্জুষ্টামৃষিকিংনরসেবিতাম্
155.86
ধাতুভিশ্চ সরিদ্ভিশ্চ কিংনরৈর্মৃগপক্ষিভিঃ
গন্ধর্বৈরপ্সরোভিশ্চ কাননৈশ্চ মনোরমৈঃ
155.87
ব্যালৈশ্চ বিবিধাকারৈঃ শতশীর্ষৈঃ সমন্ততঃ
উপেতং পশ্য কৌন্তেয় শৈলরাজমরিংদম
155.88
তে প্রীতমনসঃ শূরাঃ প্রাপ্তা গতিমনুত্তমাম্
নাতৃপ্যন্পর্বতেন্দ্রস্য দর্শনেন পরংতপাঃ
155.89
উপেতমথ মাল্যৈশ্চ ফলবদ্ভিশ্চ পাদপৈঃ
আর্ষ্টিষেণস্য রাজর্ষেরাশ্রমং দদৃশুস্তদা
155.90
ততস্তং তীব্রতপসং কৃশং ধমনিসংততম্
পারগং সর্বধর্মাণামার্ষ্টিষেণমুপাগমন্