Utshovঅধ্যায় 159
159.1
বৈশ্রবণ উবাচ
যুধিষ্ঠির ধৃতির্দাক্ষ্যং দেশকালৌ পরাক্রমঃ
লোকতন্ত্রবিধানানামেষ পঞ্চবিধো বিধিঃ
159.2
ধৃতিমন্তশ্চ দক্ষাশ্চ স্বে স্বে কর্মণি ভারত
পরাক্রমবিধানজ্ঞা নরাঃ কৃতয়ুগেঽভবন্
159.3
ধৃতিমান্দেশকালজ্ঞঃ সর্বধর্মবিধানবিৎ
ক্ষত্রিয়ঃ ক্ষত্রিয়শ্রেষ্ঠ পৃথিবীমনুশাস্তি বৈ
159.4
য এবং বর্ততে পার্থ পুরুষঃ সর্বকর্মসু
স লোকে লভতে বীর যশঃ প্রেত্য চ সদ্গতিম্
159.5
দেশকালান্তরপ্রেপ্সুঃ কৃত্বা শক্রঃ পরাক্রমম্
সংপ্রাপ্তস্ত্রিদিবে রাজ্যং বৃত্রহা বসুভিঃ সহ
159.6
পাপাত্মা পাপবুদ্ধির্যঃ পাপমেবানুবর্ততে
কর্মণামবিভাগজ্ঞঃ প্রেত্য চেহ চ নশ্যতি
159.7
অকালজ্ঞঃ সুদুর্মেধাঃ কার্যাণামবিশেষবিৎ
বৃথাচারসমারম্ভঃ প্রেত্য চেহ চ নশ্যতি
159.8
সাহসে বর্তমানানাং নিকৃতীনাং দুরাত্মনাম্
সর্বসামর্থ্যলিপ্সূনাং পাপো ভবতি নিশ্চয়ঃ
159.9
অধর্মজ্ঞোঽবলিপ্তশ্চ বালবুদ্ধিরমর্ষণঃ
নির্ভয়ো ভীমসেনোঽয়ং তং শাধি পুরুষর্ষভ
159.10
আর্ষ্টিষেণস্য রাজর্ষেঃ প্রাপ্য ভূয়স্ত্বমাশ্রমম্
তামিস্রং প্রথমং পক্ষং বীতশোকভয়ো বস
159.11
অলকাঃ সহ গন্ধর্বৈর্যক্ষৈশ্চ সহ রাক্ষসৈঃ
মন্নিয়ুক্তা মনুষ্যেন্দ্র সর্বে চ গিরিবাসিনঃ
রক্ষন্তু ত্বা মহাবাহো সহিতং দ্বিজসত্তমৈঃ
159.12
সাহসেষু চ সংতিষ্ঠন্নিহ শৈলে বৃকোদরঃ
বার্যতাং সাধ্বয়ং রাজংস্ত্বয়া ধর্মভৃতাং বর
159.13
ইতঃ পরং চ রাজেন্দ্র দ্রক্ষ্যন্তি বনগোচরাঃ
উপস্থাস্যন্তি চ সদা রক্ষিষ্যন্তি চ সর্বশঃ
159.14
তথৈব চান্নপানানি স্বাদূনি চ বহূনি চ
উপস্থাস্যন্তি বো গৃহ্য মত্প্রেষ্যাঃ পুরুষর্ষভ
159.15
যথা জিষ্ণুর্মহেন্দ্রস্য যথা বায়োর্বৃকোদরঃ
ধর্মস্য ত্বং যথা তাত যোগোত্পন্নো নিজঃ সুতঃ
159.16
আত্মজাবাত্মসংপন্নৌ যমৌ চোভৌ যথাশ্বিনোঃ
রক্ষ্যাস্তদ্বন্মমাপীহ যূয়ং সর্বে যুধিষ্ঠির
159.17
অর্থতত্ত্ববিভাগজ্ঞঃ সর্বধর্মবিশেষবিৎ
ভীমসেনাদবরজঃ ফল্গুনঃ কুশলী দিবি
159.18
যাঃ কাশ্চন মতা লোকেষ্বগ্র্যাঃ পরমসংপদঃ
জন্মপ্রভৃতি তাঃ সর্বাঃ স্থিতাস্তাত ধনংজয়ে
159.19
দমো দানং বলং বুদ্ধির্হ্রীর্ধৃতিস্তেজ উত্তমম্
এতান্যপি মহাসত্ত্বে স্থিতান্যমিততেজসি
159.20
ন মোহাত্কুরুতে জিষ্ণুঃ কর্ম পাণ্ডব গর্হিতম্
ন পার্থস্য মৃষোক্তানি কথয়ন্তি নরা নৃষু
159.21
স দেবপিতৃগন্ধর্বৈঃ কুরূণাং কীর্তিবর্ধনঃ
মানিতঃ কুরুতেঽস্ত্রাণি শক্রসদ্মনি ভারত
159.22
যোঽসৌ সর্বান্মহীপালান্ধর্মেণ বশমানয়ৎ
স শংতনুর্মহাতেজাঃ পিতুস্তব পিতামহঃ
প্রীয়তে পার্থ পার্থেন দিবি গাণ্ডীবধন্বনা
159.23
সম্যক্চাসৌ মহাবীর্যঃ কুলধুর্য ইব স্থিতঃ
পিতৄন্দেবাংস্তথা বিপ্রান্পূজয়িত্বা মহায়শাঃ
সপ্ত মুখ্যান্মহামেধানাহরদ্যমুনাং প্রতি
159.24
অধিরাজঃ স রাজংস্ত্বাং শংতনুঃ প্রপিতামহঃ
স্বর্গজিচ্ছক্রলোকস্থঃ কুশলং পরিপৃচ্ছতি
159.25
বৈশংপায়ন উবাচ
ততঃ শক্তিং গদাং খড্গং ধনুশ্চ ভরতর্ষভ
প্রাধ্বং কৃত্বা নমশ্চক্রে কুবেরায় বৃকোদরঃ
159.26
ততোঽব্রবীদ্ধনাধ্যক্ষঃ শরণ্যঃ শরণাগতম্
মানহা ভব শত্রূণাং সুহৃদাং নন্দিবর্ধনঃ
159.27
স্বেষু বেশ্মসু রম্যেষু বসতামিত্রতাপনাঃ
কামানুপহরিষ্যন্তি যক্ষা বো ভরতর্ষভাঃ
159.28
শীঘ্রমেব গুডাকেশঃ কৃতাস্ত্রঃ পুরুষর্ষভঃ
সাক্ষান্মঘবতা সৃষ্টঃ সংপ্রাপ্স্যতি ধনংজয়ঃ
159.29
এবমুত্তমকর্মাণমনুশিষ্য যুধিষ্ঠিরম্
অস্তং গিরিবরশ্রেষ্ঠং প্রয়য়ৌ গুহ্যকাধিপঃ
159.30
তং পরিস্তোমসংকীর্ণৈর্নানারত্নবিভূষিতৈঃ
যানৈরনুয়য়ুর্যক্ষা রাক্ষসাশ্চ সহস্রশঃ
159.31
পক্ষিণামিব নির্ঘোষঃ কুবেরসদনং প্রতি
বভূব পরমাশ্বানামৈরাবতপথে যতাম্
159.32
তে জগ্মুস্তূর্ণমাকাশং ধনাধিপতিবাজিনঃ
প্রকর্ষন্ত ইবাভ্রাণি পিবন্ত ইব মারুতম্
159.33
ততস্তানি শরীরাণি গতসত্ত্বানি রক্ষসাম্
অপাকৃষ্যন্ত শৈলাগ্রাদ্ধনাধিপতিশাসনাৎ
159.34
তেষাং হি শাপকালোঽসৌ কৃতোঽগস্ত্যেন ধীমতা
সমরে নিহতাস্তস্মাত্সর্বে মণিমতা সহ
159.35
পাণ্ডবাস্তু মহাত্মানস্তেষু বেশ্মসু তাং ক্ষপাম্
সুখমূষুর্গতোদ্বেগাঃ পূজিতাঃ সর্বরাক্ষসৈঃ