Utshovঅধ্যায় 160
160.1
বৈশংপায়ন উবাচ
ততঃ সূর্যোদয়ে ধৌম্যঃ কৃত্বাহ্নিকমরিংদম
আর্ষ্টিষেণেন সহিতঃ পাণ্ডবানভ্যবর্তত
160.2
তেঽভিবাদ্যার্ষ্টিষেণস্য পাদৌ ধৌম্যস্য চৈব হ
ততঃ প্রাঞ্জলয়ঃ সর্বে ব্রাহ্মণাংস্তানপূজয়ন্
160.3
ততো যুধিষ্ঠিরং ধৌম্যো গৃহীত্বা দক্ষিণে করে
প্রাচীং দিশমভিপ্রেক্ষ্য মহর্ষিরিদমব্রবীৎ
160.4
অসৌ সাগরপর্যন্তাং ভূমিমাবৃত্য তিষ্ঠতি
শৈলরাজো মহারাজ মন্দরোঽভিবিরাজতে
160.5
ইন্দ্রবৈশ্রবণাবেতাং দিশং পাণ্ডব রক্ষতঃ
পর্বতৈশ্চ বনান্তৈশ্চ কাননৈশ্চোপশোভিতাম্
160.6
এতদাহুর্মহেন্দ্রস্য রাজ্ঞো বৈশ্রবণস্য চ
ঋষয়ঃ সর্বধর্মজ্ঞাঃ সদ্ম তাত মনীষিণঃ
160.7
অতশ্চোদ্যন্তমাদিত্যমুপতিষ্ঠন্তি বৈ প্রজাঃ
ঋষয়শ্চাপি ধর্মজ্ঞাঃ সিদ্ধাঃ সাধ্যাশ্চ দেবতাঃ
160.8
যমস্তু রাজা ধর্মাত্মা সর্বপ্রাণভৃতাং প্রভুঃ
প্রেতসত্ত্বগতীমেতাং দক্ষিণামাশ্রিতো দিশম্
160.9
এতত্সংয়মনং পুণ্যমতীবাদ্ভুতদর্শনম্
প্রেতরাজস্য ভবনমৃদ্ধ্যা পরময়া যুতম্
160.10
যং প্রাপ্য সবিতা রাজন্সত্যেন প্রতিতিষ্ঠতি
অস্তং পর্বতরাজানমেতমাহুর্মনীষিণঃ
160.11
এতং পর্বতরাজানং সমুদ্রং চ মহোদধিম্
আবসন্বরুণো রাজা ভূতানি পরিরক্ষতি
160.12
উদীচীং দীপয়ন্নেষ দিশং তিষ্ঠতি কীর্তিমান্
মহামেরুর্মহাভাগ শিবো ব্রহ্মবিদাং গতিঃ
160.13
যস্মিন্ব্রহ্মসদশ্চৈব তিষ্ঠতে চ প্রজাপতিঃ
ভূতাত্মা বিসৃজন্সর্বং যত্কিংচিজ্জঙ্গমাগমম্
160.14
যানাহুর্ব্রহ্মণঃ পুত্রান্মানসান্দক্ষসপ্তমান্
তেষামপি মহামেরুঃ স্থানং শিবমনাময়ম্
160.15
অত্রৈব প্রতিতিষ্ঠন্তি পুনরত্রোদয়ন্তি চ
সপ্ত দেবর্ষয়স্তাত বসিষ্ঠপ্রমুখাঃ সদা
160.16
দেশং বিরজসং পশ্য মেরোঃ শিখরমুত্তমম্
যত্রাত্মতৃপ্তৈরধ্যাস্তে দেবৈঃ সহ পিতামহঃ
160.17
যমাহুঃ সর্বভূতানাং প্রকৃতেঃ প্রকৃতিং ধ্রুবম্
অনাদিনিধনং দেবং প্রভুং নারায়ণং পরম্
160.18
ব্রহ্মণঃ সদনাত্তস্য পরং স্থানং প্রকাশতে
দেবাশ্চ যত্নাত্পশ্যন্তি দিব্যং তেজোময়ং শিবম্
160.19
অত্যর্কানলদীপ্তং তত্স্থানং বিষ্ণোর্মহাত্মনঃ
স্বয়ৈব প্রভয়া রাজন্দুষ্প্রেক্ষ্যং দেবদানবৈঃ
160.20
তদ্বৈ জ্যোতীংষি সর্বাণি প্রাপ্য ভাসন্তি নোঽপি চ
স্বয়ং বিভুরদীনাত্মা তত্র হ্যভিবিরাজতে
160.21
যতয়স্তত্র গচ্ছন্তি ভক্ত্যা নারায়ণং হরিম্
পরেণ তপসা যুক্তা ভাবিতাঃ কর্মভিঃ শুভৈঃ
160.22
যোগসিদ্ধা মহাত্মানস্তমোমোহবিবর্জিতাঃ
তত্র গত্বা পুনর্নেমং লোকমায়ান্তি ভারত
160.23
স্থানমেতন্মহাভাগ ধ্রুবমক্ষয়মব্যয়ম্
ঈশ্বরস্য সদা হ্যেতত্প্রণমাত্র যুধিষ্ঠির
160.24
এতং জ্যোতীংষি সর্বাণি প্রকর্ষন্ভগবানপি
কুরুতে বিতমস্কর্মা আদিত্যোঽভিপ্রদক্ষিণম্
160.25
অস্তং প্রাপ্য ততঃ সংধ্যামতিক্রম্য দিবাকরঃ
উদীচীং ভজতে কাষ্ঠাং দিশমেষ বিভাবসুঃ
160.26
স মেরুমনুবৃত্তঃ সন্পুনর্গচ্ছতি পাণ্ডব
প্রাঙ্মুখঃ সবিতা দেবঃ সর্বভূতহিতে রতঃ
160.27
স মাসং বিভজন্কালং বহুধা পর্বসংধিষু
তথৈব ভগবান্সোমো নক্ষত্রৈঃ সহ গচ্ছতি
160.28
এবমেষ পরিক্রম্য মহামেরুমতন্দ্রিতঃ
ভাবয়ন্সর্বভূতানি পুনর্গচ্ছতি মন্দরম্
160.29
তথা তমিস্রহা দেবো ময়ূখৈর্ভাবয়ঞ্জগৎ
মার্গমেতদসংবাধমাদিত্যঃ পরিবর্ততে
160.30
সিসৃক্ষুঃ শিশিরাণ্যেষ দক্ষিণাং ভজতে দিশম্
ততঃ সর্বাণি ভূতানি কালঃ শিশিরমৃচ্ছতি
160.31
স্থাবরাণাং চ ভূতানাং জঙ্গমানাং চ তেজসা
তেজাংসি সমুপাদত্তে নিবৃত্তঃ সন্বিভাবসুঃ
160.32
ততঃ স্বেদঃ ক্লমস্তন্দ্রী গ্লানিশ্চ ভজতে নরান্
প্রাণিভিঃ সততং স্বপ্নো হ্যভীক্ষ্ণং চ নিষেব্যতে
160.33
এবমেতদনির্দেশ্যং মার্গমাবৃত্য ভানুমান্
পুনঃ সৃজতি বর্ষাণি ভগবান্ভাবয়ন্প্রজাঃ
160.34
বৃষ্টিমারুতসংতাপৈঃ সুখৈঃ স্থাবরজঙ্গমান্
বর্ধয়ন্সুমহাতেজাঃ পুনঃ প্রতিনিবর্ততে
160.35
এবমেষ চরন্পার্থ কালচক্রমতন্দ্রিতঃ
প্রকর্ষন্সর্বভূতানি সবিতা পরিবর্ততে
160.36
সংততা গতিরেতস্য নৈষ তিষ্ঠতি পাণ্ডব
আদায়ৈব তু ভূতানাং তেজো বিসৃজতে পুনঃ
160.37
বিভজন্সর্বভূতানামায়ুঃ কর্ম চ ভারত
অহোরাত্রান্কলাঃ কাষ্ঠাঃ সৃজত্যেষ সদা বিভুঃ