Utshovঅধ্যায় 156
156.1
বৈশংপায়ন উবাচ
যুধিষ্ঠিরস্তমাসাদ্য তপসা দগ্ধকিল্বিষম্
অভ্যবাদয়ত প্রীতঃ শিরসা নাম কীর্তয়ন্
156.2
ততঃ কৃষ্ণা চ ভীমশ্চ যমৌ চাপি যশস্বিনৌ
শিরোভিঃ প্রাপ্য রাজর্ষিং পরিবার্যোপতস্থিরে
156.3
তথৈব ধৌম্যো ধর্মজ্ঞঃ পাণ্ডবানাং পুরোহিতঃ
যথান্যায়মুপাক্রান্তস্তমৃষিং সংশিতব্রতম্
156.4
অন্বজানাত্স ধর্মজ্ঞো মুনির্দিব্যেন চক্ষুষা
পাণ্ডোঃ পুত্রান্কুরুশ্রেষ্ঠানাস্যতামিতি চাব্রবীৎ
156.5
কুরূণামৃষভং প্রাজ্ঞং পূজয়িত্বা মহাতপাঃ
সহ ভ্রাতৃভিরাসীনং পর্যপৃচ্ছদনাময়ম্
156.6
নানৃতে কুরুষে ভাবং কচ্চিদ্ধর্মে চ বর্তসে
মতাপিত্রোশ্চ তে বৃত্তিঃ কচ্চিত্পার্থ ন সীদতি
156.7
কচ্চিত্তে গুরবঃ সর্বে বৃদ্ধা বৈদ্যাশ্চ পূজিতাঃ
কচ্চিন্ন কুরুষে ভাবং পার্থ পাপেষু কর্মসু
156.8
সুকৃতং প্রতিকর্তুং চ কচ্চিদ্ধাতুং চ দুষ্কৃতম্
যথান্যায়ং কুরুশ্রেষ্ঠ জানাসি ন চ কত্থসে
156.9
যথার্হং মানিতাঃ কচ্চিত্ত্বয়া নন্দন্তি সাধবঃ
বনেষ্বপি বসন্কচ্চিদ্ধর্মমেবানুবর্তসে
156.10
কচ্চিদ্ধৌম্যস্ত্বদাচারৈর্ন পার্থ পরিতপ্যতে
দানধর্মতপঃশৌচৈরার্জবেন তিতিক্ষয়া
156.11
পিতৃপৈতামহং বৃত্তং কচ্চিত্পার্থানুবর্তসে
কচ্চিদ্রাজর্ষিয়াতেন পথা গচ্ছসি পাণ্ডব
156.12
স্বে স্বে কিল কুলে জাতে পুত্রে নপ্তরি বা পুনঃ
পিতরঃ পিতৃলোকস্থাঃ শোচন্তি চ হসন্তি চ
156.13
কিং ন্বস্য দুষ্কৃতেঽস্মাভিঃ সংপ্রাপ্তব্যং ভবিষ্যতি
কিং চাস্য সুকৃতেঽস্মাভিঃ প্রাপ্তব্যমিতি শোভনম্
156.14
পিতা মাতা তথৈবাগ্নির্গুরুরাত্মা চ পঞ্চমঃ
যস্যৈতে পূজিতাঃ পার্থ তস্য লোকাবুভৌ জিতৌ
156.15
অব্ভক্ষা বায়ুভক্ষাশ্চ প্লবমানা বিহায়সা
জুষন্তে পর্বতশ্রেষ্ঠমৃষয়ঃ পর্বসংধিষু
156.16
কামিনঃ সহ কান্তাভিঃ পরস্পরমনুব্রতাঃ
দৃশ্যন্তে শৈলশৃঙ্গস্থাস্তথা কিংপুরুষা নৃপ
156.17
অরজাংসি চ বাসাংসি বসানাঃ কৌশিকানি চ
দৃশ্যন্তে বহবঃ পার্থ গন্ধর্বাপ্সরসাং গণাঃ
156.18
বিদ্যাধরগণাশ্চৈব স্রগ্বিণঃ প্রিয়দর্শনাঃ
মহোরগগণাশ্চৈব সুপর্ণাশ্চোরগাদয়ঃ
156.19
অস্য চোপরি শৈলস্য শ্রূয়তে পর্বসংধিষু
ভেরীপণবশঙ্খানাং মৃদঙ্গানাং চ নিস্বনঃ
156.20
ইহস্থৈরেব তত্সর্বং শ্রোতব্যং ভরতর্ষভাঃ
ন কার্যা বঃ কথংচিত্স্যাত্তত্রাভিসরণে মতিঃ
156.21
ন চাপ্যতঃ পরং শক্যং গন্তুং ভরতসত্তমাঃ
বিহারো হ্যত্র দেবানামমানুষগতিস্তু সা
156.22
ঈষচ্চপলকর্মাণং মনুষ্যমিহ ভারত
দ্বিষন্তি সর্বভূতানি তাডয়ন্তি চ রাক্ষসাঃ
156.23
অভ্যতিক্রম্য শিখরং শৈলস্যাস্য যুধিষ্ঠির
গতিঃ পরমসিদ্ধানাং দেবর্ষীণাং প্রকাশতে
156.24
চাপলাদিহ গচ্ছন্তং পার্থ যানমতঃ পরম্
অয়ঃশূলাদিভির্ঘ্নন্তি রাক্ষসাঃ শত্রুসূদন
156.25
অপ্সরোভিঃ পরিবৃতঃ সমৃদ্ধ্যা নরবাহনঃ
ইহ বৈশ্রবণস্তাত পর্বসংধিষু দৃশ্যতে
156.26
শিখরে তং সমাসীনমধিপং সর্বরক্ষসাম্
প্রেক্ষন্তে সর্বভূতানি ভানুমন্তমিবোদিতম্
156.27
দেবদানবসিদ্ধানাং তথা বৈশ্রবণস্য চ
গিরেঃ শিখরমুদ্যানমিদং ভরতসত্তম
156.28
উপাসীনস্য ধনদং তুম্বুরোঃ পর্বসংধিষু
গীতসামস্বনস্তাত শ্রূয়তে গন্ধমাদনে
156.29
এতদেবংবিধং চিত্রমিহ তাত যুধিষ্ঠির
প্রেক্ষন্তে সর্বভূতানি বহুশঃ পর্বসংধিষু
156.30
ভুঞ্জানাঃ সর্বভোজ্যানি রসবন্তি ফলানি চ
বসধ্বং পাণ্ডবশ্রেষ্ঠা যাবদর্জুনদর্শনম্
156.31
ন তাত চপলৈর্ভাব্যমিহ প্রাপ্তৈঃ কথংচন
উষিত্বেহ যথাকামং যথাশ্রদ্ধং বিহৃত্য চ
ততঃ শস্ত্রভৃতাং শ্রেষ্ঠ পৃথিবীং পালয়িষ্যসি