Utshovঅধ্যায় 157
157.1
জনমেজয় উবাচ
পাণ্ডোঃ পুত্রা মহাত্মানঃ সর্বে দিব্যপরাক্রমাঃ
কিয়ন্তং কালমবসন্পর্বতে গন্ধমাদনে
157.2
কানি চাভ্যবহার্যাণি তত্র তেষাং মহাত্মনাম্
বসতাং লোকবীরাণামাসংস্তদ্ব্রূহি সত্তম
157.3
বিস্তরেণ চ মে শংস ভীমসেনপরাক্রমম্
যদ্যচ্চক্রে মহাবাহুস্তস্মিন্হৈমবতে গিরৌ
ন খল্বাসীত্পুনর্যুদ্ধং তস্য যক্ষৈর্দ্বিজোত্তম
157.4
কচ্চিত্সমাগমস্তেষামাসীদ্বৈশ্রবণেন চ
তত্র হ্যায়াতি ধনদ আর্ষ্টিষেণো যথাব্রবীৎ
157.5
এতদিচ্ছাম্যহং শ্রোতুং বিস্তরেণ তপোধন
ন হি মে শৃণ্বতস্তৃপ্তিরস্তি তেষাং বিচেষ্টিতম্
157.6
বৈশংপায়ন উবাচ
এতদাত্মহিতং শ্রুত্বা তস্যাপ্রতিমতেজসঃ
শাসনং সততং চক্রুস্তথৈব ভরতর্ষভাঃ
157.7
ভুঞ্জানা মুনিভোজ্যানি রসবন্তি ফলানি চ
শুদ্ধবাণহতানাং চ মৃগাণাং পিশিতান্যপি
157.8
মেধ্যানি হিমবত্পৃষ্ঠে মধূনি বিবিধানি চ
এবং তে ন্যবসংস্তত্র পাণ্ডবা ভরতর্ষভাঃ
157.9
তথা নিবসতাং তেষাং পঞ্চমং বর্ষমভ্যগাৎ
শৃণ্বতাং লোমশোক্তানি বাক্যানি বিবিধানি চ
157.10
কৃত্যকাল উপস্থাস্য ইতি চোক্ত্বা ঘটোত্কচঃ
রাক্ষসৈঃ সহিতঃ সর্বৈঃ পূর্বমেব গতঃ প্রভো
157.11
আর্ষ্টিষেণাশ্রমে তেষাং বসতাং বৈ মহাত্মনাম্
অগচ্ছন্বহবো মাসাঃ পশ্যতাং মহদদ্ভুতম্
157.12
তৈস্তত্র রমমাণৈশ্চ বিহরদ্ভিশ্চ পাণ্ডবৈঃ
প্রীতিমন্তো মহাভাগা মুনয়শ্চারণাস্তথা
157.13
আজগ্মুঃ পাণ্ডবান্দ্রষ্টুং সিদ্ধাত্মানো যতব্রতাঃ
তৈস্তৈঃ সহ কথাশ্চক্রুর্দিব্যা ভরতসত্তমাঃ
157.14
ততঃ কতিপয়াহস্য মহাহ্রদনিবাসিনম্
ঋদ্ধিমন্তং মহানাগং সুপর্ণঃ সহসাহরৎ
157.15
প্রাকম্পত মহাশৈলঃ প্রামৃদ্যন্ত মহাদ্রুমাঃ
দদৃশুঃ সর্বভূতানি পাণ্ডবাশ্চ তদদ্ভুতম্
157.16
ততঃ শৈলোত্তমস্যাগ্রাত্পাণ্ডবান্প্রতি মারুতঃ
অবহত্সর্বমাল্যানি গন্ধবন্তি শুভানি চ
157.17
তত্র পুষ্পাণি দিব্যানি সুহৃদ্ভিঃ সহ পাণ্ডবাঃ
দদৃশুঃ পঞ্চ বর্ণানি দ্রৌপদী চ যশস্বিনী
157.18
ভীমসেনং ততঃ কৃষ্ণা কালে বচনমব্রবীৎ
বিবিক্তে পর্বতোদ্দেশে সুখাসীনং মহাভুজম্
157.19
সুপর্ণানিলবেগেন শ্বসনেন মহাবলাৎ
পঞ্চবর্ণানি পাত্যন্তে পুষ্পাণি ভরতর্ষভ
প্রত্যক্ষং সর্বভূতানাং নদীমশ্বরথাং প্রতি
157.20
খাণ্ডবে সত্যসংধেন ভ্রাত্রা তব নরেশ্বর
গন্ধর্বোরগরক্ষাংসি বাসবশ্চ নিবারিতঃ
হতা মায়াবিনশ্চোগ্রা ধনুঃ প্রাপ্তং চ গাণ্ডিবম্
157.21
তবাপি সুমহত্তেজো মহদ্বাহুবলং চ তে
অবিষহ্যমনাধৃষ্যং শতক্রতুবলোপমম্
157.22
ত্বদ্বাহুবলবেগেন ত্রাসিতাঃ সর্বরাক্ষসাঃ
হিত্বা শৈলং প্রপদ্যন্তাং ভীমসেন দিশো দশ
157.23
ততঃ শৈলোত্তমস্যাগ্রং চিত্রমাল্যধরং শিবম্
ব্যপেতভয়সংমোহাঃ পশ্যন্তু সুহৃদস্তব
157.24
এবং প্রণিহিতং ভীম চিরাত্প্রভৃতি মে মনঃ
দ্রষ্টুমিচ্ছামি শৈলাগ্রং ত্বদ্বাহুবলমাশ্রিতা
157.25
ততঃ ক্ষিপ্তমিবাত্মানং দ্রৌপদ্যা স পরংতপঃ
নামৃষ্যত মহাবাহুঃ প্রহারমিব সদ্গবঃ
157.26
সিংহর্ষভগতিঃ শ্রীমানুদারঃ কনকপ্রভঃ
মনস্বী বলবান্দৃপ্তো মানী শূরশ্চ পাণ্ডবঃ
157.27
লোহিতাক্ষঃ পৃথুব্যংসো মত্তবারণবিক্রমঃ
সিংহদংষ্ট্রো বৃহত্স্কন্ধঃ শালপোত ইবোদ্গতঃ
157.28
মহাত্মা চারুসর্বাঙ্গঃ কম্বুগ্রীবো মহাভুজঃ
রুক্মপৃষ্ঠং ধনুঃ খড্গং তূণাংশ্চাপি পরামৃশৎ
157.29
কেসরীব যথোত্সিক্তঃ প্রভিন্ন ইব বারণঃ
ব্যপেতভয়সংমোহঃ শৈলমভ্যপতদ্বলী
157.30
তং মৃগেন্দ্রমিবায়ান্তং প্রভিন্নমিব বারণম্
দদৃশুঃ সর্বভূতানি বাণখড্গধনুর্ধরম্
157.31
দ্রৌপদ্যা বর্ধয়ন্হর্ষং গদামাদায় পাণ্ডবঃ
ব্যপেতভয়সংমোহঃ শৈলরাজং সমাবিশৎ
157.32
ন গ্লানির্ন চ কাতর্যং ন বৈক্লব্যং ন মত্সরঃ
কদাচিজ্জুষতে পার্থমাত্মজং মাতরিশ্বনঃ
157.33
তদেকায়নমাসাদ্য বিষমং ভীমদর্শনম্
বহুতালোচ্ছ্রয়ং শৃঙ্গমারুরোহ মহাবলঃ
157.34
স কিংনরমহানাগমুনিগন্ধর্বরাক্ষসান্
হর্ষয়ন্পর্বতস্যাগ্রমাসসাদ মহাবলঃ
157.35
তত্র বৈশ্রবণাবাসং দদর্শ ভরতর্ষভঃ
কাঞ্চনৈঃ স্ফাটিকাকারৈর্বেশ্মভিঃ সমলংকৃতম্
157.36
মোদয়ন্সর্বভূতানি গন্ধমাদনসংভবঃ
সর্বগন্ধবহস্তত্র মারুতঃ সুসুখো ববৌ
157.37
চিত্রা বিবিধবর্ণাভাশ্চিত্রমঞ্জরিধারিণঃ
অচিন্ত্যা বিবিধাস্তত্র দ্রুমাঃ পরমশোভনাঃ
157.38
রত্নজালপরিক্ষিপ্তং চিত্রমাল্যধরং শিবম্
রাক্ষসাধিপতেঃ স্থানং দদর্শ ভরতর্ষভঃ
157.39
গদাখড্গধনুষ্পাণিঃ সমভিত্যক্তজীবিতঃ
ভীমসেনো মহাবাহুস্তস্থৌ গিরিরিবাচলঃ
157.40
ততঃ শঙ্খমুপাধ্মাসীদ্দ্বিষতাং লোমহর্ষণম্
জ্যাঘোষতলঘোষং চ কৃত্বা ভূতান্যমোহয়ৎ
157.41
ততঃ সংহৃষ্টরোমাণঃ শব্দং তমভিদুদ্রুবুঃ
যক্ষরাক্ষসগন্ধর্বাঃ পাণ্ডবস্য সমীপতঃ
157.42
গদাপরিঘনিস্ত্রিংশশক্তিশূলপরশ্বধাঃ
প্রগৃহীতা ব্যরোচন্ত যক্ষরাক্ষসবাহুভিঃ
157.43
ততঃ প্রববৃতে যুদ্ধং তেষাং তস্য চ ভারত
তৈঃ প্রয়ুক্তান্মহাকায়ৈঃ শক্তিশূলপরশ্বধান্
ভল্লৈর্ভীমঃ প্রচিচ্ছেদ ভীমবেগতরৈস্ততঃ
157.44
অন্তরিক্ষচরাণাং চ ভূমিষ্ঠানাং চ গর্জতাম্
শরৈর্বিব্যাধ গাত্রাণি রাক্ষসানাং মহাবলঃ
157.45
সা লোহিতমহাবৃষ্টিরভ্যবর্ষন্মহাবলম্
কায়েভ্যঃ প্রচ্যুতা ধারা রাক্ষসানাং সমন্ততঃ
157.46
ভীমবাহুবলোত্সৃষ্টৈর্বহুধা যক্ষরক্ষসাম্
বিনিকৃত্তান্যদৃশ্যন্ত শরীরাণি শিরাংসি চ
157.47
প্রচ্ছাদ্যমানং রক্ষোভিঃ পাণ্ডবং প্রিয়দর্শনম্
দদৃশুঃ সর্বভূতানি সূর্যমভ্রগণৈরিব
157.48
স রশ্মিভিরিবাদিত্যঃ শরৈররিনিঘাতিভিঃ
সর্বানার্ছন্মহাবাহুর্বলবান্সত্যবিক্রমঃ
157.49
অভিতর্জয়মানাশ্চ রুবন্তশ্চ মহারবান্
ন মোহং ভীমসেনস্য দদৃশুঃ সর্বরাক্ষসাঃ
157.50
তে শরৈঃ ক্ষতসর্বাঙ্গা ভীমসেনভয়ার্দিতাঃ
ভীমমার্তস্বরং চক্রুর্বিপ্রকীর্ণমহায়ুধাঃ
157.51
উত্সৃজ্য তে গদাশূলানসিশক্তিপরশ্বধান্
দক্ষিণাং দিশমাজগ্মুস্ত্রাসিতা দৃঢধন্বনা
157.52
তত্র শূলগদাপাণির্ব্যূঢোরস্কো মহাভুজঃ
সখা বৈশ্রবণস্যাসীন্মণিমান্নাম রাক্ষসঃ
157.53
অদর্শয়দধীকারং পৌরুষং চ মহাবলঃ
স তান্দৃষ্ট্বা পরাবৃত্তান্স্ময়মান ইবাব্রবীৎ
157.54
একেন বহবঃ সংখ্যে মানুষেণ পরাজিতাঃ
প্রাপ্য বৈশ্রবণাবাসং কিং বক্ষ্যথ ধনেশ্বরম্
157.55
এবমাভাষ্য তান্সর্বান্ন্যবর্তত স রাক্ষসঃ
শক্তিশূলগদাপাণিরভ্যধাবচ্চ পাণ্ডবম্
157.56
তমাপতন্তং বেগেন প্রভিন্নমিব বারণম্
বত্সদন্তৈস্ত্রিভিঃ পার্শ্বে ভীমসেনঃ সমর্পয়ৎ
157.57
মণিমানপি সংক্রুদ্ধঃ প্রগৃহ্য মহতীং গদাম্
প্রাহিণোদ্ভীমসেনায় পরিক্ষিপ্য মহাবলঃ
157.58
বিদ্যুদ্রূপাং মহাঘোরামাকাশে মহতীং গদাম্
শরৈর্বহুভিরভ্যর্ছদ্ভীমসেনঃ শিলাশিতৈঃ
157.59
প্রত্যহন্যন্ত তে সর্বে গদামাসাদ্য সায়কাঃ
ন বেগং ধারয়ামাসুর্গদাবেগস্য বেগিতাঃ
157.60
গদায়ুদ্ধসমাচারং বুধ্যমানঃ স বীর্যবান্
ব্যংসয়ামাস তং তস্য প্রহারং ভীমবিক্রমঃ
157.61
ততঃ শক্তিং মহাঘোরাং রুক্মদণ্ডাময়স্ময়ীম্
তস্মিন্নেবান্তরে ধীমান্প্রজহারাথ রাক্ষসঃ
157.62
সা ভুজং ভীমনির্হ্রাদা ভিত্ত্বা ভীমস্য দক্ষিণম্
সাগ্নিজ্বালা মহারৌদ্রা পপাত সহসা ভুবি
157.63
সোঽতিবিদ্ধো মহেষ্বাসঃ শক্ত্যামিতপরাক্রমঃ
গদাং জগ্রাহ কৌরব্যো গদায়ুদ্ধবিশারদঃ
157.64
তাং প্রগৃহ্যোন্নদন্ভীমঃ সর্বশৈক্যায়সীং গদাম্
তরসা সোঽভিদুদ্রাব মণিমন্তং মহাবলম্
157.65
দীপ্যমানং মহাশূলং প্রগৃহ্য মণিমানপি
প্রাহিণোদ্ভীমসেনায় বেগেন মহতা নদন্
157.66
ভঙ্ক্ত্বা শূলং গদাগ্রেণ গদায়ুদ্ধবিশারদঃ
অভিদুদ্রাব তং তূর্ণং গরুত্মানিব পন্নগম্
157.67
সোঽন্তরিক্ষমভিপ্লুত্য বিধূয় সহসা গদাম্
প্রচিক্ষেপ মহাবাহুর্বিনদ্য রণমূর্ধনি
157.68
সেন্দ্রাশনিরিবেন্দ্রেণ বিসৃষ্টা বাতরংহসা
হত্বা রক্ষঃ ক্ষিতিং প্রাপ্য কৃত্যেব নিপপাত হ
157.69
তং রাক্ষসং ভীমবলং ভীমসেনেন পাতিতম্
দদৃশুঃ সর্বভূতানি সিংহেনেব গবাং পতিম্
157.70
তং প্রেক্ষ্য নিহতং ভূমৌ হতশেষা নিশাচরাঃ
ভীমমার্তস্বরং কৃত্বা জগ্মুঃ প্রাচীং দিশং প্রতি