Utshovঅধ্যায় 161
161.1
বৈশংপায়ন উবাচ
তস্মিন্নগেন্দ্রে বসতাং তু তেষাং; মহাত্মনাং সদ্ব্রতমাস্থিতানাম্
রতিঃ প্রমোদশ্চ বভূব তেষা;মাকাঙ্ক্ষতাং দর্শনমর্জুনস্য
161.2
তান্বীর্যয়ুক্তান্সুবিশুদ্ধসত্ত্বাং;স্তেজস্বিনঃ সত্যধৃতিপ্রধানান্
সংপ্রীয়মাণা বহবোঽভিজগ্মু;র্গন্ধর্বসংঘাশ্চ মহর্ষয়শ্চ
161.3
তং পাদপৈঃ পুষ্পধরৈরুপেতং; নগোত্তমং প্রাপ্য মহারথানাম্
মনঃপ্রসাদঃ পরমো বভূব; যথা দিবং প্রাপ্য মরুদ্গণানাম্
161.4
ময়ূরহংসস্বননাদিতানি; পুষ্পোপকীর্ণানি মহাচলস্য
শৃঙ্গাণি সানূনি চ পশ্যমানা; গিরেঃ পরং হর্ষমবাপ্য তস্থুঃ
161.5
সাক্ষাত্কুবেরেণ কৃতাশ্চ তস্মি;ন্নগোত্তমে সংবৃতকূলরোধসঃ
কাদম্বকারণ্ডবহংসজুষ্টাঃ; পদ্মাকুলাঃ পুষ্করিণীরপশ্যন্
161.6
ক্রীডাপ্রদেশাংশ্চ সমৃদ্ধরূপা;ন্সুচিত্রমাল্যাবৃতজাতশোভান্
মণিপ্রবেকান্সুমনোহরাংশ্চ; যথা ভবেয়ুর্ধনদস্য রাজ্ঞঃ
161.7
অনেকবর্ণৈশ্চ সুগন্ধিভিশ্চ; মহাদ্রুমৈঃ সংততমভ্রমালিভিঃ
তপঃপ্রধানাঃ সততং চরন্তঃ; শৃঙ্গং গিরেশ্চিন্তয়িতুং ন শেকুঃ
161.8
স্বতেজসা তস্য নগোত্তমস্য; মহৌষধীনাং চ তথা প্রভাবাৎ
বিভক্তভাবো ন বভূব কশ্চি;দহর্নিশানাং পুরুষপ্রবীর
161.9
যমাস্থিতঃ স্থাবরজঙ্গমানি; বিভাবসুর্ভাবয়তেঽমিতৌজাঃ
তস্যোদয়ং চাস্তময়ং চ বীরা;স্তত্র স্থিতাস্তে দদৃশুর্নৃসিংহাঃ
161.10
রবেস্তমিস্রাগমনির্গমাংস্তে; তথোদয়ং চাস্তময়ং চ বীরাঃ
সমাবৃতাঃ প্রেক্ষ্য তমোনুদস্য; গভস্তিজালৈঃ প্রদিশো দিশশ্চ
161.11
স্বাধ্যায়বন্তঃ সততক্রিয়াশ্চ; ধর্মপ্রধানাশ্চ শুচিব্রতাশ্চ
সত্যে স্থিতাস্তস্য মহারথস্য; সত্যব্রতস্যাগমনপ্রতীক্ষাঃ
161.12
ইহৈব হর্ষোঽস্তু সমাগতানাং; ক্ষিপ্রং কৃতাস্ত্রেণ ধনংজয়েন
ইতি ব্রুবন্তঃ পরমাশিষস্তে; পার্থাস্তপোয়োগপরা বভূবুঃ
161.13
দৃষ্ট্বা বিচিত্রাণি গিরৌ বনানি; কিরীটিনং চিন্তয়তামভীক্ষ্ণম্
বভূব রাত্রির্দিবসশ্চ তেষাং; সংবত্সরেণৈব সমানরূপঃ
161.14
যদৈব ধৌম্যানুমতে মহাত্মা; কৃত্বা জটাঃ প্রব্রজিতঃ স জিষ্ণুঃ
তদৈব তেষাং ন বভূব হর্ষঃ; কুতো রতিস্তদ্গতমানসানাম্
161.15
ভ্রাতুর্নিয়োগাত্তু যুধিষ্ঠিরস্য; বনাদসৌ বারণমত্তগামী
যত্কাম্যকাত্প্রব্রজিতঃ স জিষ্ণু;স্তদৈব তে শোকহতা বভূবুঃ
161.16
তথা তু তং চিন্তয়তাং সিতাশ্ব;মস্ত্রার্থিনং বাসবমভ্যুপেতম্
মাসোঽথ কৃচ্ছ্রেণ তদা ব্যতীত;স্তস্মিন্নগে ভারত ভারতানাম্
161.17
ততঃ কদাচিদ্ধরিসংপ্রয়ুক্তং; মহেন্দ্রবাহং সহসোপয়াতম্
বিদ্যুত্প্রভং প্রেক্ষ্য মহারথানাং; হর্ষোঽর্জুনং চিন্তয়তাং বভূব
161.18
স দীপ্যমানঃ সহসান্তরিক্ষং; প্রকাশয়ন্মাতলিসংগৃহীতঃ
বভৌ মহোল্কেব ঘনান্তরস্থা; শিখেব চাগ্নের্জ্বলিতা বিধূমা
161.19
তমাস্থিতঃ সংদদৃশে কিরীটী; স্রগ্বী বরাণ্যাভরণানি বিভ্রৎ
ধনংজয়ো বজ্রধরপ্রভাবঃ; শ্রিয়া জ্বলন্পর্বতমাজগাম
161.20
স শৈলমাসাদ্য কিরীটমালী; মহেন্দ্রবাহাদবরুহ্য তস্মাৎ
ধৌম্যস্য পাদাবভিবাদ্য পূর্ব;মজাতশত্রোস্তদনন্তরং চ
161.21
বৃকোদরস্যাপি ববন্দ পাদৌ; মাদ্রীসুতাভ্যামভিবাদিতশ্চ
সমেত্য কৃষ্ণাং পরিসান্ত্ব্য চৈনাং; প্রহ্বোঽভবদ্ভ্রাতুরুপহ্বরে সঃ
161.22
বভূব তেষাং পরমঃ প্রহর্ষ;স্তেনাপ্রমেয়েণ সমাগতানাম্
স চাপি তান্প্রেক্ষ্য কিরীটমালী; ননন্দ রাজানমভিপ্রশংসন্
161.23
যমাস্থিতঃ সপ্ত জঘান পূগা;ন্দিতেঃ সুতানাং নমুচের্নিহন্তা
তমিন্দ্রবাহং সমুপেত্য পার্থাঃ; প্রদক্ষিণং চক্রুরদীনসত্ত্বাঃ
161.24
তে মাতলেশ্চক্রুরতীব হৃষ্টাঃ; সত্কারমগ্র্যং সুররাজতুল্যম্
সর্বং যথাবচ্চ দিবৌকসস্তা;ন্পপ্রচ্ছুরেনং কুরুরাজপুত্রাঃ
161.25
তানপ্যসৌ মাতলিরভ্যনন্দ;ত্পিতেব পুত্রাননুশিষ্য চৈনান্
যয়ৌ রথেনাপ্রতিমপ্রভেণ; পুনঃ সকাশং ত্রিদিবেশ্বরস্য
161.26
গতে তু তস্মিন্বরদেববাহে; শক্রাত্মজঃ সর্বরিপুপ্রমাথী
শক্রেণ দত্তানি দদৌ মহাত্মা; মহাধনান্যুত্তমরূপবন্তি
দিবাকরাভাণি বিভূষণানি; প্রীতঃ প্রিয়ায়ৈ সুতসোমমাত্রে
161.27
ততঃ স তেষাং কুরুপুংগবানাং; তেষাং চ সূর্যাগ্নিসমপ্রভাণাম্
বিপ্রর্ষভাণামুপবিশ্য মধ্যে; সর্বং যথাবত্কথয়াং বভূব
161.28
এবং ময়াস্ত্রাণ্যুপশিক্ষিতানি; শক্রাচ্চ বাতাচ্চ শিবাচ্চ সাক্ষাৎ
তথৈব শীলেন সমাধিনা চ; প্রীতাঃ সুরা মে সহিতাঃ সহেন্দ্রাঃ
161.29
সংক্ষেপতো বৈ স বিশুদ্ধকর্মা; তেভ্যঃ সমাখ্যায় দিবি প্রবেশম্
মাদ্রীসুতাভ্যাং সহিতঃ কিরীটী; সুষ্বাপ তামাবসতিং প্রতীতঃ