Utshovঅধ্যায় 158
158.1
বৈশংপায়ন উবাচ
শ্রুত্বা বহুবিধৈঃ শব্দৈর্নাদ্যমানা গিরের্গুহাঃ
অজাতশত্রুঃ কৌন্তেয়ো মাদ্রীপুত্রাবুভাবপি
158.2
ধৌম্যঃ কৃষ্ণা চ বিপ্রাশ্চ সর্বে চ সুহৃদস্তথা
ভীমসেনমপশ্যন্তঃ সর্বে বিমনসোঽভবন্
158.3
দ্রৌপদীমার্ষ্টিষেণায় প্রদায় তু মহারথাঃ
সহিতাঃ সায়ুধাঃ শূরাঃ শৈলমারুরুহুস্তদা
158.4
ততঃ সংপ্রাপ্য শৈলাগ্রং বীক্ষমাণা মহারথাঃ
দদৃশুস্তে মহেষ্বাসা ভীমসেনমরিংদমম্
158.5
স্ফুরতশ্চ মহাকায়ান্গতসত্ত্বাংশ্চ রাক্ষসান্
মহাবলান্মহাঘোরান্ভীমসেনেন পাতিতান্
158.6
শুশুভে স মহাবাহুর্গদাখড্গধনুর্ধরঃ
নিহত্য সমরে সর্বান্দানবান্মঘবানিব
158.7
ততস্তে সমতিক্রম্য পরিষ্বজ্য বৃকোদরম্
তত্রোপবিবিশুঃ পার্থাঃ প্রাপ্তা গতিমনুত্তমাম্
158.8
তৈশ্চতুর্ভির্মহেষ্বাসৈর্গিরিশৃঙ্গমশোভত
লোকপালৈর্মহাভাগৈর্দিবং দেববরৈরিব
158.9
কুবেরসদনং দৃষ্ট্বা রাক্ষসাংশ্চ নিপাতিতান্
ভ্রাতা ভ্রাতরমাসীনমভ্যভাষত পাণ্ডবম্
158.10
সাহসাদ্যদি বা মোহাদ্ভীম পাপমিদং কৃতম্
নৈতত্তে সদৃশং বীর মুনেরিব মৃষাবচঃ
158.11
রাজদ্বিষ্টং ন কর্তব্যমিতি ধর্মবিদো বিদুঃ
ত্রিদশানামিদং দ্বিষ্টং ভীমসেন ত্বয়া কৃতম্
158.12
অর্থধর্মাবনাদৃত্য যঃ পাপে কুরুতে মনঃ
কর্মণাং পার্থ পাপানাং স ফলং বিন্দতে ধ্রুবম্
পুনরেবং ন কর্তব্যং মম চেদিচ্ছসি প্রিয়ম্
158.13
এবমুক্ত্বা স ধর্মাত্মা ভ্রাতা ভ্রাতরমচ্যুতম্
অর্থতত্ত্ববিভাগজ্ঞঃ কুন্তীপুত্রো যুধিষ্ঠিরঃ
বিররাম মহাতেজাস্তমেবার্থং বিচিন্তয়ন্
158.14
ততস্তু হতশিষ্টা যে ভীমসেনেন রাক্ষসাঃ
সহিতাঃ প্রত্যপদ্যন্ত কুবেরসদনং প্রতি
158.15
তে জবেন মহাবেগাঃ প্রাপ্য বৈশ্রবণালয়ম্
ভীমমার্তস্বরং চক্রুর্ভীমসেনভয়ার্দিতাঃ
158.16
ন্যস্তশস্ত্রায়ুধাঃ শ্রান্তাঃ শোণিতাক্তপরিচ্ছদাঃ
প্রকীর্ণমূর্ধজা রাজন্যক্ষাধিপতিমব্রুবন্
158.17
গদাপরিঘনিস্ত্রিংশতোমরপ্রাসয়োধিনঃ
রাক্ষসা নিহতাঃ সর্বে তব দেব পুরঃসরাঃ
158.18
প্রমৃদ্য তরসা শৈলং মানুষেণ ধনেশ্বর
একেন সহিতাঃ সংখ্যে হতাঃ ক্রোধবশা গণাঃ
158.19
প্রবরা রক্ষসেন্দ্রাণাং যক্ষাণাং চ ধনাধিপ
শেরতে নিহতা দেব গতসত্ত্বাঃ পরাসবঃ
158.20
লব্ধঃ শৈলো বয়ং মুক্তা মণিমাংস্তে সখা হতঃ
মানুষেণ কৃতং কর্ম বিধত্স্ব যদনন্তরম্
158.21
স তচ্ছ্রুত্বা তু সংক্রুদ্ধঃ সর্বয়ক্ষগণাধিপঃ
কোপসংরক্তনয়নঃ কথমিত্যব্রবীদ্বচঃ
158.22
দ্বিতীয়মপরাধ্যন্তং ভীমং শ্রুত্বা ধনেশ্বরঃ
চুক্রোধ যক্ষাধিপতির্যুজ্যতামিতি চাব্রবীৎ
158.23
অথাভ্রঘনসংকাশং গিরিকূটমিবোচ্ছ্রিতম্
হয়ৈঃ সংয়োজয়ামাসুর্গান্ধর্বৈরুত্তমং রথম্
158.24
তস্য সর্বগুণোপেতা বিমলাক্ষা হয়োত্তমাঃ
তেজোবলজবোপেতা নানারত্নবিভূষিতাঃ
158.25
শোভমানা রথে যুক্তাস্তরিষ্যন্ত ইবাশুগাঃ
হর্ষয়ামাসুরন্যোন্যমিঙ্গিতৈর্বিজয়াবহৈঃ
158.26
স তমাস্থায় ভগবান্রাজরাজো মহারথম্
প্রয়য়ৌ দেবগন্ধর্বৈঃ স্তূয়মানো মহাদ্যুতিঃ
158.27
তং প্রয়ান্তং মহাত্মানং সর্বয়ক্ষধনাধিপম্
রক্তাক্ষা হেমসংকাশা মহাকায়া মহাবলাঃ
158.28
সায়ুধা বদ্ধনিস্ত্রিংশা যক্ষা দশশতায়ুতাঃ
জবেন মহতা বীরাঃ পরিবার্যোপতস্থিরে
158.29
তং মহান্তমুপায়ান্তং ধনেশ্বরমুপান্তিকে
দদৃশুর্হৃষ্টরোমাণঃ পাণ্ডবাঃ প্রিয়দর্শনম্
158.30
কুবেরস্তু মহাসত্ত্বান্পাণ্ডোঃ পুত্রান্মহারথান্
আত্তকার্মুকনিস্ত্রিংশান্দৃষ্ট্বা প্রীতোঽভবত্তদা
158.31
তে পক্ষিণ ইবোত্পত্য গিরেঃ শৃঙ্গং মহাজবাঃ
তস্থুস্তেষাং সমভ্যাশে ধনেশ্বরপুরঃসরাঃ
158.32
ততস্তং হৃষ্টমনসং পাণ্ডবান্প্রতি ভারত
সমীক্ষ্য যক্ষগন্ধর্বা নির্বিকারা ব্যবস্থিতাঃ
158.33
পাণ্ডবাশ্চ মহাত্মানঃ প্রণম্য ধনদং প্রভুম্
নকুলঃ সহদেবশ্চ ধর্মপুত্রশ্চ ধর্মবিৎ
158.34
অপরাদ্ধমিবাত্মানং মন্যমানা মহারথাঃ
তস্থুঃ প্রাঞ্জলয়ঃ সর্বে পরিবার্য ধনেশ্বরম্
158.35
শয্যাসনবরং শ্রীমত্পুষ্পকং বিশ্বকর্মণা
বিহিতং চিত্রপর্যন্তমাতিষ্ঠত ধনাধিপঃ
158.36
তমাসীনং মহাকায়াঃ শঙ্কুকর্ণা মহাজবাঃ
উপোপবিবিশুর্যক্ষা রাক্ষসাশ্চ সহস্রশঃ
158.37
শতশশ্চাপি গন্ধর্বাস্তথৈবাপ্সরসাং গণাঃ
পরিবার্যোপতিষ্ঠন্ত যথা দেবাঃ শতক্রতুম্
158.38
কাঞ্চনীং শিরসা বিভ্রদ্ভীমসেনঃ স্রজং শুভাম্
বাণখড্গধনুষ্পাণিরুদৈক্ষত ধনাধিপম্
158.39
ন ভীর্ভীমস্য ন গ্লানির্বিক্ষতস্যাপি রাক্ষসৈঃ
আসীত্তস্যামবস্থায়াং কুবেরমপি পশ্যতঃ
158.40
আদদানং শিতান্বাণান্যোদ্ধুকামমবস্থিতম্
দৃষ্ট্বা ভীমং ধর্মসুতমব্রবীন্নরবাহনঃ
158.41
বিদুস্ত্বাং সর্বভূতানি পার্থ ভূতহিতে রতম্
নির্ভয়শ্চাপি শৈলাগ্রে বস ত্বং সহ বন্ধুভিঃ
158.42
ন চ মন্যুস্ত্বয়া কার্যো ভীমসেনস্য পাণ্ডব
কালেনৈতে হতাঃ পূর্বং নিমিত্তমনুজস্তব
158.43
ব্রীডা চাত্র ন কর্তব্যা সাহসং যদিদং কৃতম্
দৃষ্টশ্চাপি সুরৈঃ পূর্বং বিনাশো যক্ষরক্ষসাম্
158.44
ন ভীমসেনে কোপো মে প্রীতোঽস্মি ভরতর্ষভ
কর্মণানেন ভীমস্য মম তুষ্টিরভূত্পুরা
158.45
এবমুক্ত্বা তু রাজানং ভীমসেনমভাষত
নৈতন্মনসি মে তাত বর্ততে কুরুসত্তম
যদিদং সাহসং ভীম কৃষ্ণার্থে কৃতবানসি
158.46
মামনাদৃত্য দেবাংশ্চ বিনাশং যক্ষরক্ষসাম্
স্ববাহুবলমাশ্রিত্য তেনাহং প্রীতিমাংস্ত্বয়ি
শাপাদস্মি বিনির্মুক্তো ঘোরাদদ্য বৃকোদর
158.47
অহং পূর্বমগস্ত্যেন ক্রুদ্ধেন পরমর্ষিণা
শপ্তোঽপরাধে কস্মিংশ্চিত্তস্যৈষা নিষ্কৃতিঃ কৃতা
158.48
দৃষ্টো হি মম সংক্লেশঃ পুরা পাণ্ডবনন্দন
ন তবাত্রাপরাধোঽস্তি কথংচিদপি শত্রুহন্
158.49
যুধিষ্ঠির উবাচ
কথং শপ্তোঽসি ভগবন্নগস্ত্যেন মহাত্মনা
শ্রোতুমিচ্ছাম্যহং দেব তবৈতচ্ছাপকারণম্
158.50
ইদং চাশ্চর্যভূতং মে যত্ক্রোধাত্তস্য ধীমতঃ
তদৈব ত্বং ন নির্দগ্ধঃ সবলঃ সপদানুগঃ
158.51
বৈশ্রবণ উবাচ
দেবতানামভূন্মন্ত্রঃ কুশবত্যাং নরেশ্বর
বৃতস্তত্রাহমগমং মহাপদ্মশতৈস্ত্রিভিঃ
যক্ষাণাং ঘোররূপাণাং বিবিধায়ুধধারিণাম্
158.52
অধ্বন্যহমথাপশ্যমগস্ত্যমৃষিসত্তমম্
উগ্রং তপস্তপস্যন্তং যমুনাতীরমাশ্রিতম্
নানাপক্ষিগণাকীর্ণং পুষ্পিতদ্রুমশোভিতম্
158.53
তমূর্ধ্ববাহুং দৃষ্ট্বা তু সূর্যস্যাভিমুখং স্থিতম্
তেজোরাশিং দীপ্যমানং হুতাশনমিবৈধিতম্
158.54
রাক্ষসাধিপতিঃ শ্রীমান্মণিমান্নাম মে সখা
মৌর্খ্যাদজ্ঞানভাবাচ্চ দর্পান্মোহাচ্চ ভারত
ন্যষ্ঠীবদাকাশগতো মহর্ষেস্তস্য মূর্ধনি
158.55
স কোপান্মামুবাচেদং দিশঃ সর্বা দহন্নিব
মামবজ্ঞায় দুষ্টাত্মা যস্মাদেষ সখা তব
158.56
ধর্ষণাং কৃতবানেতাং পশ্যতস্তে ধনেশ্বর
তস্মাত্সহৈভিঃ সৈন্যৈস্তে বধং প্রাপ্স্যতি মানুষাৎ
158.57
ত্বং চাপ্যেভির্হতৈঃ সৈন্যৈঃ ক্লেশং প্রাপ্স্যসি দুর্মতে
তমেব মানুষং দৃষ্ট্বা কিল্বিষাদ্বিপ্রমোক্ষ্যসে
158.58
সৈন্যানাং তু তবৈতেষাং পুত্রপৌত্রবলান্বিতম্
ন শাপং প্রাপ্স্যতে ঘোরং গচ্ছ তেঽঽজ্ঞাং করিষ্যতি
158.59
এষ শাপো ময়া প্রাপ্তঃ প্রাক্তস্মাদৃষিসত্তমাৎ
স ভীমেন মহারাজ ভ্রাত্রা তব বিমোক্ষিতঃ